ބޮޑުތަކުރުފާނު މަގު ތަރައްގީ ކުރުމުގެ މަޝްރޫއުގެ ފުރަތަމަ ސެގްމެންޓްގެ 91 އިންސައްތަ މަސައްކަތް ނިމިފައިވާ ކަމަށް، މޯލްޑިވްސް ޓްރާންސްޕޯޓް އެންޑް ކޮންޓްރކްޓިން ކޮމްޕެނީ (އެމްޓީސީސީ) އިން ހާމަކޮށްފި އެވެ.

މިކަމާ ގުޅިގެން އެމްޓީސީސީން އެކްސްގައި ހިއްސާކުރި ޕޯސްޓެއްގައި ބުނީ، މި މަސައްކަތުގެ 91 އިންސައްތަ މަސައްކަތް މިހާރު ނިމިފައިވާ ކަމަށާއި މިހާރު ކުރިއަށް ދަނީ ކެރިއޭޖްވޭ ހެދުމުގެ މަސައްކަތް ކަމަށެވެ. މަގުގެ ސަބް ގްރޭޑްގެ މަސައްކަތް ނިމި، މިހާރު ކުރިއަށްދަނީ ތާރު އެޅުމުގެ މަސައްކަތް ކަމަށްވެސް އެމްޓީސީސީން ވަނީ ހާމަކޮށްފަ އެވެ.

މީގެ އިތުރުން މަގުގައި ދުވާރު ހެދުމުގެ މަސައްކަތުގެ 87 އިންސައްތަ ނިމިފައިވާ ކަމަށާއި، ސާވިސް ލައިންތަކާއި، ފެން ހިންދާ ނިޒާމު ގާއިމުކުރުމުގެ މަސައްކަތް މިހާރު އެއްކޮށް ނިންމާލެވިފައިވާ ކަމަށްވެސް އެ ކުންފުނިން ވަނީ ހާމަކޮށްފަ އެވެ.

މި މަޝްރޫއުގެ ސަބަބުން އެއްގަމު އުޅަނދު ފަހަރަށާއި ފައިމަގުގައި ދަތުރުކުރާ ފަރާތްތަކަށް ބޭނުންކުރަން ފަސޭހަ މަގުތަކެއް ތަރައްގީ ކުރެވި، މަގުތަކުގެ ތޮއްޖެހުން ކުޑަވެގެންދާނެ ކަމަށް އެމްޓީސީސީން ބުނެ އެވެ. މީގެ އިތުރުން، އާ ސްޓޯމް ވޯޓާ ޑްރެއިނޭޖް ނިޒާމެއް ގާއިމުކުރުމުގެ ސަބަބުން ބޯކޮށް ވާރޭވެހޭ ހާލަތްތަކުގައި މަގުގައި ފެންބޮޑުވުން ފުރުސަތު ކުޑަވެގެންދާނެ ކަމަށްވެސް އެމްޓީސީސީން ބުނެ އެވެ.

މި މަސައްކަތް އެމްޓީސީސީއާ ހަވާލުކޮށްފައިވަނީ 144 މިލިޔަން ރުފިޔާއަށް އެއް އަހަރާއި ތިން މަސްދުވަހުގެ ތެރޭގައި މަސައްކަތް ނިންމާ ގޮތަށެވެ.