ދަރަނި އަދާކުރުމުގެ ބޮޑެތި ގޮންޖެހުންތަކުގެ ތެރޭގައި ފިނޭންސް މިނިސްޓަރު ޑރ.މުހައްމަދު ޝަފީގު ވަނީ ޖީއެސްޓީ، ޓީޖީއެސްޓީ، ބީޕީޓީ، ނުވަތަ ވިތުހޯލްޑިން ޓެކްސް ފަދަ މުހިއްމު ޓެކްސް ރޭޓްތައް ބޮޑުކުރުމުގެ އެއްވެސް ޕްލޭނެއް ސަރުކާރުން ނެތް ކަމަށް މާލިއްޔަތު ކޮމެޓީގައި މިއަދު ޔަގީންކަން ދެއްވާފައެވެ. 

މާލިއްޔަތު ކޮމިޓީގައި ވާހަކަދައްކަވަމުން ޑރ.ޝަފީގު ވަނީ އާންމުންނަށް ބުރައެއް ނުޖެއްސުމަށްޓަކައި މިހާރު އޮތް ޓެކްސް އޮނިގަނޑު ދެމެހެއްޓުމަށް ސަރުކާރުން ނިންމާފައިވާކަން ފާހަގަކުރައްވާފައެވެ. އޭގެ ބަދަލުގައި ފޯކަސް ކުރާނީ ސިއްހަތަށް ފައިދާ ނުކުރާ އުފެއްދުންތަކުން ޑިއުޓީ ބޮޑުކުރުމާއި އެއާޕޯޓް ޑިވެލޮޕްމަންޓް ފީ އިސްލާހުކުރުން ފަދަ ފިޔަވަޅުތަކުގެ ތެރެއިން ޓެކްސްގެ އަސާސް ފުޅާކުރުމަށެވެ. 

އަދި ޚާއްޞަކޮށް ފަތުރުވެރިކަމުގެ ދާއިރާ މެދުވެރިކޮށް ބޭރު ފައިސާއިން ލިބޭ އާމްދަނީ އިތުރުކުރުމަށްވެސް ސަރުކާރުން ދަނީ މަސައްކަތް ކުރަމުންނެވެ. 

މި މަސައްކަތްތަކުގެ މަގުސަދަކީ 2026 ވަނަ އަހަރުގެ ނިޔަލަށް ދައްކަންޖެހޭ އެއް ބިލިއަން ޑޮލަރު ހިމެނޭ ގޮތަށް ދައުލަތުގެ ދަރަނީގެ ވާޖިބުތައް އަދާކުރެވޭނެ ގޮތް ހެދުމެވެ.

އެހެންކަމުން، ސަރުކާރުން ޖީއެސްޓީ ބޮޑުކުރަނީއޭ އިދިކޮޅު ފަރާތްތަކުން ބުންޏަސް އެއީ ސީދާ ކަނޑައެޅިގެން ދޮގު ވާހަކަތަކެއްކަން މާލީ ވަޒީރު މިއަދު މިވަނީ ކަށަވަރުކޮށްދެއްވާފައެވެ.