މިދިޔަ ހޯމަ ދުވަހު މާލޭގައި 18 އަހަރުގެ އަންހެނަކަށް އަނިޔާކުރި ތުހުމަތުގައި 19 އަހަރުގެ ދިވެހި ފިރިހެނެއް ހައްޔަރުކޮށްފި އެވެ.
ފުލުހުން ބުނެފައިވަނީ މި މައްސަލައިގައި ހައްޔަރުކޮށްފައިވަނީ ހ. ފޯސީޒަން/މާލެ އަހްމަދު އާހިލް މުނާޒު (19އ) އެވެ. އޭނާ ހައްޔަރުކޮށްފައިވަނީ މިދިޔަ އަންގާރަ ދުވަހު ކަމަށާއި ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް ޖަހާފައިވާ ކަމަށް ފުލުހުން ބުނެފައިވެ އެވެ.
މިދިޔަ އަންގާރަ ދުވަހު މާފަންނު ގެއެއްގެ ތެރޭގައި އަންހެން މީހާ ގަދަކަމުން ހިފަހައްޓާ އަނިޔާކޮށްފައިވާއިރު އެ މައްސަލަ ފުލުހުންނަށް ރިޕޯޓުކޮށްފައިވަނީ އެ ދުވަހު އިރުއޮއްސި 18:11 ހާއިރު އެވެ.
Advertisement
ކުޑަ ދެ އަންހެން ކުއްޖަކަށް ޖިންސީ ގޯނާ ކުރި މައްސަލައެއް ވެސް ވަނީ ފެންމަތިވެފަ އެވެ. ފުލުހުން ބުނެފައިވަނީ އެ މައްސަލަ މި މަހު 16 ވަނަ ދުވަހު ފުލުހުންނަށް ހުށަހެޅިފައިވާ ކަމަށާއި އެ މައްސަލަ ތަހުގީގު ކުރަމުންދާ ކަމަށެވެ.
މީގެ އިތުރުން މި މަހު 16 ވަނަ ދުވަހުގެ ހަވީރުގެ ވަގުތެއްގައި 24 އަހަރުގެ ދިވެހި އަންހެނެއް މާލެ މަގުމަތިން އެހީތެރިކަމަށް އެދިފައިވާ ކަމަށާއި، އެ އަންހެން މީހާ އައިޖީއެމް ހޮސްޕިޓަލަށް ގެންދިޔުމުން ޖިންސީ އަނިޔާ ލިބިފައިވާ ކަމަށް ހޮސްޕިޓަލާ ހަވާލާދީ ފުލުުހުން ބުނެފައިވެ އެވެ. މި މައްސަލަ ސީރިއަސް މައްސަލައެއް ގޮތުގައި ފުލުހުން ތަހުގީގުކުރަމުންދާއިރު އަނިޔާ ލިބިފައިވާ އަންހެން މީހާއަށް ބޭނުންވާ ސިއްހީ ފަރުވާ އާއި ސައިކޯސޯޝަލް އެހީތެރިކަން ދަނީ ފޯރުކޮށްދެމުންނެވެ.
