ރާއްޖޭގެ އެއްވެސް އެއާޕޯޓެއް ހިންގަން ބޭރުގެ ބަޔަކަށް ނުދޭނެ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު އަމީން މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގަ އެވެ. ރާއްޖޭގެ ހުރިހާ އެއާޕޯޓުތަކެއް، އޭގެތެރޭގައި އިންޓަނޭޝަނަލް އެއާޕޯޓުތަކާއި ޑޮމިސްޓިކް އެއާޕޯޓްތައް ހިންގަނީ ސިވިލް އޭވިއޭޝަން އޮތޯރިޓީ (ސީއޭއޭ)އިން ހުއްދަދީފައިވާ ރާއްޖޭގެ އޮޕަރޭޓަރުން ކަމަށް މިނިސްޓަރު އަމީން އެކްސްގައި ހިއްސާކުރެއްވި ޕޯސްޓުގައި ވަނީ ވިދާޅުވެފަ އެވެ.

މިނިސްޓަރު މި މޭރުމުން ވިދާޅުވެފައިވާއިރު އިންޑިއާގެ ބައެއް ނޫސްތަކުގައި، ހަނިމާދޫ އިންޓަނޭޝަނަލް އެއާޕޯޓުގެ ހިންގުން އިންޑިއާގެ ކުންފުންޏަކަށް ހަވާލުކުރުމަށް ރާއްޖޭގެ ސަރުކާރުން ހުށަހާޅާފައިވާ ކަމަށް ވަނީ ރިޕޯޓުކޮށްފަ އެވެ.

އެގޮތުން ހަނިމާދޫ އިންޓަނޭޝަނަލް އެއާޕޯޓް ހިންގުމަށް އިންޑިއާގެ ކުންފުނިތަކުގެ އެހީތެރިކަމަށް އެދި ރާއްޖެއިން ހުށަހެޅި ޕްރޮޕޯސަލް ދިރާސާ ކުރުމަށް އެ ގައުމުގެ ސިވިލް އޭވިއޭޝަން މިނިސްޓްރީން މި ހަފްތާ ތެރޭގައި އެއާޕޯޓްސް އޮތޯރިޓީ އޮފް އިންޑިއާ (އޭއޭއި)ގައި އެދިފައިވާ ކަމަށް އިންޑިއާގެ ނޫހެއް ކަމަށްވާ "ދަ ހިންދޫ" ނޫހުގައި ވަނީ ރިޕޯޓުކޮށްފަ އެވެ.

ހަނިމާދޫ އިންޓަނޭޝަނަލް އެއާޕޯޓު ހިންގާނެ އިންޑިއާ ކުންފުންޏެއް ހޯދަން އެދިވަޑައިގަތީ ރައީސް ޑރ. މުއިއްޒު ކަމަށާއި އެމަނިކުފާނު އެކަން ހުށަހެޅުއްވީ އެއާޕޯޓު ހުޅުވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ މަންދޫބެއްގެ ގޮތުގައި ވަޑައިގެންނެވި ސިވިލް އޭވިއޭޝަން މިނިސްޓަރު ކޭ. ރާމް މޯހަން ނައިދުއަށް ކަމަށް ދަ ހިންދޫ ނޫހުގައި ރިޕޯޓުކޮށްފައިވެ އެވެ.

ފާހަގަކޮށްލެވޭ ގޮތުގައި އެއާޕޯޓްސް އޮތޯރިޓީ އޮފް އިންޑިއާ (އޭއޭއި)ގެ ދަށުން އިންޑިއާގެ 113 އެއާޕޯޓެއް އޮންނައިރު އޭގެ ތެރެއިން އެ އޮތޯރިޓިން ހިންގަނީ އެ ގައުމުގެ 26 އެއާޕޯޓެކެވެ.

1986 ވަނަ އަހަރުން ފެށިގެން ހިދުމަތް ދެމުން އަންނަ ހަނިމާދޫ އިންޓަނޭޝަނަލް އެއާޕޯޓް އަލުން ތަރައްގީކޮށް ފުޅާކުރުމުގެ މަސައްކަތް ކުރިއަށް ގެންގޮސްފައިވަނީ އިންޑިއާގެ އެގްޒިމް ބޭންކުން ދޫކުރި 800 މިލިއަން ޑޮލަރުގެ ކްރެޑިޓް ލައިންގެ އެހީގަ އެވެ. މި މަޝްރޫއުގެ އަމަލީ މަސައްކަތްތައް އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކޮށްފައިވަނީ 136.6 މިލިއަން ޑޮލަރަށެވެ.

މި މަޝްރޫއުގެ ދަށުން އެއާޕޯޓުގެ ވަސީލަތްތައް ޒަމާނީ ފެންވަރަކަށް ތަރައްގީ ކުރެވިފައިވާއިރު، މީގެ ތެރޭގައި އެއާބަސް A320 މަރުކާގެ ބޯޓުތައް ޖެއްސޭނެ ފަދަ 2,465 މީޓަރުގެ ރަންވޭއަކާއި، އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ ފެންވަރުގެ އާ ޓާމިނަލެއް ހިމެނެ އެވެ. ހަނިމާދޫ އިންޓަނޭޝަނަލް އެއާޕޯޓް މަޝްރޫއަކީ ރާއްޖޭގެ އުތުރުގެ އިގްތިސާދީ ދުވެލި ހަލުވިކުރުމަށާއި، ބައިނަލްއަގުވާމީ ދަތުރުފަތުރުގެ ނިޒާމުން ރާއްޖެ އިތުރަށް ގުޅުވައިދިނުމަށް މަގުފަހިވެގެންދިޔަ މުހިންމު މަޝްރޫއެކެވެ.