މާލެ ސަރަހައްދުގައި ގާއިމުކުރި ފުރަތަމަ އާބަން ޕްރައިމަރީ ހެލްތްކެއާ ސެންޓަރު (ޔޫޕީއެޗްސީ)ން ހިދުމަތްދޭން ފަށައިފި އެވެ.
މާފަންނުގައި ގާއިމުކޮށްފައިވާ މި ޕްރައިމަރީ ހެލްތްކެއާ ސެންޓަރު ރަސްމީކޮށް ހުޅުވީ އިއްޔެ އެވެ. އެތަން ހުޅުވައިދެއްވީ ރައީސް ޑރ. މުހައްމަދު މުއިއްޒު އެވެ. އެ ސެންޓަރުން ހިދުމަތްދޭނެ ގަޑިތަކަކީ:
- ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ރޭގަނޑު 10:00 އަށް
- ހުކުރު ދުވަހު މެންދުރުފަހު 3:30 އިން ރޭގަނޑު 10:00 އަށް
- ސަރުކާރު ބަންދު ދުވަސްތަކުގައި ސެންޓަރު ވެސް ބަންދު
އައިޖީއެމްއެޗްއިން ބުނީ އެ ސެންޓަރުގެ ޖީޕީ ކްލިނިކުން އާއިލާ ބޭސްވެރިކަމުގެ ހާއްސަ ޑޮކްޓަރުގެ ހިދުމަތާއި އާންމު ބަލިތަކަށް ފަރުވާ ދިނުމުގެ ހިދުމަތާއި ޖީޕީގެ ޑޮކްޓަރުން ލަފާ ދެއްވާ ލޭގެ ޓެސްޓްތައް ހެދުމުގެ ހިދުމަތް ދޭނެ ކަމަށެވެ.
އަދި ޑްރޮޕް ބޮކްސް މެދުވެރިކޮށް ބޭސް ސިޓީ އާކުރުމުގެ ހިދުމަތާއި ކުރި ޕްރޮސީޖާތައް ވެސް ހެދޭނެއެވެ. އެކްސްރޭގެ ހިދުމަތާއި ބޭސްފިހަރާއިގެ ހިދުމަތް ވެސް އެތަނުން ދޭނެ ކަމަށް ބުންޏެވެ.
ރައީސްގެ ސިއްހީ ސިޔާސަތާ އެއްގޮތަށް، އާބަން ޕްރައިމަރީ ހެލްތުކެއާ ސެންޓަރުތައް ފަރުމާކުރެވިފައިވަނީ ބަލިމަޑުކަމުން ސަލާމަތްވެ، ދުޅަހެޔޮ މުޖުތަމައެއް ބިނާވެގެންދާނެ ހިދުމަތްތަކެއް، އެ ސެންޓަރުގެ އެހީގައި ރައްޔިތުންނަށް ފޯރުކޮށްދެވޭނެގޮތަށެވެ.
މި ސެންޓަރުގެ ހިދުމަތް މައިގަނޑު ގޮތެއްގައި ބެހިފައި ވަނީ ތިން ބަޔަކަށެވެ. އެއީ، އާންމު ބަލިތަކުގެ ޑޮކްޓަރުންނަށް ދެއްކުމާއި އިތުރުފަރުވާ ބޭނުންވާ ހާލަތްތަކުގައި ހާއްސަ ޑޮކްޓަރުންގެ ލަފާ ހޯދުމާއި ފަސޭހައިން ދެއްކޭ ހާއްސަ ޑޮކްޓަރުންނަށް ދެއްކުމުގެ އިންތިޒާމް ހަމަޖައްސައިދިނުމެވެ. އަދި އާންމު ސިއްހަތު ކުރިއެރުވުމަށް ގައުމީ ފެންވަރުގައި ހިންގާ ޕްރޮގްރާމްތައްވެސް މި މަރުކަޒުގައި ކުރިއަށްގެންދާނެއެވެ. އެގޮތުން، ޗައިލްޑް ހެލްތު ކްލިނިކް މެދުވެރިކުރައްވައި، އެކުދިންގެ ހެދިބޮޑުވުން މޮނިޓާކޮށް، ވެކްސިން ދިނުން ފަދަ ހިދުމަތްތައް މި ސެންޓަރުން ފޯރުކޮށްދޭނެއެވެ. ހަމައެއާއެކު ސިއްހީ ރަނގަޅު އާދަތަކަށް ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމާއި، ދުންފަތާ ދުރުވުމަށް އެހީވެދޭ ކުލިނިކް ފަދަ ކުލިނިކްތަކުގެ ހިދުމަތްވެސް މި ސެންޓަރުން ލިބޭނެއެވެ.
