2008 ވަނަ އަހަރުން ފެށިގެން ދޮގު ހެދުން ތަކުރާރުވުމުގެ ސަބަބުން އެމްޑީޕީއަށް އޮތް ރައްޔިތުންގެ ތާއީދު ވަނީ ގެއްލިފައި ކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ. ފަލާހު މިހެން ވިދާޅުވީ ތިނަދޫ ސިޓީގެ ކެމްޕެއިން ޖަގަހަ މާލޭގައި ހުޅުވުމަށް ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުންނެވެ.
ފަލާހުގެ ވާހަކަފުޅުގައި ކުރިއަށް އޮތް ކައުންސިލް އިންތިހާބާ ގުޅޭގޮތުން ވިދާޅުވީ، އެމްޑީޕީން އިންތިހާބަށް ނިކުންނައިރު އެ ޕާޓީ އޮތީ މިހާރުވެސް ބަލިވެފައި ކަމަށެވެ. އެގޮތުން އިންތިހާބުގެ 1،352 ގޮނޑީގެ ތެރެއިން 450 އަށްވުރެ ގިނަ ގޮނޑިއަށް އެމްޑީޕީން ވާދަނުކުރާކަން ފާހަގަކުރައްވައި، ފަލާހު ވިދާޅުވީ އެއީ މުޅި އިންތިހާބުގެ ގާތްގަނޑަކަށް 30 އިންސައްތަ ގޮނޑި ކަމަށެވެ. މިއީ އެ ޕާޓީގެ ތާއީދު ކުޑަވެފައިވާ މިންވަރު ހާމަވާ ކަމެއްގެ ގޮތުގައި އޭނާ ސިފަކުރެއްވި އެވެ.
ފަލާހު އިތުރަށް ވިދާޅުވީ ރާއްޖޭގައި ޒިންމާދާރު ރަނގަޅު ސިޔާސީ މަސައްކަތް ކުރާ ޕާޓީތައް އޮންނަން ޖެހޭ ކަމަށެވެ. ނަމަވެސް އެމްޑީޕީއަށް މިއަދު ދިމާވެފައިވާ ހާލަތަކީ 2008 ވަނަ އަހަރުން ފެށިގެން ރާއްޖޭގެ އިޖުތިމާއީ ފޭރާމާއި އިގްތިސާދަށް ދީފައިވާ ގެއްލުންތަކުގެ ނަތީޖާ ކަމަށް އޭނާ ވިދާޅުވި އެވެ.
މީގެއިތުރުން، އެމްޑީޕީގެ ސަބަބުން ދައުލަތަށް ލިބުނު ގެއްލުންތަކާއި މުޖުތަމައުގެ ހާލަތު ދަށަށް ގޮސްފައިވާ މިންވަރަކީ އެ ޕާޓީއަށް ރައްޔިތުންގެ އިތުބާރު ގެއްލެން މެދުވެރިވި މައިގަނޑު ސަބަބު ކަމަށްވެސް ފަލާހު ފާހަގަކުރެއްވި އެވެ.
