ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމަށްފަހު، ކުލަގަދަ ހަފްލާއަކާއެކު މިރޭ ހުޅުވުމަށް ނިންމައިފި އެވެ.

ހަނިމާދޫ އެއާޕޯޓުގައި ބާއްވާ މި ހަފްލާ ޝަރަފްވެރިކޮށްދެއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި އަނބިކަނބަލުން ސާޖިދާ މުހައްމަދު އެވެ.

މި ހަފްލާގައި އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ މަންދޫބު، އިންޑިއާގެ ސިވިލް އޭވިއޭޝަން މިނިސްޓަރު ކިންޖަރަޕޫ ރާމް މޯހަން ނައިޑޫ އާއި ސަރުކާރުގެ ވެރިންނާއި އެމްއޭސީއެލްގެ ވެރިން ބައިވެރިވެވަޑައިގަތުމަށް ވަނީ ހަމަޖެހިފަ އެވެ. މީގެ އިތުރުން އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ ބަލަސުބްރަމާނިއަން ވެސް މި ހަފްލާގައި ބައިވެރިވެވަޑައިގަތުމަށް ހަމަޖެހިފައިވެ އެވެ.

މިރޭގެ ހަފްލާގައި ސަގާފީ ހުށަހެޅުންތައް ހުށަހެޅުމަށް ހަމަޖެހިފައިވާއިރު ހަވާ އެރުވުމަށްވެސް ހަމަޖެހިފައިވެ އެވެ.

ހަނިމާދޫ އެއާޕޯޓު ތަރައްގީ ކުރެވި އަލުން އޮޕަރޭޓުކުރަން ފަށާފައިވާއިރު އެއާބަސް A320 އާއި ބޯއިން 737 މަރުކާގެ ބޯޓުފަހަރަށް ހަނިމާދޫ އެއާޕޯޓުން ހިދުމަތް ދެވިގެންދާނެ އެވެ. ހަނިމާދޫ އެއާޕޯޓަކީ އަހަރަކު 1.3 މިލިއަން ފަތުރުވެރިންނަށް ހިދުމަތް ދެވޭ ފެންވަރުގެ އެއާޕޯޓެކެވެ.

ހަނިމާދޫ އެއާޕޯޓުގެ މަސައްކަތް ހަވާލުކޮށްފައިވަނީ އިންޑިއާގެ ޖޭއެމްސީއަށެވެ. މި މަޝްރޫއުގެ އަމަލީ މަސައްކަތް ފަށާފައިވަނީ 2023 ވަނަ އަހަރުގެ ޖެނުއަރީ މަހުގެ ތެރޭގަ އެވެ. މިއީ 136.6 މިލިއަން ޑޮލަރުގެ މަޝްރޫއެއްކަން ފާހަގަކޮށްލަންޖެހެ އެވެ.