އަހަރުގެ މިހާތަނަށް ދައުލަތަށް ލިބުނު ޖުމުލަ އާމްދަނީ 33.2 ބިލިއަން ރުފިޔާއަށް އަރައިފިއެވެ.
ފިނޭންސް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާ ގޮތުން މިމަހުގެ 13 ގެ ނިޔަލަށް އާމްދަނީގެ ކުރިއެރުން ދެމެހެއްޓެނިވި ގޮތެއްގައި ވަނީ ހިފެހެއްޓިފައެވެ. ދައުލަތުގެ ޖުމުލަ އާމްދަނީއާއި ހިލޭ އެހީ 33.2 ބިލިއަން ރުފިޔާއަށް އަރާފައިވާ އިރު، އެއީ މިދިޔަ އަހަރުގެ އެ މުއްދަތާ އަޅާބަލާއިރު 9.9 ޕަސެންޓް އިތުރު އަދަދެކެވެ. މިދިޔަ އަހަރުގެ އެ މުއްދަތުގައި ލިބުނީ 30.3 ބިލިއަން ރުފިޔާގެ އާމްދަނީއެކެވެ.
ދައުލަތުގެ އާމްދަނީގެ ބޮޑުބައި ހިއްސާކުރަނީ ޓެކްސްގެ ގޮތުގައި ލިބޭ އާމްދަނީ އެވެ. ޓެކުހުގެ ޖުމުލަ އާމްދަނީ 7.7 އިންސައްތަ އިތުރުވެ 24.8 ބިލިއަން ރުފިޔާއަށް އަރާފައިވާ އިރު، ޖީއެސްޓީން ލިބުނު އާމްދަނީ 11.5 އިންސައްތަ އިތުރުވެ 13.5 ބިލިއަން ރުފިޔާއަށް ވަނީ ލިބިފައެވެ.
މިއަހަރުގެ ޖުލައި އިން ފެށިގެން ޓީޖީއެސްޓީ ރޭޓު 17 ޕަސަންޓަށް ބޮޑުކޮށްފައިވާތީ ޓީޖީއެސްޓީގެ އާމްދަނީ 9.0 ބިލިއަން ރުފިޔާއަށް އަރާފައިވާއިރު ގްރީން ޓެކުހުން 1.9 ބިލިއަން ރުފިޔާ އެއާޕޯޓް ސާވިސް ޗާޖަސް އަދި ޑިޕާޗާ ޓެކުހުން 1.5 ބިލިއަން ރުފިޔާ ވަނީ ލިބިފައެވެ.
ތަފާސްހިސާބުތަކަށް ބަލާއިރު ޓެކްސް ނޫން އާމްދަނީގެ ގޮތުގައި 8.2 ބިލިއަން ރުފިޔާއަށް އަރާފައިވާ އިރު، އެއީ 22.1 ޕަސެންޓް އިތުރުވުމެއްކަން ފާހަގަކޮށްލެވެއެވެ. ޓެކްސް ނޫން އާމްދަނީގެ ތެރެއިން އެކިއެކި ހިދުމަތަށް ނެގޭ ފީގެ ގޮތުގައި 3.7 ބިލިއަން ރުފިޔާ ވަނީ ލިބިފައެވެ. އަދި އެއާޕޯޓް ޑިވެލޮޕްމަންޓް ފީގެ ގޮތުގައި 1.6 ބިލިއަން ރުފިޔާ ވަނީ ލިބިފައވާ އިރު، މިއީ 60.4 އިންސައްތައިގެ އިތުރުވުމެއް ކަމަށް ރިޕޯޓުގައި ވަނީ ފާހަގަކޮށްފައެވެ.
މި މުއްދަތުގައި ދައުލަތުގެ ހަރަދު 34.1 ބިލިއަން ރުފިޔާއަށް ވަނީ އަރާފައެވެ. މިއީ ކުރީ އަހަރުގެ 39.4 ބިލިއަން ރުފިޔާއާ އަޅައިބަލާއިރު 13.5 އިންސައްތައިގެ ދަށްވުމެއް ކަމަށާއި ސަރުކާރު ހިންގުމުގެ ހަރަދުތައް 10.7 އިންސައްތައިން ދަށްކޮށް މިދިޔަ އަހަރާ އަޅައިބަލާއިރު ދެ ބިލިއަން ރުފިޔާއިން ހަރަދުތައް ކުޑަކޮށްފައިވާކަން ރިޕޯޓުގައި ވަނީ ފާހަގަކޮށްފައެވެ.
