މޯލްޑިވްސް 2.0 ގެ ދަށުން މޯލްޑިވްސް އިމިގްރޭޝަންގެ ހިދުމަތްތައް ޑިޖިޓަލައިޒްކޮށް ރަސްމީކޮށް މިއަދު އިފުތިތާހުކޮށްފިއެވެ.

ބާސެލޯ ނަސަންދުރައިގައި މިއަދު ބޭއްވި ރަސްމިއްޔާތެއްގައި އިމިގްރޭޝަންގެ ހިދުމަތްތައް ޑިޖިޓަލައިޒްކޮށް، ރަސްމީކޮށް އިފުތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އެ ރަސްމިއްޔާތުގައި ފިނޭންސް މިނިސްޓަރު މޫސާ ޒަމީރު، ފޮރިން މިނިސްޓަރު އަބްދުﷲ ހަލީލް، ހޯމް މިނިސްޓަރު އަލީ އިހުސާން، އިމިގްރޭޝަންގެ ކޮންޓްރޯލާ ކޮމިޝަނާ އޮފް ޕޮލިސް (ރިޓަޔާޑް) އަހުމަދު ފަސީހު އަދި އިމިގްރޭޝަންގެ އިސްވެރިންނާއި މުވައްޒަފުން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ރައީސް މުއިއްޒު ވަނީ އިމިގްރޭޝަނުން އަލަށް ތައާރަފުކުރި "އީ-ވިޒާ" ވެސް ރަސްމީކޮށް އިފުތިތާހުކޮށްދެއްވައިފައެވެ. އޭގެ ސަބަބުން ފިޒިކަލް ޕާސްޕޯޓް ހިފައިގެން ވިސާ ޖަހަން އިމިގްރޭޝަަނަށް ދާން އުފުލި ބުރައަށް ނިމުން އައިސް ރާއްޖޭގައި އުޅޭ ބިދޭސީންގެ ކަންތައްތައް ބަލަން ފަސޭހަކޮށްދޭނެ އެވެ.

ރާއްޖެ ޑިޖިޓަލައިޒްކުރަން ސަރުކާރުން ކުރިއަށް ގެންދާ "މޯލްޑިވްސް 2.0" ސިޔާސަތުގެ ދަށުން އިމިގްރޭޝަންގެ ހިދުމަތްތައް ޑިޖިޓަލައިޒްކޮށް، އެ ހިދުމައްތައް އިފްތިތާހުކުރަން މިއަދު ބޭއްވި ރަސްމިއްޔާތު ހޯމްލޭންޑް މިނިސްޓަރު އަލީ އިހުސާން ވިދާޅުވީ ރައީސްގެ އެ ސިޔާސަތާ އެެއްގޮތަށް 100 ޕަސެންޓް ޑިޖިޓަލައިޒް ކުރި ފުރަތަމަ މުއައްސަސާއަކީ މޯލްޑިވްސް އިމިގްރޭޝަން ކަމަށެވެ. އެއީ ރައީސްގެ އެ ސިޔާސަތު މޯލްޑިވްސް އިމިގްރޭޝަނުން ބަލައިގަނެ، އެ ކަން ތަންފީޒުކުރަން ދޭ އަހަންމިއްޔަތު ދައްކައިދޭ ކަމެއްގެ ގޮތުގައި އޭނާ ފާހަގަކުރެއްވި އެވެ.

މި ރަސްމިއްޔާތުގައި ފަސީހު ވަނީ އިމިގްރޭޝަންގެ އާ މޯބައިލް އެޕްލިކޭޝަން އިފުތިތާހުކޮށްދެއްވައިފައެވެ. އެ އެޕްލިކޭޝަން މެދުވެރިކޮށް އިމިގްރޭޝަންގެ ހުރިހާ ހިދުމަތްތަކެއް ލިބެން ހުންނާނެއެވެ.

އިހުސާން ވަނީ އިމިގްރޭޝަންގެ ފޭޝަލް ރިކޮގްނިޝަން އެޕްލިކޭޝަން "އެމް އައިޑީ ޗެކާ" އެ ރަސްމިއްޔާތުގައި އިފުތިތާހުކޮށްދެއްވައިފައެވެ. އެ އެޕްލިކޭޝަނަކީ ރާއްޖޭގައި ގަވައިދާހިލާފަށް އުޅެމުންދާ ބިދޭސީންގެ މައްސަލަ ހައްލުކުރުމުގެ ގޮތުން ތައާރަފުކުރި އެޕްލިކޭޝަނެކެވެ.