އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން ރައްޔިތުންނަށް ފައިދާވާ ގާނޫނެއް ހަދަން ނުކެރުނު ކަމަށް އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވެއްޖެ އެވެ.
މެމްބަރު ފަލާހު މި މޭރުމުން ވިދާޅުވީ، ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ހުށަހެޅުއްވި ބިލަށް ބަހުސްކުރައްވަމުންނެވެ. މެމްބަރު މީކާއިލް ހުށަހެޅުއްވި ބިލަކީ އެއްވެ އުޅުމުގެ ގާނޫނު އުވާލުމަށް ހުށަހެޅި ބިލެކެވެ. މެމްބަރު ފަލާހު ވިދާޅުވި ގޮތުގައި، މިފަދަ މުހިއްމު އިސްލާހުތަކާއި ގާނޫނުތައް އުވާލަން ހުށަހެޅުމަކީ އެއްވެސް ވަރަކަށް ގައުމާ ދޭތެރޭ އެމްޑީޕީން ނުވިސްނާ ކަމުގެ ހެއްކެއް ކަމަށެވެ.
ސުލްހަވެރިކަމާއެކު އެއްވެ އުޅުމުގެ މިނިވަންކަން ސިޔާސީ ޕާޓީތަކަށް ހޯދައި ދިނީ އަދުގެ ސަރުކާރުން ކަމަށާއި މި ގާނޫނު އުވާނުލި ނަމަވެސް މިހާރުވެސް ބޭނުން ކޮންމެ ސަރަހައްދަކަށް އެއްވެ އުޅުމުގެ މިނިވަންކަން ރައްޔިތުންނަށް އެބައޮތްކަމަށް މެމްބަރު ފަލާހު ވިދާޅުވި އެވެ.
"އަޅުގަނޑުމެންނަށް ކަމަކަށް ނުވޭ އެމްޑީޕީން މިހާރު އެއްވާން ގޮވާލިއަކަސް" --- މެމްބަރު ފަލާހު ވިދާޅުވި އެވެ.
މެމްބަރު ފަލާހު ވިދާޅުވި ގޮތުގައި، އެމްޑީޕީން މި މަހުގެ 17 ވަނަ ދުވަހުވެސް ޖަލްސާއެއް ބާއްވަން އިއުލާނު ކުރި ނަމަވެސް އެ ޖަލްސާއަށް ދާނެ މީހަކު ނުވުމުން އެ ޖަލްސާ އެންމެ ފަހުން ކެންސަލް ކުރީ ކަމަށެވެ.
އެމްޑީޕީއަށް ވެރިކަން ލިބި، ރައްޔިތުންގެ މަޖިލީހުގެ ސުޕަމެޖޯރިޓީ ލިބިގެން އެ ޕާޓީއަށް ރައްޔިތުންނަށް ފައިދާވާ އެއްވެސް ކަމެއް ނުކުރެވުނު ކަމަށް ވިދާޅުވެ ފަލާހު ވަނީ މި ބިލަށް ވަރަށް ބޮޑަށް ފާޑު ވިދާޅުވެފަ އެވެ.
