ހެޔޮ ވެރިއެއްގެ ކިބައިގައި އަމާނާތްތެރިކަމާއި އަދުލުވެރިކަން ގާއިމުކުރުމުގެ ގާބިލުކަން ހުންނަންވާނެ ކަމަށް ހެރިޓޭޖް މިނިސްޓަރު އާދަމް ނަސީރު އިބްރާހިމް ވިދާޅުވެއްޖެ އެވެ.

މިނިސްޓަރު ނަސީރު މި މޭރުމުން ވިދާޅުވީ، ޖުމްހޫރީ ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ. ދީނީ އަހުލާގަށް އިސްކަންދިނުމާއި، ރައްޔިތުންގެ ހިޔާލާއި މަޝްވަރާއަށް އިސްކަން ދިނުމަކީ ރަނގަޅު ވެރިއެއްގެ ކިބައިގައި ހުންނާނެ ސިފަތަކެއްކަން ފާހަގަކުރައްވަމުން ރައީސް ވިދާޅުވީ، މިފަދަ ހަރުދަނާ ވެރިކަމުގެ ނިޒާމެއް ގާއިމުކުރުމަށް ރައީސް ޑރ. މުއިއްޒު މަސައްކަތް ކުރައްވަމުން ގެންދަވާ ކަމަށެވެ.

ރަސްކަމަކުން ޖުމްހޫރިއްޔަތަކަށް ރާއްޖޭގެ ވެރިކަމުގެ ނިޒާމު ބަދަލުވުމުގެ އެންމެ މުހިންމު މަގުސަދަކީ ރައްޔިތުންނަށް ލާބަޔާ މަންފާ ހުރި ގޮތްތައް ގެނައުންކަން ފާހަގަކުރައްވައި މިނިސްޓަރު ނަސީރު ވިދާޅުވީ، ރައްޔިތުން އިންތިހާބުކުރާ ވެރިން ރައްޔިތުންނަށް އަމާނަތްތެރިކަމާއެކު ވެރިކަންކޮށްދޭން ޖެހޭނެ ކަމަށެވެ.

ހެޔޮ ވެރިއެއްގެ ކިބައިގައި ހުންނާނެ ސިފަތަކުގެ މައްޗަށް އަލިއަޅުއްވާލައްވަމުން މިނިސްޓަރު ވިދާޅުވީ ދީނީ ގޮތުން ރަނގަޅު ގޮތާއި ރަނގަޅު ނޫން ގޮތް ދެނެގަތުމުގެ ގާބިލުކަމާއި ރައްޔިތުންގެ ހާލު ދެނެގަތުމުގެ ގާބިލުކަން ރައްޔިތުން އިންތިހާބުކުރާ ވެރިންގެ ކިބައިގައި ހުންނަންޖެހޭނެ ކަމަށެވެ.

މިނިސްޓަރު ނަސީރު އިތުރަށް ވިދާޅުވީ، އަދުލުވެރިކަން ގާއިމުކޮށް، ދުރު ރާސްތާއަށް ސިޔާސަތު ބައްޓަންކުރާނީ ހަރުދަނާ ވެރިއެއް ކަމަށާއި އެފަދަ ސިފަތައް މި ވެރިކަމުގައި ފެންނަމުންދާ ކަމަށެވެ.