ރާއްޖޭގެ އެއާ އެމްބިއުލަންސް ހިދުމަތް ދުބާއީ އާއި ތައިލެންޑަށް ފުޅާކުރަން ގައުމީ އެއާލައިން މޯލްޑިވިއަން ހިންގާ އައިލެންޑު އޭވިއޭޝަނާއެކު މިއަދު ސޮއިކޮށްފި އެވެ.
މި އެއްބަސްވުމުގައި ހެލްތް މިނިސްޓްރީ، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަދި ރާއްޖޭގެ ގައުމީ އެއާލައިނުން ވަނީ ސޮއިކޮށްފަ އެވެ.
ހެލްތް މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ އެ މިނިސްޓްރީގެ ޑެޕިއުޓީ މިނިސްޓަރު އަޙްމަދު ހަމްދާން ނާސިރެވެ. އައިލެންޑް އޭވިއޭޝަން (މޯލްޑިވިއަން)ގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު އިބްރާހިމް އިޔާސް އެވެ. އަދި އެންސްޕާގެ ފަރާތުން ސޮއިކުރެއްވީ އެކުންފުނީގެ ޗީފް އެގްޒެކެޓިވް އޮފިސަރު (ސީއީއޯ) ހީނާ ވަލީދެވެ. ސޮއި ކުރުމުގެ ރަސްމިއްޔާތުގައި ޓްރާންސްޕޯޓް މިނިސްޓަރު މުހައްމަދު އަމީންވެސް ބައިވެރިވެ ވަޑައިގެންނެވި އެވެ.
އެއާ އެމްބިއުލަންސްގެ ހިދުމަތަކީ ރައީސް ޑރ. މުއިއްޒުގެ، ރިޔާސީ ވައުދުތަކުގެ ތެރެއިން ސަރުކާރުގެ 14 ހަފްތާގެ މަސައްކަތުގެ ތެރޭގައި ހިމަނުއްވާ، 2024 ވަނަ އަހަރުގެ މާޗު މަހުގެ 1 ވަނަ ދުވަހުން ފެށިގެން ދެމުންދާ ހިދުމަތެކެވެ. މި ވަގުތު އެއާ އެމްބިއުލާންސްގައި ދަތުރުކުރަނީ މާލެ އަށް އެކަންޏެވެ. އެކަމަކު، ސްރީ ލަންކާ އަށް އެ ދަތުރުތައް ފެށުމަށް މަޝްވަރާކޮށް، ގޮތްތަކެއް ނިމިފައިވީ ނަމަވެސް އަދި ސޮއެއް ނުކުރެ އެވެ.
މި ހިދުމަތް މޯލްޑިވިއަންއިން ފަށާފައިވަނީ DHC-8-200 މަރުކާގެ މަތިންދާބޯޓެއް ބޭނުންކޮށްގެންނެވެ. އެއާ އެމްބިއުލާންސްގެ ހިދުމަތް އިތުރަށް ރަނގަޅުކޮށް އޭގައި ބޭނުން ކުރާ އާލާތްތައް ފުރިހަމަ ކުރުމަށް ޓަކައި އުރީދޫއިން މީގެ ކުރިން ވަނީ 16 މިލިއަން ރުފިޔާގެ އަގު ހުރި މެޑިކަލް އިކުއިޕްމެންޓްސް ހަދިޔާކޮށްފަ އެވެ.
