ހަނިމާދޫ އިންޓަނޭޝަނަލް އެއާޕޯޓުގެ އާ ޓާމިނަލް އަންނަ މަހުގެ 9 އެއްގައި ރަސްމީކޮށް ހުޅުވަން ތައްޔާރުވަމުން އަންނަ ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނެފި އެވެ.
"ޚުލާސާ" އާ ވާހަކަ ދައްކަމުން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ މިހާރު ވަމުންދަނީ އެ ޓާމިނަލް ހުޅުވުމަށްވާންޖެހޭ އެންމެ ފަހުގެ ތައްޔާރީތައް ކަމަށާއި ހަނިމާދޫ އެއާޕޯޓުގައި މިހާރު ބޭނުންކުރަމުން އަންނަ ޓާމިނަލުގެ ހިދުމަތްތައް އާ ޓާމިނަލަށް ބަދަލުކުރުމުގެ މަސައްކަތް މި މަސްތެރޭގައި ފަށާނެ ކަމަށެވެ. އަދި އެ އެއާޕޯޓުގެ އާ ރަންވޭ ފުރިހަމައަށް ބޭނުން ކުރުމަށްޓަކައި، މިހާރު ބޭނުންކުރާ ޓާމިނަލް ތަޅާލުމުގެ ތަޅާލުމުގެ މަސައްކަތްވެސް ވަރަށް އަވަހަށް ފަށާނެ ކަމަށް ވިދާޅުވި އެވެ.
ހަނިމާދޫ އެއާޕޯޓުގެ އާ ޓާމިނަލް ހުޅުވުމުގެ ތައްޔާރީތަކާ ގުޅޭ މައުލޫމާތު ސްޓޭކްހޯލްޑަރުންނާއި ހިއްސާކުރުމަށް އެމްއޭސީއެލްއިން މިދިޔަ އާދިއްތަ ދުވަހު ފުރަތަމަ ބައްދަލުވުން ވެސް ވަނީ ބާއްވައިފަ އެވެ. ޝަރީފް ވިދާޅުވިގޮތުގައި އާ ޓާމިނަލް ހުޅުވުމުގެ ރަސްމިއްޔާތު ކުލަގަދަކޮށް ފާހަގަކުރުމަށް ވަނީ ނިންމާފަ އެވެ.
Advertisement
ހަނިމާދޫ އެއާޕޯޓު މަސައްކަތްތައް ބާރު ދުވެލީގައި ކުރިއަށްގެންގޮސް، ލަސްވެގެން ނޮވެމްބަރު މަހު، އެ އެއާޕޯޓު ފުރިހަމައަށް ބޭނުންކުރެވޭގޮތަށް ނިންމައި ހުޅުވާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ ކުރިންވެސް ވިދާޅުވެފަ އެވެ.
އިންޑިއާގެ ލޯނު އެހީގައި އެގައުމުގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑާ ހަވާލުކޮށްގެން ތަރައްގީކުރާ ހަނިމާދޫ އިންޓަނޭޝަނަލް އެއާޕޯޓުގެ މަޝްރޫއަކީ މިވަގުތު ރާއްޖޭގައި އެއާޕޯޓު ތަރައްގީކުރުމަށް ކުރިއަށްދާ އެންމެ ބިޔަ އެއް މަޝްރޫއެވެ.
ގާތްގަނޑަކަށް ދެ ބިލިއަން ރުފިޔާގެ މި މަޝްރޫއުގެ ދަށުން ހަނިމާދޫ އިންޓަނޭޝަނަލް އެއާޕޯޓުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެއެވެ. މި މަޝްރޫއުގެ ދަށުން ހަނިމާދޫ އެއާޕޯޓުގައި 2.7 ކިލޯމީޓާރުގެ އާ ރަންވޭއަކާއި ޓާމިނަލަކާއި އާ އެއާޓްރެފިކް ކޮންޓްރޯލް ޓަވަރަކާއި ކާގޯ އިމާރާތެއްގެ އިތުރުން ފިއުލް ފާމެއް ހެދުމުގެ މަސައްކަތް ވެސް ދަނީ ކުރަމުންނެވެ.
މި މަޝްރޫޢު ނިމުމުން، ހަނިމާދޫ އެއަރޕޯޓުން އޭ320 އަދި ބޮއިންގް 737ގެ މަރުކާގެ ފްލައިޓްތަކަށް ހިދުމަތް ދެވޭނެއެވެ. އަދި މި މަޝްރޫއު ވެގެންދާނީ މުޅި އުތުރުގެ އިގުތިސާދަށް ބޮޑު ކުރިއެރުމެއް ގެނުވާނެ މަޝްރޫއަކަށެވެ.
