ދިވެހިރާއްޖޭގެ ތަރައްގީއަށް ޓަކައި އަބަދުވެސް މަސައްކަތްކުރާ އަދި ރާއްޖޭގެ ކުރިއެރުމަށް އަބަދުވެސް ދެމިތިބޭ ބަޔަކީ އަވައްޓެރި އިންޑިއާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ. ރައީސް މިފަދައިން ވިދާޅުވެފައިވަނީ އިންޑިއާގެ ބޮޑުވަޒީރުގެ ހާއްސަ މަންދޫބު އަދި ސިވިލް އޭވިއޭޝަން މިނިސްޓަރު ކިންޖަރަޕޫ ރާމް މޯހަން ނައިޑޫ، ރައީސް އަރިހަށް މިއަދު ހެނދުނުގެ ވަގުތެއްގައު ކުރެއްވި އިހުތިރާމުގެ ޒިޔާރަތުގަ އެވެ.

ރައީސް އޮފީހުގައި ބޭއްވުނު މި ބައްދަލުވުމުގައި، މިނިސްޓަރު ނައިޑޫއަށް މަރުހަބާ ވިދާޅުވަމުން ރައީސް ވަނީ އިންޑިއާގެ ބޮޑުވަޒީރު ނަރެންދުރަ މޯދީއަށާއި އެ ގައުމުގެ ސަރުކާރަށް، ދިވެހިރާއްޖޭގެ އިޖުތިމާއީ އަދި އިގްތިސާދީ ތަރައްގީއަށް ދިގު މުއްދަތެއްގައި ދެމުން އަންނަ ދީލަތި އެހީތެރިކަމަށް ޝުކުރު އަދާކުރައްވާފަ އެވެ. ހާއްސަ ގޮތެއްގައި، ހަނިމާދޫ ބައިނަލްއަގުވާމީ ވައިގެ ބަނދަރު ވަގުތަށް ހުޅުވުމަށް އިންޑިއާގެ އެހީތެރިކަން ލިބުނުކަން ފާހަގަކުރައްވައި، އެކަމުގެ ސަބަބުން ތަރައްގީ އާއި ބައިނަލްއަގުވާމީ ގުޅުން އިތުރަށް ބަދަހިވެފައިވާ ކަމަށް ރައީސް ފާހަގަކުރައްވާފައިވެ އެވެ.

ރައީސް އިތުރަށް ވިދާޅުވީ، އިންޑިއާއަކީ ދިވެހިރާއްޖޭގެ ތަރައްގީގެ އެޖެންޑާގައި އަބަދުވެސް ދެމިތިބޭ ބައިވެރިއެއް ކަމަށާއި، ކުރިއަށްދާ ތަރައްގީގެ މަޝްރޫއުތައް ލަސްވުމެއްނެތި ނިންމައި އަމަލީ ބަޔަކަށް ހެދުމަށް ދެ ގައުމުގެ މެދުގައި އެއްބާރުލުން ދެމި އޮންނާނެ ކަމަށް ޔަގީންކުރައްވާ ކަމަށެވެ.

މި ބައްދަލުވުމުގައި ސިވިލް އޭވިއޭޝަން މިނިސްޓަރު ނައިޑޫ ވަނީ ހަނިމާދޫ ބައިނަލްއަގުވާމީ ވައިގެ ބަނދަރު ހުޅުވުމުގެ ތާރީހީ މުނާސަބަތުގައި ދިވެހި ސަރުކާރަށް މަރުހަބާ ވިދާޅުވެފައެވެ. އަދި ބޮޑުވަޒީރު މޯދީއާއި ރައީސް ޑރ. މުއިއްޒު ދެބޭފުޅުން ވެސް "ހިންދު ކަނޑުގެ" ސަރަހައްދު ތަރައްގީކުރުމަށް ވަރަށް ބޮޑަށް އަޒުމް ކަނޑައަޅުއްވާފައިވާ ކަމަށް ނައިޑޫ ވިދާޅުވެފައިވެ އެވެ.

އިންޑިއާއިން ދިވެހިރާއްޖެއަށް ދެމުން އަންނަ އެހީތެރިކަން ކުރިއަށް އޮތް ތަނުގައިވެސް ދެމި އޮންނާނެ ކަމުގެ ޔަގީންކަން ދެއްވަމުން، މިހާރު ފަށާފައިވާ މަޝްރޫއުތައް ރާވާފައިވާ ގޮތަށް ނިންމަވައިދެއްވާނެ ކަމުގެ ޔަގީންކަން މިނިސްޓަރު ވަނީ ދެއްވާފަ އެވެ.

މި ބައްދަލުވުން ނިންމަވާލައްވަމުން ރައީސް އާއި ނައިޑޫ ވަނީ، ދެ ގައުމުގެ ގުޅުން އިތުރަށް ބަދަހިކޮށް، ދެގައުމަށް ވެސް ފައިދާހުރި ނަތީޖާތަކެއް ނެރެދޭނެ މަސައްކަތްތައް ކުރިއެރުވުމަށް އެއްވެސް ފަސްޖެހުމެއްނެތި ކަށަވަރުކޮށްދެއްވާފަ އެވެ.