ސިނގިރޭޓު މައްސަލައިގައި ކަސްޓަމްސްގެ ވަޒީފާއިން ވަކިކުރި، ޑެޕިއުޓީ ކޮމިޝަނަރު މަހުމޫދު ރިޔާޒުގެ ވަޒީފާ އަލުން އިއާދަކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.

މި ނިންމެވުން ރައީސް ނިންމެވިކަން ހާމަކުރައްވަމުން ރައީސް އޮފީހުގެ އިސް ތަރުޖަމާނު ހީނާ ވަލީދު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ކުރިއަށް ގެންދިޔަ ތަހުގީގަކާ ގުޅިގެން މަގާމުން ވަކިކުރި ކަސްޓަމްސްގެ ޑެޕިއުޓީ ކޮމިޝަނަރު މަހުމޫދު ރިޔާޒުގެ މައްސަލަ، އެ ކޮމިޓީން އިތުރަށް ތަހުގީގުކުރުމަށްފަހު، އެ މައްސަލައިގައި އޭނާގެ ބައިވެރިވުމެއް ނެތްކަމަށް ނިންމައި، ވަޒީފާ އަލުން އިއާދަކޮށްދޭން ކޮމިޓީން ރައީސަށް ލަފާ އަރުވާފައިވާ ކަމަށެވެ.

އެހެން ކަމުން މަހުމޫދު ރިޔާޒުގެ ވަޒީފާ ރައީސް އަލުން އިއާދަކުރައްވާފައިވާ ކަމަށް ހީނާ ކުރެއްވި ޕޯސްޓުގައި ވިދާޅުވި އެވެ.

މަހުމޫދު ރިޔާޒާއެކު، ކަސްޓަމްގެ އިތުރު ޑެޕިއުޓީ ކޮމިޝަނަރެއް ވަޒީފާއިން ވަކިކުރެއްވުމަށް ރައީސް ނިންމެވީ ނިމިދިޔަ އޮކްޓޫބަރު މަހުގެ 29 ވަނަ ދުވަހު އެވެ.

އެ ދެ މީހުންވެސް ވަޒީފާއިން ވަކިކުރެއްވުމަށް ރައީސް ނިންމެވީ، ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ދިރާސާކުރައްވާފައިވާ "ދަ ހޯކްސް ޕްރައިވެޓް ލިމިޓެޑް" ގެ ތެޔޮ ބޯޓެއްގައި ގާނޫނާއި ގަވާއިދާ ހިލާފަށް ރާއްޖެއަށް ސިނގިރޭޓް ކާޓޫނުތަކެއް އެތެރެކޮށްފައިވާ މައްސަލައާއި، ބޮންޑެޑް ވެއާ ހައުސްއެއްގައި ހުރި ސިނގިރޭޓް ކާޓޫނުތަކެއް ކަސްޓަމްސްއަށް ނޭނގި ގާނޫނާއި ގަވާއިދާ ހިލާފަށް އެ ބޮންޑެޑް ވެއާ ހައުސްއިން ނެރެފައިވާ މައްސަލައާ ގުޅިގެން، ރައްޔިތުންގެ މަޖިލީހުން ރައީސްއަށް ފޮނުއްވި ސިޓީގައި ދެއްވާފައިވާ މައުލޫމާތާއި ލަފާއަށް ރިއާޔަތްކޮށްފައި ކަމަށް ރައީސް ވަނީ މީގެ ކުރިން ސޯޝަލް މީޑިއާގައި ހިއްސާކުރައްވައިފަ އެވެ.