ރައީސް ޑރ. މުއިއްޒު ކެތްތެރިކަމާއެކު ބިނާކުރައްވަމުން އެދަނީ ވަރަށް ރަނގަޅު ދައުލަތެއް ކަމަށާއި، އެމަނިކުފާނުގެ ހުރިހާ ވަގުތެއް ހުސްކޮށްލައްވަނީ ގައުމަށްޓަކައި ކަމަށް އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.
މެމްބަރު ފަލާހު މި މޭރުމުން ވިދާޅުވީ، ޕީއެންސީން އިންތިޒާމުކޮށްގެން އާޓިފިޝަލް ބީޗު ސަރަހައްދުގައި މިރޭ ކުރިއަށް ގެންދާ ޖަލްސާގައި ވާހަކަ ދައްކަވަމުންނެވެ. ރައީސް ޑރ. މުއިއްޒު އެފަދައިން ގައުމަށްޓަކައި ވަގުތު ހުސްކޮށްލެއްވުމުގެ ސަބަބުން އެމަނިކުފާނުގެ އާއިލާއަށް ފަސް މިނެޓުގެ ވަގުތުކޮޅެއްވެސް ނުދެއްވޭނެކަން ޔަގީންވާ ކަމަށް ފަލާހު ވިދާޅުވި އެވެ.
ރައީސް ޑރ. މުއިއްޒު ފަދަ އިހުލާސްތެރި، ތެދުވެރި، އަދި އަމާނަތްތެރި ވެރިއެއްގެ ފަހަތުގައި މަސައްކަތްކުރައްވަން ފުރުސަތު ލިބުނީތީ މާތް ﷲ އަށް ޝުކުރުކުރާ ކަމަށް ފަލާހު ވިދާޅުވި އެވެ. ފަލާހު ވިދާލުވި ގޮތުގައި، ޕީއެންސީގެ ޕާލިމެންޓްރީ ގުރޫޕަކީ މިހާތަނަށް ރާއްޖޭގެ ތާރީހުގައި ސަރުކާރު ހިންގާ ޕާޓީއަށް ރައްޔިތުން އެންމެ ބޮޑު މެޖޯރިޓީއެއް ދިން ޕާލިމެންޓް ކަމަށެވެ.
ފަލާހު ވިދާޅުވި ގޮތުގައި، ރައްޔިތުން ވޯޓުދިނީ ޕީއެންސީއަށް ނިސްބަތްވާ މަޖިލިސް މެމްބަރުންނަށް ނޫން ކަމަށާއި އެހެން ނަމަވެސް، ރައްޔިތުން ވޯޓުދިނީ ރައީސް ޑރ. މުއިއްޒުގެ ސަރުކާރާއި އެމަނިކުފާނުގެ ސިޔާސަތުތައް ކުރިއަރުވައި ދެމެހެއްޓުމަށް ކަމަށެވެ.
"އަޅުގަނޑުމެންގެ މޮޅުކަމަކުން، އަޅުގަނޑުމެންގެ ވަރުގަދަކަމަކުން ނޫން މެމްބަރުން ވޯޓުދިނީ، އެ ސަބަބު އެ ކަން އަޅުގަނޑުމެންގެ ރައީސުލްޖުމްހޫރިއްޔާ ވަރަށް ރަނގަޅަށް ދެނެވަޑައިގަންނަވާ" --- މެމްބަރު ފަލާހު ވިދާޅުވި އެވެ.
ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން އެ ރަށްރަށުގެ ރައްޔިތުން ބޭނުންވާ ތަރައްގީގެ މަޝްރޫއުތައް ރައީސް ފަށްޓަވައިދެއްވައި ރައްޔިތުންނަށް އުންމީދު ގެނެސްދެއްވި ކަމަށް ފަލާހު އިތުރަށް ވިދާޅުވި އެވެ.
