އަންނަ އަހަރު ސައުދި އަރަބިއްޔާގައި އޮންނަ އޭއެފްސީ 17 އަހަރުން ދަށުގެ އޭޝިއަން ކަޕުގެ ކޮލިފައިން މެޗުތަކަށް ތައްޔާރު ވަމުންދާ ފަލަސްތީނުގެ 17 އަހަރުން ދަށުގެ ގައުމީ ފުޓްބޯޅަ ޓީމުގެ ޓްރެއިނިން ކޭމްޕެއްގައި ބައިވެރިވުމަށްޓަކައި ދިވެހިރާއްޖެއަށް އަތުވެއްޖެ އެވެ. ނިރުބަވެރި އިސްރާއީލުން ފަލަސްތީނުގެ ޣައްޒާގައި ހިންގަމުންދާ ގަތުލުއާންމުގެ ހާލަތުގައި، ފަލަސްތީނުގެ މި ޓީމަށް ރާއްޖެއިން ވަނީ ވަރަށް ހޫނު މަރުހަބާއެއް ކިޔާފަ އެވެ.

ފަލަސްތީނުގެ ޓީމު ރާއްޖެ އައުމާއެކު ރަތް ފިނިފެންމަލުގެ މަރުހަބާއެއް ރާއްޖެއިން ވަނީ ކިޔައިފަ އެވެ. މި މަރުހަބާ ކިޔުމުގައި ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިއު އާއި ރާއްޖޭގެ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް، އަހުމަދު ތާރިގު (ޓޮމް) އާއި އެ އެސޯސިއޭޝަންގެ އިސްވެރިން ވަނީ ބައިވެރިވެފަ އެވެ.

ފަލަސްތީނުގެ ފުޓްބޯޅަ އެސޯސިއޭޝަން (ޕީއެފްއޭ) އިން އެފްއޭއެމްގައި އެދިފައިވަނީ، އޭއެފްސީ އެޝިއަން ކަޕުގައި 17 އަހަރުން ދަށުގައި ވާދަކުރާ ފަލަސްތީނުގެ ގައުމީ ޓީމުގެ ތަމްރީނު ކޭމްޕެއް ރާއްޖޭގައި ބާއްވައި ދިނުމަށެވެ. އެފްއޭއެމް އިން މިކަމުގައި ސަރުކާރުގެ އެހީތެރިކަމަށް އެދުމުން، ސްޕޯޓްސް މިނިސްޓްރީގެ އިސްވެރިން ބޭއްވި މަޝްވަރާ ބައްދަލުވުމަކުން ވަނީ ފަލަސްތީނުގެ ޓީމު ރާއްޖޭގައި ކޭމްޕުކުރުމުގެ ފުރުސަތު ދޭން ނިންމާފަ އެވެ.

މި ދަތުރުގައި ފަލަސްތީނުގެ ޓީމުން ރާއްޖޭގެ 18 އަހަރުން ދަށުގެ ގައުމީ ޓީމާއެކު އެކުވެރިކަމުގެ ދެ މެޗު ކުޅުމަށް ހަމަޖެހިފައިވެ އެވެ. މި މެޗްތައް ކުޅޭނީ ނޮވެމްބަރު 13 އަދި 15 ގައި ގަލޮޅު ރަސްމީ ދަނޑުގައި، ރޭގަނޑު 9:00 ގައެވެ.

ފަލަސްތީނުގެ ފުޓްބޯޅަ ޓީމަށް އެހީތެރިވުމުގެ ގޮތުން، ރާއްޖެ އާއި ފަލަސްތީނު ބައްދަލުކުރާ މި ދެ މެޗުގައި ސުވެނިއާ ޓިކެޓް ވިއްކުމަށް ވަނީ ހަމަޖެހިފައެވެ. މިގޮތުން ކޮންމެ މެޗެއްގައި ވެސް 50 ސްވެނިއާ ޕްލެޓިނަމް ޓިކެޓް (1000 ރުފިޔާ، ވީއައިޕީ ރެސްޓްރޫމް) އަދި 200 ސުވެނިއާ ގޯލްޑް ޓިކެޓް (500 ރުފިޔާ، ވީއައިޕީ ގޮނޑި) ވިއްކާނެ އެވެ. ޓިކެޓް ވިއްކައިގެން ލިބޭ ފައިސާ ފަލަސްތީނުގެ ފުޓްބޯޅަ ޓީމަށް ހަދިޔާ ކުރަން ނިންމާފައިވާކަމަށް އެފްއޭމްއިން ބުނެފައިވެ އެވެ.

ރާއްޖޭގައި ޓްރެއިނިން ކޭމްޕު ނިންމުމަށް ފަހު ފަލަސްތީނުގެ ޓީމު މި މަހުގެ 19 ވަނަ ދުވަހު ދާނީ ކޮލިފައިން މެޗްތައް ކުޅުމަށް އިންޑިއާއަށެވެ.

ރާއްޖޭގެ 17 އަހަރުން ދަށުގެ ގައުމީ ޓީމްގެ ކޮލިފައިން މެޗްތައް ކުޅޭނީ މި މަހުގެ 22 އިން 30 އަށް ތައިލެންޑުގައި އެ ގައުމާއި، ތުރުކިސްތާނާއި، ކުވައިތާއެކު އެވެ.