އަސްހާބު ބޭކަލުން ތަރުބިއްޔަތު ކުރައްވާފައި ވަނީ އިސްލާމްކަމާއި، އީމާންކަމާއި އަދި އިހުސާންކަމުގެ މަތީގައި ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދުގެ ހުކުރު ހުތުބާގައި ބުނެފައިވާ ގޮތުގައި، އިސްލާމްކަމާއި، އީމާންކަމާއި އަދި އިހުސާންކަމުގެ މަތީގައި އަސްހާބު ބޭކަލުން ތަރުބިއްޔަތު ކުރައްވާފައިވުމުގެ ސަބަބުން, އެ ބޭކަލުންގެ އަހުލާގާއި، މުއާމަލާތްކުރެއްވުން މާތްވެފައި މަތިވެރި ކަމަށެވެ. އަދި އެ ބޭކަލުންގެ ދެމެދުގައި އޮންނަ ގުޅުން ވަރުގަދަ ކަމަށާއި، އިތުބާރުކުރުން ހަރުދަނާ ކަމަށްވެސް ހުތުބާގައި ބުނެފައިވެ އެވެ.
ހުކުރު ހުތުބާގައި ބުނެފައިވާ ގޮތުގައި، އަސްހާބު ބޭކަލުންގެ ހިތްޕުޅުގައި، އިހުސާންތެރިކަން ހަރުލާފައިވުމުގެ ސަބަބުން އެ ބޭކަލުންގެ މުޖުތަމައުގައި ހަމަޖެހުމާއި އެކުވެރިކަމާއި އުފާވެރިކަން އާންމުވެފައިވާ ކަމަށެވެ. އެހެންނަމަވެސް މިއަދުގެ މުޖުތަމައުގައި ހިނގާ ނޭދެވޭ ކަންތައް ހިނގަނީ އީމާންކަމާއި، އިސްލާމްކަމާއި، އިހުސާންކަމުގެ ބިންގާ ހަރުދަނާ ގޮތެއްގައި، ފަރުދުންގެ ހިތްތަކުގައި ފުރިހަމަ ގޮތުގައި އެޅިފައި ނެތުމުގެ ސަބަބުން ކަމަށް ހުތުބާގައި ވަނީ ބުނެފަ އެވެ.
މިފަދަ ކަންކަން ދިމާވުމަށް މެދުވެރިވާ މައިގަނޑު ސަބަބަކީ މާތްﷲ ބައްލަވާވޮޑިގެންވާކަމާއި، ދެ މަލާއިކަތް ބޭކަލުން ތިމާގެ ގާތުގައި، ތިމާގެ އަމަލުތަކާއި ބުނާ ބަސްތައް ލިޔުއްވަން ތިއްބަކަން ކަށަވަރުވެފައި ނުވާތީ ކަމަށްވެސް ހުތުބާގައި ވަނީ ބުނެފަ އެވެ.
ޅަފަތުއްސުރެ މިފަދަ ކަންކަން ހިތުން ކެހިގެން ނުދާ ފަދަ ގޮތެއްގައި ހަރުލެވިއްޖެ ނަމަ މީސްތަކުންގެ އުޅުންތަކާއި ގުޅުންތަކަށް ހެޔޮ ބަދަލެއް އަންނާނެކަމަށް މިއަދުގެ ހުތުބާގައި ވަނީ އިތުރަށް ބުނެފަ އެވެ.






