17 އަހަރުން ދަށުގެ އޭއެފްސީ ފުޓްބޯޅަ މުބާރާތުގެ ތަމްރީނަށް ރާއްޖެ އައިސްފައިވާ ފަލަސްތީނުގެ ޓީމަށް ރައީސުލްޖުމްހޫރިއްޔާގެ ދެކަނބަލުންގެ ފަރާތުން ހާއްސަ ފަރިއްކޮޅެއް ދެއްވައިފި އެވެ.
އަންގާރަ ދުވަހު ހޮޓެލް ޖެންގައި ބޭއްވުނު މެންދުރުގެ ފަރިއްކޮޅުގައި ރައީސްގެ ދެކަނބަލުން ވަނީ ފަލަސްތީނުގެ 17 އަހަރުން ދަށުގެ ޓީމުގެ މެންބަރުންނާއި ވަކިވަކިން ބައްދަލުކުރައްވައި މިހާރު ކުރިއަށްދާ ކޭމްޕުގެ ތަޖުރިބާ އޮޅުންފިލުވައިފަ އެވެ.
މި މަހުގެ 10 ވަނަ ދުވަހު ރާއްޖެ އައި ފަލަސްތީނުގެ ޓީމު ތަމްރީނު ކުރުމަށްޓަކައި ރަހުމަތްތެރިކަމުގެ ދެ މެޗު ރާއްޖެއާ ދެކޮޅަށް ވަނީ ކުޅެފަ އެވެ.
ފަލްސްތީނު ޓިމުގެ އެދިލެއްވުމަކަށް ރާއްޖޭގައި ތަމްރީނު ކުރުމުގެ ހުއްދަ ސްޕޯޓްސް މިނިސްޓްރީން ދީފައިވަނީ އެފްއޭއެމްއާ ކުރެވުނު މަޝްވަރާއަށްފަހުގަ އެވެ.
ރާއްޖޭގައި ކުޅުނު ދެ މެޗުގެ ސުވެނިއާ ޓިކެޓު ރައީސް މުޢިއްޒުގެ އިތުރުން ނައިބު ރައީސް ހުސައިން މުހައްމަދު ލަތީފު ވެސް ވަނީ ބައްލައިގެންފަ އެވެ. ސުވެނިއާ ޓިކެޓުތައް ވިއްކައިން ލިބުނު ހުރިހާ ފައިސާއެއް ހަދިޔާ ކުރުމަށް ނިންމާފައިވަނީ ފަލަސްތީނުގެ ފުޓްބޯޅަ އިދާރާ އަށެވެ.
ޓްރެއިނިން ކޭމްޕް ނިންމާލުމަށްފަހު ކޮލިފައިން މެޗެއް ކުޅުމަށްޓަކައި އެ ޓީމު މިއަދު އިންޑިއާ އަށް ފުރާނެ އެވެ. 17 އަހަރުން ދަށުގެ އޭޝިއަން ކަޕު އޮންނާނީ އަންނަ އަހަރު ސައޫދީ އަރަބިއާގަ އެވެ. މި މަހު 22 އިން 30 އަށް ރާއްޖެ ވެސް ކޮލިފައިން މެޗުތައް ކުޅުމަށް ވަނީ ހަމަޖެހިފަ އެވެ.
އަނިޔާވެރި ޔަހޫދީ އިޒްރޭލުން ފަލަސްތީނުގެ އެތައް ހާސް ރައްޔިތުންނެއް ޝަހީދުކޮށްލާފައިވާއިރު މުޅި ޣައްޒާ ވަނީ އެއްކޮށް ސުންނާފަތިކޮށްލާފަ އެވެ. ޝަހީދުވި މީހުންގެ ތެރޭގައި ފުޓްބޯޅަ އެތަކެއް ކުޅުންތެރިންނެއް ވެސް ވަނީ ޝަހީދުވެފަ އެވެ.
ފަލްސްތީނަށް އިންސާފު ހޯދުމަށް އެކި ބައިނަލްއަގުވާމީ އެކި ފޯރަމްތަކުގައި ރައީސް މުޢިއްޒު ވަނީ ގޮވާލައްވާފަ އެވެ.
