ހަނިމާދޫ އިންޓަނޭޝަނަލް އެއާޕޯޓަކީ ބޮޑު ތިލަދުންމަތީ ހުރިހާ ރައްޔިތުންގެ ތަރައްގީގެ ދޮރޯށި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މި މޭރުމުން ވިދާޅުވީ، ހަނިމާދޫ އިންޓަނޭޝަނަލް އެއާޕޯޓު ހުޅުވުމުގެ ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅު ދައްކަވަމުންނެވެ. ރައީސް ވިދާޅުވި ގޮތުގައި، ހަނިމާދޫ އެއާޕޯޓާއެކު، މި ލިބުނީ ރަނުގެ ފުރުސަތެއް ކަމަށާއި މިއީ ދިވެހި ވިޔަފާރިތައް ރާއްޖޭގެ އެންމެ އުތުރަށް ފުޅާކުރަންވީ ވަގުތު ކަމަށް ވިދާޅުވި އެވެ.

"މިއަދު މި ހާސިލުވެގެން ދަނީ ރާއްޖޭގެ ތަރައްގީގައި ހާއްސަކޮށް ރާއްޖޭގެ އެންމެ އުތުރުގެ ދެމެހެއްޓެނިވި ތަރައްގީގެ އެންމެ ބޮޑު އެއް ކާމިޔާބީ،" --- ރައީސް ވިދާޅުވި އެވެ.

މި މަޝްރޫއަކީ ތަސައްވުރާއި، ބަދަލާއި، މިންނެތް މަސައްކަތުން ހާސިލުވާނެ ކާމިޔާބު ރަމްޒުކޮށްދޭ މަޝްރޫއެއްކަން ފާހަގަކުރައްވައި ރައީސް ވިދާޅުވީ، ހަނިމާދޫ އެއާޕޯޓުގެ އަމަލީ މަސައްކަތް 2022 ވަނަ އަހަރުގެ ފަހުކޮޅުގައި ފެށި ނަމަވެސް، މަސައްކަތުގެ ދުވެލި މަޑުޖެހި، ރައްޔިތުންގެ މެދުގައި ކަންބޮޑުވުން އުފެދިފައި ވަނިކޮށް، ރިޔާސީ އިންތިހާބުގައި ވައުދުވެ ވަޑައިގަތް ގޮތަށް މަސައްކަތުގެ ދުވެލި ބާރު ކުރައްވައި، ކާމިޔާބު ކަމާއެކު އެ ވައުދުފުޅު ފުއްދަވައި ދެވިއްޖެ ކަމަށް ވިދާޅުވި އެވެ.

ހަނިމާދޫ އެއާޕޯޓް ރަސްމީކޮށް ހުޅުވުމާއެކު އެކި ދާއިރާތަކުން ވަޒީފާގެ ފުރުސަތުތައް ފަހިވެގެންދާނެކަން ފާހަގަކުރައްވައި ރައީސް ވިދާޅުވީ، ހދ. ނާގޯށީގައި ތަރައްގީ ކުރެވޭ ރިސޯޓާއެކު، ފަތުރުވެރިކަމުގެ ދާއިރާއިން އުތުރުގެ ސަރަހައްދަށް ކުރިއެރުން ލިބިގެންދާނެ ކަމަށެވެ.

ހަނިމާދޫ އެއާޕޯޓާއެކު ރާއްޖޭގެ ތަރައްގީގެ ގިނަ މަސައްކަތްތަކެއް ކުރުމަށް މަގުފަހިގެންދާނެކަމަށް ރައީސް ވަނީ އިތުރަށް ވިދާޅުވެފަ އެވެ.