މަކަރާއި ހީލަތް ހަދައި ބޮޑެތި ކޮރަޕްޝަން ހިންގާފައިވާ ބޮޑުވަޒީރު ބެންޖަމިން ނަތަންޔާހޫ އާއި ދެކޮޅަށް އިސްރާއީލު ދައުލަތުން ކުރަމުންދާ ދަޢުވާ ތަކާއި ގުޅިގެން 10 އަހަރަށް އޭނާ ޖަލަށް ދާން ޖެހިދާނެ ކަމުގެ ބިރު އޮތުމުން، ނަތަންޔާހޫ އަށް މަޢާފް ކޮށްދިނުމަށް އެދި އެމެރިކާގެ ރައީސް ޑޮނަލްޑް ޓްރަމްޕް އިސްރާއީލުގެ ރައީސް އައިސާކް ހަރްޒޮގަށް އިއްޔެ ސިޓީއެއް ފޮނުވައިފިއެވެ.
2020 ވަނަ އަހަރުގެ މެއި މަހުން ފެށިގެން ބެންޖަމިން ނަތަންޔާހޫގެ ކޮރަޕްޝަންގެ ތިންމައްސަލައެއް ބަލަމުން ދެއެވެ. މިއީ ގާތްގަނޑަކަށް 700 މިލިއަން އެމެރިކާ ޑޮލަރުގެ މަކަރާއި ހީލަތާއި ޚިޔާނާތުގެ ކުށްތަކެވެ. މީގެތެރެއިން ފުރަތަމަ މައްސަލަ އަކީ (ކޭސް 1000) މުއްސަނދި ވިޔަފާރިވެރިންގެ އަތުން އޭނާ އާއި އޭނާގެ ޢާއިލާއަށް ގާތްގަނޑަކަށް 200،000 އެމެރިކާ ޑޮލަރުގެ އަގުހުރި ލަގްޒަރީ ހަދިޔާތަކެއް ލިބިފައިވާ މައްސަލައެވެ. ދެވަނަ މައްސަލަ އަކީ (ކޭސް 4000) ގާތްގަނޑަކަށް 500 މިލިއަން އެމެރިކާ ޑޮލަރުގެ މައްސަލައެކެވެ. ތިންވަނަ މައްސަލަ އަކީ (ކޭސް 2000) މީޑިއާ އަކާއި ސިއްރުން ޑީލެއް ހަދާފައިވާ މައްސަލައެކެވެ.
ނަތަންޔާހޫ އާއި ދެކޮޅަށް ހިންގަމުން ގެންދާ 700 މިލިއަން ޑޮލަރަށްވުރެ ބޮޑު ޚިޔާނާތުގެ މައްސަލަތައް ކުރިޔަށް ނުގެންދިޔުމަށް އެދުމުގެ ބާރު އިސްރާއީލުގެ ރައީސަށް ލިބިގެންވެއެވެ. އެހެންކަމުން ޓްރަމް ބޭނުންވީ ޔަހޫދީންގެ ރައީސަށް ޤާނޫނީ ގޮތުން ލިބިދޭ ބާރުގެ ބޭނުން ކޮށްގެން ނަތަންޔާުހޫ އާއި ދެކޮޅަށް ހިންގަމުން ގެންދާ ހުރިހާ ޝަރީޢަތެއް އެއީ ސިޔާސީ ދަޢުވާތަކެއް ކަމަށް ކަނޑައަޅައި ނަތަންޔާހޫ އަށް މަޢާފް ދެއްވުމެވެ.
ޓްރަމްޕްގެ ސިޓީގައި އިސްރާއީލުގެ ލީޑަރަށް ތައުރީފު ކުރަމުން، ނަތަންޔާހޫ އަކީ ހަނގުރާމައިގެ ވަގުތުގަ އާއި ބިރުވެރި ވަގުތުގައި ނަތީޖާ ނެރެދޭ އަދި އިސްރާއީލް ޞުލްޙަވެރިކަމުގެ މަގަށް ގެންގޮސްދޭ ލީޑަރެއް ކަމަށް ވެސް ބުނެފައި ވެއެވެ.
