ދިވެހިރާއްޖޭގެ ސިޔާސީ މައިދާނުގައި ފެނިގެން މިދަނީ ސިޔާސީ މަންފާއަށްޓަކައި އުސޫލުތައް ގުރުބާންކުރާ މަންޒަރެވެ. އެއް ޒަމާނެއްގައި އެއްބަޔަކު އަނެއް ބައެއްގެ ސިޔާސީ އަދި ފިކުރީ ވާދަވެރިންގެ ގޮތުގައި ތިބެ، އެކަކު އަނެކަކަށް ބަހުގެ ހޫނު ހަމަލާތައް ރައްދުކުރި ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި އެމްޑީޕީގެ އިސް ލީޑަރުން މިއަދު މިވަނީ ސިޔާސީ ގޮތުން "އެއް ތަށިން ކާން" ފަށާފައެވެ. މިހާރު ކުރިއަށްދާ، ތިނަދޫ އަލުން އާބާދުވިތާ 60 އަހަރު ފުރުމުގެ މުނާސަބަތުގައި ބާއްވަމުން ގެނަދަވާ ރަސްމިއްޔާތުތަކުން ރައީސް ޔާމީނާއި ރައީސް މުހައްމަދު ނަޝީދު އަދި މާލޭގެ މޭޔަރު އާދަމް އާޒިމް ފަދަ ބޭފުޅުން އެކުގައި ފެނިގެންދިޔުމަކީ، ރައްޔިތުންގެ ސާފު އަގުލަބިއްޔަތުން އިންތިހާބުކޮށްފައިވާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު ހަމަމަގުން ކައްސާލުވުމަށް ހިންގި ސިޔާސީ ޑްރާމާއެކެވެ.
މި ނާކާމިޔާބު އަދި ތަބީއީ ނޫން އިއްތިހާދަކީ މިއަަހރުގެ މެއި މަހު ޔާމީނާއި ނަޝީދު އަދި ކުރީގެ ރައީސް އިބްރާހީމް މުހައްމަދު ސާލިހު އެއް މޭޒުދޮށަކަށް އެއްވެ ރަސްމީކުރި ގުޅުމެކެވެ. މި ގުޅުމުގެ އަސްލަކީ ގައުމީ ވިސްނުމެއް ނޫނެވެ؛ އަމިއްލަ އެދުމާއި ވެރިކަން ގެއްލުމުގެ ހިތާމައިގައި ރައްޔިތުން ނިންމި ސާފު ނިންމުން ބަދަލުކުރުމަށް ކުރާ މަސައްކަތެކެވެ. މި ތިން ރައީސުން ހައްގުތަކުގެ ދިފާއުގައި ކަމަށް ބުނެ އަޑުއުފުލާއިރު، ރައީސް ޑރ. މުއިއްޒުގެ ސަރުކާރުން ދަނީ އިގްތިސާދު ރަނގަޅުކުރުމާއި، ބޯހިޔާވަހިކަމާއި، ދަރަނި މެނޭޖުކުރުމާއި އަދި ގައުމީ ސިޔާދަތު ރައްކާތެރިކުރުމުގައި ފެންނަން ހުރި ބޮޑެތި ކާމިޔާބީތައް ހޯދަމުންނެވެ.
ޔާމީންގެ އަމިއްލަ އެދުމާއި ސިޔާސީ ވަކިވުން
Advertisement
2023 ވަނަ އަހަރުގެ ސެޕްޓެމްބަރު މަހު ބޭއްވި ރިޔާސީ އިންތިހާބުގައި ޑރ. މުހައްމަދު މުއިއްޒު ކާމިޔާބު ހޯއްދެވީ 54 އިންސައްތައިގެ ބޮޑު އަގުލަބިއްޔަތަކުންނެވެ. އަދި 17 ނޮވެމްބަރު 2023 ގައި ވެރިކަމާ ހަވާލުވެވަޑައިގަތީ ގައުމީ މަސްލަހަތާއި ދިވެހިރާއްޖޭގެ މިނިވަންކަން ހިމާޔަތްކުރުމުގެ ވަރުގަދަ ވައުދާއެކުގައެވެ. ނަމަވެސް، ވެރިކަމުގެ ހުވާ ނުކުރައްވަނީސް ރައީސް ޔާމީން ޕީޕީއެމް ދޫކުރެއްވިއެވެ. އަދި ފަހުން ޕީއެންއެފްގެ ނަމުގައި އައު ޕާޓީއެއް އުފެއްދެވިއެވެ. މިއީ އެއްވެސް އުސޫލެއްގެ މައްޗަށް ބިނާވެގެން ނިންމި ނިންމުމެއް ނޫނެވެ؛ ވެރިކަމުގެ ބާރު ހުރިހާ ގޮތަކުން އަމިއްލަ މުށުތެރޭގައި ބޭއްވުމުގެ އެދުން ފުރިހަމަ ނުވުމުން ނިންމި ނިންމުމެކެވެ.
ރައީސް ޑރ. މުއިއްޒު އިސްކުރެއްވީ ވަކި ފަރުދެއްގެ ބާރުގެ ބަދަލުގައި މުޅި ގައުމުގެ މަސްލަހަތެވެ. މީގެ ކުރިން 2024 ވަނަ އަހަރުގެ ނޮވެމްބަރާ ހަމައަށް ވެސް ޔާމީން ވިދާޅުވަމުން ގެންދެވީ ފިކުރީ ތަފާތުތަކާއި އެމްޑީޕީގެ ސަރުކާރުން އެމަނިކުފާނަށް ކުރި އަނިޔާތަކުގެ ސަބަބުން ދުވަހަކުވެސް އެމްޑީޕީއާ ގުޅިވަޑައިނުގަންނަވާނެ ކަމަށެވެ. އެހެންނަމަވެސް، ސިޔާސީ ގޮތުން އެކަހެރިވެ ބާރު ކެނޑުމުން، 2026 މެއި މަހު އެ ވިދާޅުވި ރަތް ރޮނގު ފޮހެލައި، އެމްޑީޕީއާއެކު މަސައްކަތްކުރުމަކީ "ގައުމީ ވާޖިބެއް" ކަމަށް ވިދާޅުވެ އަމިއްލަ ބަސް އަނބުރާ ގެންދެވިއެވެ. މިއަދު ޕީޕީއެމް އުވި، ރައީސް މުއިއްޒުގެ ޒައާމަތުގައި ޕީއެންސީން ވަނީ ސިޔާސީ ހަމަޖެހުމާއި ތަރައްގީ ގާއިމުކޮށްފައެވެ.
ތިނަދޫގެ ސިޔާސީ މަންޒަރާއި ހަގީގަތް
ތިނަދޫގައި ދެއްކި ސިޔާސީ މަންޒަރަކީ ހަމައެކަނި ފޮޓޯއަކަށްޓަކައި ހިންގި ހަރަކާތެކެވެ. މާޒީގައި އެއްބަޔަކު އަނެއް ބަޔަކަށް ހުދުމުހުތާރު ކަމުގެ ތުހުމަތުކުރި ލީޑަރުން މިއަދު އަތުގުޅާލުމުން ހާމަވަނީ އެބޭފުޅުންގެ އިހްލާސްތެރިކަމެއް ނެތް ކަމެވެ. ރައީސް ޑރ. މުއިއްޒު ސިފަކުރެއްވި ފަދައިން، މިއީ "އެކަކު އަނެކަކުގެ ކަރުގައި ހިފައި، އަދި ބުރަކައްޓަށް ވަޅިޖަހަމުންދާ ނާކާމިޔާބު ލީޑަރުންގެ އެއްވުމެކެވެ."
މި ލީޑަރުން ސިޔާސީ ކުޅިވަރު ކުޅެމުންދާއިރު، ރައީސް މުއިއްޒުގެ ސަރުކާރުން ދަނީ ތިނަދޫގެ މަގުހެދުމާއި، ހައުސިންގ ޔުނިޓްތަކާއި، ގޭސް ހަބް ފަދަ އުމްރާނީ ތަރައްގީގެ މުހިންމު މަޝްރޫއުތައް ހުއްޓުމެއްނެތި ކުރިއަށް ގެންދަމުންނެވެ.
ރައްޔިތުންގެ ސާފު އަގުލަބިއްޔަތާއި އިދިކޮޅުގެ ބޭކާރު މަސައްކަތް
2024 ވަނަ އަހަރުގެ އޭޕްރީލް މަހު ބޭއްވި ރައްޔިތުންގެ މަޖިލީހުގެ އިންތިހާބުގައި 93 ގޮނޑީގެ ތެރެއިން 66 ގޮނޑި ކާމިޔާބުކޮށް ޕީއެންސީން ހޯދި ސުޕަރ މެޖޯރިޓީއަކީ ރައީސް މުއިއްޒުގެ ސިޔާސަތުތަކަށް ރައްޔިތުން ދިން ފުރިހަމަ ތާއީދެވެ. އެމްޑީޕީ ވަނީ މަޖިލީހުގެ މަދު ގޮނޑިކޮޅަކަށް ވެއްޓިފައެވެ. މަޖިލިސް މެޖޯރިޓީގެ ސަބަބުން ގައުމަށް ބޭނުންވާ އިސްލާހީ ބަދަލުތައް ގެނައުމުގެ ޖާގަ ސަރުކާރަށް ލިބިފައިވެއެވެ.
ކުރީގެ ތިން ރައީސުން ގުޅިގެން ނެރޭ ބަޔާންތަކާއި، ނޫސްވެރިކަމުގެ މިނިވަންކަމުގެ ނަމުގައި ދައްކާ ވާހަކަތަކަކީ ބުރަދަނެއް ނެތް ވާހަކަތަކެކެވެ. އެބޭފުޅުންގެ ވެރިކަމުގައި ފެނިގެންދިޔަ ކުއްލި ނުރައްކަލުގެ ހާލަތްތަކާއި، ސިޔާސީ ހައްޔަރުކުރުންތަކަކީ ރައްޔިތުން ހަނދާންނެތޭނެ ކަންކަމެއް ނޫނެވެ. ރައީސް މުއިއްޒުގެ ސަރުކާރުގެ އަސާސަކީ އަދުލުއިންސާފާއި، އިސްލާމީ އުސޫލުތަކާއި އަދި ދިވެހި ގައުމިއްޔަތެވެ.
ރައީސް މުއިއްޒުގެ ސަރުކާރުގެ ހަގީގީ ކާމިޔާބީތައް
އިދިކޮޅު ފަރާތްތަކުން ބާވަމުންދާ ސިޔާސީ ކުޅިވަރުތަކާ ދުރަށްޖެހިވަޑައިގެން، ރައީސް ޑރ. މުއިއްޒު ގެންދަވަނީ ނަތީޖާ ނެރެދެއްވަމުންނެވެ. މިގޮތުން ހާސިލުކުރެވުނު މުހިންމު ކަންކަމުގެ ތެރޭގައި:
- ރަސްމީ ރިޒާވް: ދައުލަތުގެ ރަސްމީ ރިޒާވް ވަނީ ތާރީހުގައި ނުދެކޭ މިންވަރަށް، 1.13 ބިލިއަން ޔޫއެސް ޑޮލަރަށް ވުރެ މައްޗަށް ޖައްސާފައެވެ.
- ދަރަނި އަދާކުރުން: ފައިސާ ޗާޕުނުކޮށް، ކުރީގެ ދަރަނިތަކުގެ ތެރެއިން ގާތްގަނޑަކަށް 1 ބިލިއަން ޔޫއެސް ޑޮލަރު ވަނީ ކާމިޔާބުކަމާއެކު ދައްކާ ހަލާސްކޮށްފައެވެ. މީގެ ތެރޭގައި ސުކޫކް ފައިސާ ހިމެނެއެވެ. އަދި ރަހުނުކުރެވިފައިވާ ގައުމީ މުދާތައް ވަނީ އަނބުރާ ދައުލަތަށް ހޯދާފައެވެ.
- ބަޖެޓުގެ ހަމަޖެހުން: 2025 ވަނަ އަހަރުގެ ބަޖެޓަކީ ސަޕްލިމެންޓްރީ ބަޖެޓަކާ ނުލައި ހިންގި، އަދި ޑެފިސިޓް ވަރަށް ބޮޑަށް ކުޑަކޮށް، ބައެއް މަސްމަހު ސާޕްލަސް ރެކޯޑުކުރެވުނު ބަޖެޓެކެވެ.
- ފަތުރުވެރިކަން: 2025 ގައި 2.2 މިލިއަން ފަތުރުވެރިން ރާއްޖެއަށް ޒިޔާރަތްކޮށް، ރެކޯޑު އާމްދަނީއެއް ހޯދާފައިވެއެވެ.
- ތަރައްގީގެ މަޝްރޫއުތައް: ބޯހިޔާވަހިކަމާއި، މަގުހެދުމާއި، މަސްވެރިންނަށް ގަވާއިދުން ފައިސާ ދިނުމާއި، ސިއްހީ ދާއިރާ ތަރައްގީކުރުމާއި، ހުރިހާ ރަށެއްގައި ފެނާއި ނަރުދަމާގެ ނިޒާމު ގާއިމުކުރުމާއި، އެއާޕޯޓުތައް ފުޅާކުރުމާއި، އަދި އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުމުގެ މަސައްކަތްތައް ބާރުދުވެލީގައި ދަނީ ކުރިއަށެވެ. މިއީ ހަމައެކަނި ދައްކާ ހުސް ވާހަކަތަކެއް ނޫނެވެ؛ ހަރުދަނާ ސިޔާސަތުތަކުގެ ދަށުން ނެރެދީފައިވާ ފެންނަންހުރި ހަގީގީ ނަތީޖާތަކެކެވެ.
ރައީސް ޑރ. މުއިއްޒު ތަކުރާރުކޮށް ވިދާޅުވަމުން ގެންދަވަނީ އެމަނިކުފާނުގެ ސަރުކާރު ވަޒަންކުރާނީ ނެރެދޭ ނަތީޖާއިން ކަމަށެވެ. މިއަދު ފެންނަ ތަފާތަކީ ވަރަށް ސާފު ތަފާތެކެވެ. އެއް ފަރާތަކުން ފެންނަނީ އުމްރާނީ ތަރައްގީ ގެނެސްދީ، ގައުމުގެ މާލިއްޔަތު ހަމަމަގަށް އަޅުވައި، ރައްޔިތުންގެ ވޯޓަށް އިހްތިރާމްކޮށްގެން ކުރިއަށްދާ މަންޒަރެވެ. އަނެއް ފަރާތުން ފެންނަނީ މާޒީގެ ބާރުވެރިކަން ހޯދުމުގެ މަގްސަދުގައި އެއްބަޔަކު އަނެއް ބަޔަކާ ގުޅިގެން ސްޓޭޖް ޑްރާމާތައް ކުޅެ، ބަޔާންތައް ނެރެމުންދާ މަންޒަރެވެ.
ރައްޔިތުން އިހްތިޔާރުކުރީ ތަރައްގީ
ރައީސް ޔާމީނާއި އެމްޑީޕީގެ ލީޑަރުން ތިނަދޫގައި އެއް ޕްލެޓްފޯމެއް ހިއްސާކުރުމުން ހަބަރުތަކުގެ ފަލަސުރުހީތަކަށް އަރައި، ސިޔާސީ ބައެއް ސަޕޯޓަރުންގެ މެދުގައި ފޯރި އުފެދިދާނެއެވެ. އެހެންނަމަވެސް، އެއަކުން ދިވެހިރާއްޖޭގެ ހަގީގަތެއް ބަދަލެއް ނުކުރެވޭނެއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ދިވެހި ރައްޔިތުންގެ ސާފު އަގުލަބިއްޔަތުން އިންތިހާބުކޮށް، މަޖިލީހުގެ ސުޕަރ މެޖޯރިޓީއަކުން އިތުބާރު ދީފައިވާ ލީޑަރެކެވެ. ކުރީގެ ރައީސުންގެ އިއްތިހާދަކީ މާޒީގައި ރައްޔިތުންގެ އިތުބާރު ގެއްލިފައިވާ، އަދި ހަމައެކަނި އިދިކޮޅުގައި ތިބުމުގެ ބޭނުމުގައި އެކުލަވާލާފައިވާ ބަލިކަށި ކޯލިޝަނެކެވެ.
ގައުމީ މަސްލަހަތު އެންމެ ބޮޑަށް ހިމެނެނީ މިހާރު ފެށިފައިވާ ބިނާކުރަނިވި މަސައްކަތްތައް ކުރިއަށް ގެންދިއުމުގައެވެ؛ އެއީ އިގްތިސާދު ވަރުގަދަކުރުމާއި، އުމްރާނީ ތަރައްގީ ގެނައުމާއި، ދަރަނި ކުޑަކުރުމާއި، ދިވެހިރާއްޖޭގެ މިނިވަންކަމާއި އިސްލާމީ އުސޫލުތައް ހިމާޔަތްކުރުމެވެ. އެއްއިރު މާރާމާރީ ހިންގައި، އަނެއް އިރު ސިޔާސީ ބޭނުމަށްޓަކައި އެއް ތަށިން ކައިގެން ރައްޔިތުންގެ ނިންމުމާ ދެކޮޅަށް ތެދުވާ ލީޑަރުންގެ ފަހަތުން ދިއުމަކުން ގައުމަށް ލިބޭނެ މޮޅެއް ނެތެވެ. މިއަދު ރައީސް ޑރ. މުއިއްޒުގެ ސަރުކާރުން ނެރެދެމުންދާ އަމަލީ ނަތީޖާތަކުގެ އަޑު، އިދިކޮޅު ލީޑަރުންގެ އަމިއްލަ އެދުމުން ފުރިގެންވާ ހުސް ވާހަކަތަކަށްވުރެ މާ ގަދައެވެ.
