ރައްޔިތުންނަށް ދުޅަހެޔޮ ސިއްހަތެއް ހޯދައިދިނުމުގެ މަގްސަދުގައި އިއްޔެ މާލެ ސަރަހައްދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުއްވައިދެއްވި އަރބަން ޕްރައިމަރީ ހެލްތު ކެއަރ ސެންޓަރުން ހުކުރު ދުވަހު މެންދުރު ފަހު ވެސް ހިދުމަތް ފޯރުކޮށްދޭނެ ކަމަށް އެ ސެންޓަރުން ބުނެފިއެވެ.
ދުޅަހެޔޮ މުޖުތަމަޢަކަށް ރައްޔިތުންނަށް ބޭނުންވާ މެޑިކަލް ޗެކަޕް ތަކާއި، ސިއްހީ ފަރުވާ އާއި އަދި މައުލޫމާތު ފޯރުކޮށްދޭ މި ސެންޓަރު އާންމު ދުވަސްތަކުގައި ހުޅުވާފައި ހުންނާނީ ހެނދުނު 8:30 އިން ރޭގަނޑު 10:00 އަށެވެ. އަދި ހުކުރު ދުވަހު މެންދުރު ފަހު 3:30 އިން ރޭގަނޑު 10:00 އަށެވެ.
މި ސެންޓަރުން އާންމު ބަލިތަކުގެ ފަރުވާ އާއި، ޢާއިލީ ބޭސްވެރިކަމުގެ ހާއްސަ ޑޮކްޓަރުންގެ ހިދުމަތާއި، ޓެސްޓު ހެދުމާއި، ޑްރޮޕް ބޮކްސް މެދުވެރިކޮށް ބޭސް ސިޓީ އައު ކުރުމާއި އެކްސްރޭގެ ހިދުމަތް ވެސް ލިބޭނެ ކަމަށާއި 5 އަހަރުން ދަށުގެ ކުދިންނަށް ބޭނުންވާ ބޭސް ދިނުމުގެ އިތުރުން ގައުމީ ތާވަލާއި އެއްގޮތަށް ވެކްސިން ވެސް ދެވޭނެއެވެ.
އަރބަން ހެލްތު ކެއާ ސެންޓަރުގައި ހުންނަ ވެލްނަސް ކުލިނިކުން ދަތުރުވެރިންގެ ވެކްސިން ޖެހުމުގެ ހިދުމަތާއި، ދުންފަތާއި ދުރުވުމަށް އެހީތެރިކަން ފޯރުކޮށްދީ ނަފްސާނީ ދުޅަހެޔޮކަމާއި ކައުންސެލިން ފޯރުލޮށްދިނުމުގެ އިތުރުން ގައިންގަޔަށް ނާރާ ބަލިތަކަށް ހާއްސަ އެހީތެރިކަން ވެސް ފޯރުކޮށްދެއެވެ.






