އިންޑިއާގެ ބޮޑު ވަޒީރު ނަރެންދުރަ މޯދީގެ ހާއްސަ މަންދޫބެއްގެ ހައިސިއްޔަތުން ރާއްޖެއަށް ކުރައްވަމުން ގެންދަވާ ދަތުރުފުޅެއްގައި އެގައުމުގެ ސިވިލް އޭވިއޭޝަން މިނިސްޓަރު ކިންޖަރަޕު ރާމް މޯހަން ނައިޑޫ، ރާއްޖޭގެ ހާރިޖީ ވަޒީރު ޑރ. އަބްދުﷲ ހަލީލްއާ މިއަދު ބައްދަލުކުރައްވައި، ދެ ގައުމުގެ ދެމެދުގައި އޮތް ގުޅުންތައް އިތުރަށް ބަދަހިކުރުމާ ގުޅޭގޮތުން މަޝްވަރާކޮށްފި އެވެ. މި ބައްދަލުކުރެއްވުން ބޭއްވުނީ ހާރިޖީ ވުޒާރާގަ އެވެ.

މި ދަތުރުފުޅަކީ، ހަނިމާދޫގައި މިރޭ ބޭއްވުމަށް ހަމަޖެހިފައިވާ ހަނިމާދޫ އިންޓަނޭޝަނަލް އެއާޕޯޓް ހުޅުވުމުގެ ހާއްސަ ރަސްމިއްޔާތުގައި ބައިވެވެވަޑައިގަތުމަށްޓަކައި އިންޑިއާގެ މިނިސްޓަރު ކުރައްވަމުން ގެންދަވާ ދަތުރުފުޅެކެވެ. ހަނިމާދޫ އެއާޕޯޓް ތަރައްގީކޮށްފައިވަނީ އިންޑިއާ ސަރުކާރުގެ ލައިން އޮފް ކްރެޑިޓް އެހީގެ ދަށުންނެވެ.

އިންޑިއާގެ ސިވިލް އޭވިއޭޝަން މިނިސްޓަރުގެ އަރިހުގައި އިންޑިއާގެ ސިވިލް އޭވިއޭޝަން ދާއިރާގެ ވަފުދެއްވެސް ރާއްޖެއަށް ވަޑައިގެންފައިވެ އެވެ.

ރާއްޖޭގައި ހުންނަ އިންޑިއާ ހައި ކޮމިޝަނުން ވިދާޅުވީ، މި ދަތުރުފުޅުގެ ތެރެއިން މިއަދު ވަޒީރު ޑރ. ހަލީލާއި ބައްދަލުކުރައްވައި، ރާއްޖެ އާއި އިންޑިއާގެ ދެމެދުގައި އޮތް ގާތް ގުޅުން ބަދަހި ކުރުމާއި ގުޅޭގޮތުން މަޝްވަރާ ކުރެއްވި ކަމަށެވެ. މި މަޝްވަރާތަކުގައި ދެގައުމުގެ ދެމެދުގައިވާ ދިގު ތާރީހީ ގުޅުމާއި، އެ ގުޅުން ދެމެހެއްޓުމާއި އިތުރަށް ބަދަހިކުރުމުގެ މުހިންމުކަމަށް އަލިއަޅުވާލާފައިވެ އެވެ.