ބޮލީވުޑްގެ މަޝްހޫރު ބަތަލާ ކެޓްރީނާ ކައިފް އާއި ވިކީ ކައުޝަލްއަށް ފިރިހެން ދަރިއަކު ލިބުމާ ގުޅިގެން، ރާއްޖޭގެ ފަތުރުވެރިކަން އިޝްތިހާރު ކުރުމުގެ އެންމެ އިސް މުއައްސަސާ، ވިޒިޓް މޯލްޑިވްސް އިން ދެމަފިރިންނަށް މަރުހަބާ ކިޔައިފި އެވެ.
ވިޒިޓް މޯލްޑިވްސް އިން މި މަރުހަބާ ދެމަފިރިންނަށް ކިއާފައިވަނީ މީސް މީޑިއާގައި ކުރި ހާއްސަ ޕޯސްޓެއްގަ އެވެ. ކެޓްރީނާ އަކީ ވިޒިޓް މޯލްޑިވްސް ކޯޕަރޭޝަންގެ ގްލޯބަލް އެމްބެސެޑަރު ވެސް މެއެވެ.
ކެޓްރީނާ އަށް ދަރިއަކު ލިބުނުކަން އިއުލާންކޮށްފައި ވަނީ މި މަހުގެ ހަތްވަނަ ދުވަހު ހެނދުނު އިންސްޓަގްރާމްގައި ކުރި ޕޯސްޓެއްގައެވެ. ވިކީ، ކެޓްރީނާ ޓެގްކޮށް އިންސްޓަގްރާމް ކުރި ޕޯސްޓެއްގައި ބުނީ، "އަޅުގަނޑުމެންގެ އުފާވެރިކަން ދުނިޔެއަށް އަތުވެއްޖެ، ވަރަށް ލޯތްބާއި ޝުކުރުވެރިކަމާއެކު، އަޅުގަނޑުމެންގެ ފިރިހެން ދަރިފުޅަށް މަރުހަބާ ކިޔަން،" ކަމަށެވެ.
ބޮލީވުޑްގެ މި މަޝްހޫރު ދެ ތަރިން އެންމެ ފުރަތަމަ ދިމާވެފައިވަނީ 2019 ވަނަ އަހަރު ބޭއްވި ޝޯއެއްގެ ތެރެއިންނެވެ. އެ ޝޯގައި ވިކީ މަޖަލަކަށް ހަދާ ކެޓްރީނާ ކައިފް އާއި ކައިވެނި ކުރަން ހުށަހެޅިކަން ފާހަގަކުރެވެ އެވެ.
މި ދެ ތަރިން ގުޅިގެން އުޅޭ ކަން އެތައް ދުވަހެއް ވަންދެން ސިއްރު ކުރެވިފައި ވީނަމަވެސް، އާއިލީ އެއްވުންތަކުގަ އާއި ދެމީހުން އެކަނިވެސް އެކި ތަންތަނުން ފެނިގެން ގޮސްފައިވެ އެވެ. ލޯބީގެ ގޮތުން ގުޅިގެން އުޅޭކަން 2021 ވަނަ އަހަރު ރަސްމީކޮށް އިއުލާން ކުރުމަށްފަހު، އެ އަހަރުގެ ޑިސެމްބަރު މަހުގެ ނުވަ ވަނަ ދުވަހު އާއިލާއާއި ގާތް ރައްޓެހިންނަށް ދައުވަތު ދީފައިވާ ބޮޑު ހަފްލާއެއްގެ ތެރެއިން މި ދެތަރިން ކައިވެނި ކޮށްފައިވެ އެވެ.
