ވީއައިއޭގެ އާ ޓާމިނަލް 1 އިން ޖަރުމަނުގެ ކޮންޑޯއަށް ހިދުމަތް ދޭން ފަށައިފި

އައިޝަތު ރުވާ ރިފްޢަތު | 10 ދުވަސް ކުރިން - 20 ނޮވެންބަރު 2025 22:08
ކޮންޑޯއަށް ހިދުމަތް ދޭން ފެށުމާއި ގެޅިގެން މިއަދު ޓާމިނަލް 1 ގައި ބޭއްވި ރަސްމިއްޔާތު ތެރެއިން/ ފޮޓޯ:ވީއައިއޭ
ކޮންޑޯއަށް ހިދުމަތް ދޭން ފެށުމާއި ގެޅިގެން މިއަދު ޓާމިނަލް 1 ގައި ބޭއްވި ރަސްމިއްޔާތު ތެރެއިން/ ފޮޓޯ:ވީއައިއޭ
ޚުލާސާ

ވީއައކއޭ ޓާމިނަލް 1 ގައި ކޮންޑޯގެ ޗެކިން ކައުންޓަރުތައް ރަސްމީކޮށް ހުޅުވާލާފައިވާއިރު، އެ އެއާލައިނުން ފުރި 302 ފަސިންޖަރުންނަށް ހާއްސަ ހަދިޔާތައް ވަނީ ދީފައި.

ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ އާ ފަސިންޖަރު ޓާމިނަލް، ޓާމިނަލް 1 އިން ޖަރުމަނުގެ މަޝްހޫރު އެއާލައިނެއް ކަމަށްވާ ކޮންޑޯއަށް ހިދުމަތް ދޭން ފަށައިފިއެވެ. މިކަން ފާހަގަކުރުމުގެ ގޮތުން މިއަދު ވަނީ ޓާމިނަލް 1 ގައި ހާއްސަ ރަސްމިއްޔާތެއް ބާއްވައިފައެވެ.

މިއަދު ހެނދުނު ބޭއްވުނު މި ހާއްސަ ރަސްމިއްޔާތު ޝަރަފުވެރިކޮށްދެއްވީ ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ)ގެ މެނޭޖިން ޑިރެކްޓަރު މުޖުތަބާ ޖަލީލު އެވެ. މި ރަސްމިއްޔާތުގައި ކޮންޑޯގެ އިންޓަކޮންޓިނެންޓަލް ސްޓޭޝަންސްގެ އޭރިއާ މެނޭޖަރު ސްޓެފަން މެކްކެނާ އާއި ކޮންޑޯގެ އޭޝިއާ އަދި އިންޑިއަން އޯޝަންގެ ގްރައުންޑް އޮޕަރޭޝަންސްގެ ރީޖަނަލް މެނޭޖަރު ރޮން ޕްލެންގެ އިތުރުން މޯލްޑިވްސް އެއަރޕޯޓްސް ކޮންޕެނީ ލިމިޓެޑް (އެމްއޭސީއެލް)ގެ އިސްވެރިންނާއި އެއާޕޯޓްގެ އޮފިޝަލުން ބައިވެރިވެވަޑައިގެންނެވި އެވެ.

ރަސްމިއްޔާތާ އެކު ކޮންޑޯގެ ޗެކިން ކައުންޓަރުތައް ރަސްމީކޮށް ހުޅުވާލާފައިވާއިރު، އެ އެއާލައިނުން ފުރި 302 ފަސިންޖަރުންނަށް ހާއްސަ ހަދިޔާތައް ވަނީ ދީފަ އެވެ. މީގެ އިތުރުން، ޓާމިނަލް 1 އަށް ކައިރި ކުރި ކޮންޑޯގެ ފުރަތަމަ ފްލައިޓް، DE2320 އިން ރާއްޖެ އައި 277 ފަސިންޖަރުންނަށް ސަގާފީ ހަރަކާތްތަކާއެކު ހޫނު މަރުހަބާއެއް ވަނީ ކިޔައިފަ އެވެ.

ކޮންޑޯ އިން ރާއްޖެއަށް ދަތުރުތައް ފެށީ 31 އޮކްޓޫބަރު 1981 ގައެވެ. މިއީ ވީއައިއޭގެ އާ ޓާމިނަލް 1 އިން ހިދުމަތް ދޭން ފެށި ޖަރުމަނުގެ ފުރަތަމަ އެއާލައިން ކަމަށްވުމުން، މިއީ ވީއައިއޭގެ ތާރީހަށް އިތުރުވި މުހިންމު ފިޔަވަޅެކެވެ.

ކޮންޑޯ އާއެކު ޓާމިނަލް 1 އިން ހިދުމަތް ދޭން ފަށާފައިވާ އެއާލައިންތަކުގެ އަދަދު ވަނީ 26 އަށް އިތުރުވެފަ އެވެ. އެމްއޭސީއެލްގެ އަމާޒަކީ ރާއްޖެއަށް ދަތުރުކުރާ ހުރިހާ އެއާލައިނަކަށްވެސް އެންމެ ފުރިހަމަ އަދި އެންމެ މަތީ ފަންތީގެ ހިދުމަތެއް ފޯރުކޮށްދިނުން ކަމަށް އެ ކުންފުނިން ބުންޏެވެ. މި އަމާޒަށް ވާސިލްވުމަށްޓަކައި ޓާމިނަލް 1 ގެ ހިދުމަތްތައް ހަރުދަނާކުރަމުންދާކަން ފާހަގަ ކުރެވެއެވެ.

TelegramTwitterYoutubeTiktokViberFacebookInstagram

0 ރިއެކްޝަންސް / 0 ކޮމެންޓް

0%
0%
0%
0%
0%