މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ "އިންކްލޫސިވް ނޭޝަނަލް އެފޯޑަބަލް ހައުސިން ސްކީމް"ގެ ދަށުން އަޅާ އަގު ހެޔޮ ފްލެޓްތައް އެޅުމަށް ބޭންކް އޮފް މޯލްޑިވްސް (ބީއެމްއެލް) އިން ސަބްސިޑަރީ ކުންފުންޏެއް އުފައްދައިފި އެވެ.

މި ސްކީމުގެ ދަށުން 3،000 ހައުސިން ޔުނިޓް އެޅުމަށް ބީއެމްއެލްއާ ހަވާލުކޮށްފައިވާއިރު އެ މަޝްރޫއު ކުރިއަށްގެންދިއުމަށް ބޭންކުން އުފެއްދި ސަބްސިޑަރީ "ބީއެމްއެލް އެފޯޑެބަލް ހޯމް ލީޒިން ޕްރައިވެޓް ލިމިޑެޓް" އެވެ. މިއީ ބީއެމްއެލްގެ 100 ޕަސެންޓް ހިއްސާ އޮންނަގޮތަށް އުފައްދާފައިވާ ކުންފުންނެވެ.

ބީއެމްއެލްގެ އެފޯޑަބަލް ހޯމް ލީޒިން ޕްރައިވެޓް ލިމިޑެޓާ ހަވާލުކޮށްގެން އަޅާ މި 3،000 ޔުނިޓް އެޅުމަށް ބޭނުންވާ ބިން ހަވާލުކުރުމަށް މިއަދު ބީއެމްއެލްގެ ހެޑްއޮފީހުގައި ވަނީ ހާއްސަ ރަސްމިއްޔާތެއްވެސް ބާއްވާފަ އެވެ. މިކަމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބްއެވެ. އަދި ބީއެމްއެލްގެ ފަރާތުން ސޮއިކުރެއްވީ އެފޯޑަބަލް ހޯމް ލީޒިން ޕްރައިވެޓް ލިމިޑެޓުގެ މެނޭޖިން ޑިރެކްޓަރު ހަސަން ޝާމް އެވެ.

އެ ރަސްމިއްޔާތުގައު ވާހަކަދައްކަމުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، މި ސްކީމްގައި ރާއްޖޭގެ ހުރިހާ ބޭންކުތަކުން ބައިވެރިވުމަށް ލާޒިމުކުރާއިރު، ގައުމީ ބޭންކުގެ ހައިސިއްޔަތުން މިކަމުގައި ޒިންމާދާރުކަމާއެކު އިސްނަގަންޖެހޭކަން ދެކޭކަމަށެވެ. އެހެންކަމުން މަސައްކަތްތައް ހަލުވިކޮށް، އެމްއެމްއޭގެ ހުއްދައާއެކު މިކަމަށް ހާއްސަ ސަބްސިޑަރީ ކުންފުންޏެއް އުފައްދަން ނިންމީކަމަށް ވިދާޅުވި އެެވެ.

ބީއެމްއެލް އެފޯޑެބަލް ހޯމް ލީޒިން ޕްރައިވެޓް ލިމިޑެޓް އިން ފްލެޓުތައް އަޅާނީ ވިލިމާލެ އަދި ހުޅުމާލޭގަ އެވެ. އެއީ ވިލިމާލޭގައި 300 ހައުސިން ޔުނިޓް އަދި ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހީގައި 2،700 ހައުސިން ޔުނިޓެވެ.