ޕީީއެންސީގެ ޕާލަމަންޓްރީ ގްރޫޕްގެ ލީޑަރު އިބްރާހީމް ފަލާހް އިދިކޮޅު ފަރާތްތަކަށް ވަރަށް ބޮޑަށް ފާޑުވިދާޅުވެއްޖެއެވެ. ސަރުކާރު ހިންގާ ކޯލިޝަނުން ބޭއްވި ޖަލްސާއެއްގައި ވާހަކަދައްކަވަމުން ފަލާހް ވަނީ ކުރީގެ ރައީސް މުޙައްމަދު ނަޝީދާއި ރައީސް ޢަބްދުﷲ ޔާމީންގެ ސަރުކާރުގައި ހިނގާފައިވާ ކަންކަމަށް އަލިއަޅުވާލައްވާފައެވެ.

ޕީއެންސީގެ ހަރުގެ ޖަލްސާގައި ވާހަކަފުޅު ދައްކަވަމުން މިރޭ ފަލާހް ވިދާޅުވީ ރައީސް ނަޝީދުގެ ދެ އަހަރުގެ ވެރިކަން ނިމުނުއިރު، ދައުލަތުގެ ގިނަ ކުންފުނިތަކާއި ހަރުމުދާ ހުރީ ވިއްކާލާފައި ކަމަށެވެ. އެގޮތުން ރާއްޖޭގެ މައި ދޮރާށި ކަމަށްވާ އެއާޕޯޓާއި، ފެން ކުންފުނި (އެމްޑަބްލިޔުއެސްސީ) ފަދަ ބޮޑެތި ކުންފުނިތައް ވިއްކާލި ކަމަށް އޭނާ ތުހުމަތު ކުރެއްވިއެވެ. އަދި ރައީސް ނަޝީދު އިސްތިއުފާ ދެއްވަން ޖެހުނީ ފަނޑިޔާރަކު ވަގަށް ނަގައިގެން ކުރިމަތިވި ފިއްތުންތަކާ ހުރެ ކަމަށްވެސް ފަލާހް ވިދާޅުވިއެވެ.

މިހާރު ކޯޓުތަކުގެ މައްސަލައިގައި އެންމެ ބާރަށް ވާހަކަދައްކަވަނީ ރައީސް ޔާމީން ކަމަށް ފާހަގަކުރައްވައި ފަލާހް ވިދާޅުވީ، އެމަނިކުފާނުގެ ވެރިކަމުގައި މީހުން ޖަލަށްލަމުން ގޮސް އެންމެ ފަހުން އަމިއްލަ ބޭބޭފުޅު (ރައީސް މައުމޫން) ވެސް ޖަލަށް ލެއްވި ކަމަށެވެ. މީގެ އިތުރުން، ރައީސް ޔާމީންގެ ޒަޢާމަތުގައި ނޫސްވެރިކަމަށް އޮތް ހުރަސްތަކަށް އިޝާރާތް ކުރައްވައި، އެމަނިކުފާނު ނޫސްވެރިކަމުގެ މިނިވަންކަމުގެ ވާހަކަ ދައްކަވައިގެން ނުވާނެ ކަމަށް ފަލާހް ވިދާޅުވިއެވެ.

ނޫސްވެރިކަމުގެ ދާއިރާއަށް އަލިއަޅުވާލައްވަމުން ފަލާހް ވިދާޅުވީ، ރާއްޖޭގެ ނޫސްވެރިންނަށް އެންމެ ފަހި ފުރުސަތުތަކާއި ފުރިހަމަ މިނިވަންކަން ކަށަވަރުކޮށްދެއްވީ މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށެވެ.

އިޤްތިޞާދީ ހާލަތާ ގުޅޭގޮތުން ވާހަކަދައްކަވަމުން ފަލާހް ވިދާޅުވީ، މި ސަރުކާރުން ހަވާލުވިއިރު ގައުމުގެ ހުރިހާ ހަރުމުދަލެއް ހުރީ ބޭރުގެ ލޯނުތަކަށް ރަހުނުކޮށްފައި ކަމަށެވެ. ނަމަވެސް ރައީސް މުޢިއްޒުގެ ހަރުދަނާ ސިޔާސަތުގެ ދަށުން، މިހާތަނަށް އެތައް ބިލިއަން ޑޮލަރެއްގެ ދަރަނި ދައްކައި، ގައުމު އިޤްތިޞާދީ ނުރައްކަލުން ސަލާމަތްކޮށްދެއްވާފައިވާ ކަމަށް ފަލާހް ވިދާޅުވިއެވެ.