ޓްރޭޑްމާކް ބިލަށް ފަހު ޕޭޓަންޓާއި ބެހޭ ބިލެއް އެކުލަވާލުމުގެ މަސައްކަތް ކުރަމުންދާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ޕޭޓެންޓް ގާނޫނަކީ، އީޖާދުތައް ކުރާ ފަރާތްތަކަށް، އެމީހުންގެ އާ އީޖާދުތަކަށް ވަކި މުއްދަތެއްގެ ތެރޭގައި ހާއްސަ ހިމާޔަތެއް ދިނުމަށްޓަކައި ބިނާކުރެވިފައިވާ ގާނޫނީ އޮނިގަނޑެކެވެ. މި ނިޒާމުގެ ދަށުން، އެހެން އެއްވެސް ފަރާތަކަށް ހުއްދަ ނުހޯދައި އެ އީޖާދު އުފެއްދުމާއި، ބޭނުންކުރުމާއި، ވިޔަފާރިކުރުމާއި، ނުވަތަ އެތެރެކުރުމަކީ މަނާކަމެކެވެ.
މިއީ އީޖާދީ މުދަލުގެ (އިންޓަލެކްޗުއަލް ޕްރޮޕަޓީގެ) ގާނޫނުގެ މުހިންމު ބައެކެވެ. މި ގާނޫނުގެ އަސާސީ މަގުސަދަކީ، އީޖާދުކުރާ ފަރާތްތަކަށް ވަގުތީ ގޮތުން ހާއްސަ ފައިދާ އެއް ދިނުމުގެ ސަބަބުން އީޖާދީ މަސައްކަތްތަކަށް ހިތްވަރު ދިނުމެވެ. ނަތީޖާއެއްގެ ގޮތުން، އެހެން ފަރާތްތަކަށް ގާނޫނީ ހުއްދައާއެކު އެ އީޖާދު ކޮޕީކުރުމުގެ ކުރިން، އީޖާދުކުރި ފަރާތްތަކަށް އެމީހުންގެ ތަރައްގީގެ މަސައްކަތްތަކަށް ކުރި ހަރަދުތައް އަނބުރާ ހޯދައި އަދި އެ އުފެއްދުންތަކުން ފައިދާ ނެގުމުގެ ފުރުސަތު ފަހިވެގެންދެއެވެ.
މިނިސްޓަރު ސައީދު ވިދާޅުވީ ވޯލްޑް އިންޓެލެކްޓުއަލް ޕްރޮޕަޓީގެ އެކްސްޕާޓުންގެ އެހީގައި ޕޭޓަންޓާއި ބެހޭ ބިލެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އަދި އަންނަ އަހަރު އިންޓަލެކްޓުއަލް ޕްރޮޕަތީ އޮފީހެެއް ގާއިމުވެގެންދާނެ ކަމަށްވެސް ވިދާޅުވި އެވެ.
ރާއްޖެއަށް ފޭކު މުދާ އެތެރެކުރުން ހުއްޓުވައި ފިކުރީ ފިކުރީ މުދަލުގެ ހައްގުތައް ރާއްޖޭގައި ހިމާޔަތްކުރުން ހަރުދަނާކުރުމަށް ސަރުކާރުން ރައްޔިތުންގެ މަޖިލީހަށް ހުށަހެޅި ޓްރޭޑްމާކާ ބެހޭ ބިލު ވަނީ ދާދިފަހުން ފާސްކޮށްފަ އެވެ. އެ ގާނޫނުގެ ދަށުން ޓްރޭޑްމާކްގެ އެކްސްކްލޫސިވް ހައްގު ލިބޭނީ ގާނޫނުގައިވާ ގޮތުގެ މަތީން އެ މާކް ރަޖިސްޓްރީކުރުމުންނެވެ. އެ ބިލުގައިވާ ގޮތުން ރާއްޖޭގައި ޓްރޭޑްމާކެއް ރަޖިސްޓްރީކޮށްދޭނީ 10 އަހަރު ދުވަހުގެ މުއްދަތަކަށެވެ. އަދި، މި މުއްދަތު ހަމަވުމުން އަނެއްކާވެސް 10 އަހަރަށް އިތުރުކުރުމުގެ ފުރުސަތު އޮންނާނެއެވެ.






