ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން އަންނަ ހުކުރު ދުވަހުގެ ރޭ މާލޭގެ އާޓިފިޝަލް ބީޗުގައި ބާއްވާ ބޮޑު ޖަލްސާއަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ އެކު ދިވެހި ރައްޔިތުން ދެމިތިބިކަން ސާބިތުކޮށްދިނުމުގެ މައިގަނޑު މަޤްސަދާއެކު ބާއްވާ ޖަލްސާއެއް ކަމަށް، ރައްޔިތުންގެ މަޖިލީހުގެ ރައީސް އަދި ކޮންގުރެސް ޕާޓީގެ ޗެއާޕާސަން ޢަބްދުއްރަހީމް ޢަބްދުﷲ ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ، އަންނަ ހުކުރު ދުވަހު (ޖޫން 14) ބޭއްވުމަށް ހަމަޖެހިފައިވާ ޖަލްސާއަށް ތައްޔާރުވުމުގެ ގޮތުން މާލެ ސަރަހައްދުގައި ހިންގުމަށް ހަމަޖެހިފައިވާ ހާއްސަ ހަރަކާތްތައް ފެށުމުގެ ގޮތުން މިއަދު ޕީއެންސީގެ ހަރުގޭގައި ބޭއްވި ބައްދަލުވުމަކަށްފަހު ނޫސްވެރިންނާ ވާހަކަދައްކަވަމުންނެވެ.

ޢަބްދުއްރަހީމް ވިދާޅުވީ، ޖަލްސާއަށް ރާއްޖޭގެ އެކި ކަންކޮޅުތަކުން މީހުން އަންނަނީ ސަރުކާރުން މިހާތަނަށް ކޮށްދީފައިވާ ޚިދުމަތްތައް ބަލައިގަންނަ މިންވަރު ދައްކާލުމަށް ކަމަށެވެ. ޢަބްދުއްރަހީމް އިތުރަށް ވިދާޅުވީ، ރައްޔިތުން އެ އަންނަނީ، ކަން ހިނގާ މަގު އެނގޭތީ، އަދި މިވެރިކަން ދާ މިސްރާބު ރަނގަޅުކަމަށް ޤަބޫލުކުރެވޭތީ، އާ ރޫހަކާއެކު އާ ދިރުމަކާއެކު އާ މުސްތަޤުބަލަކަށް އުންމީދުކޮށްގެން ކަމަށެވެ. ޕީއެންސީ ސަރުކާރެއްގައި ރައީސް ޑރ. މުޙައްމަދު މުޢިއްޒާއެކު ބޭނުންވާ ތަރައްގީގެ މަންޒިލަށް ވާސިލުވެވޭނެކަމުގެ ޔަގީންކަން ރައްޔިތުންނަށް އެބައޮތް ކަމަށްވެސް ޢަބްދުއްރަހީމް ވިދާޅުވި އެވެ.

މި ޖަލްސާގައި ޕީއެންސީގެ ރައީސްގެ ހައިސިއްޔަތުން ރައީސް މުޢިއްޒު ދެއްވާ ހިތާބުގައި، ރައްޔިތުންގެ އުންމީދުތައް އައުވެގެންދާނެ ފަދަ މުހިންމު އިޢުލާންތަކެއް ކުރައްވާނެ ކަމަށްވެސް ޢަބްދުއްރަހީމް ވިދާޅުވި އެވެ. އަދި ރައީސް މުޢިއްޒު ރާއްޖޭގެ ހުރިހާ ރަށަކަށް ދަތުރުކުރައްވައި، ތަރައްގީގެ ގިނަ މަޝްރޫޢުތަކެއް ފަށްޓަވާފައިވާކަން ޢަބްދުއްރަހީމް ވަނީ ފާހަގަކުރައްވާފަ އެވެ. މީގެ އިތުރުން، ފާއިތުވި ބުރާސްފަތި ދުވަހަކީ އެއްފަހަރާ އެންމެ ގިނަ މަޝްރޫޢުތައް ދިވެހި ކުންފުނިތަކާ ޙަވާލުކުރެވުނު ދުވަސްކަންވެސް ޢަބްދުއްރަހީމް ފާހަގަކުރެއްވި އެވެ.

ޖޫން 14 ވަނަ ދުވަހުގެ މި ބޮޑު އެއްވުމަކީ ވާދަވެރި ސިޔާސީ ފިކުރުތަކަށް ރައްޔިތުން ދޭ ރައްދަކަށް ވާނެ ކަމަށާއި، އެ ޖަލްސާއިން ރާއްޖޭގެ ހަގީގީ ސިފަ އާއި ރައްޔިތުންގެ ޝުއޫރުތައް ސާފުކޮށް ފެނިގެންދާނެ ކަމަށް ޢަބްދުއްރަހީމް ވިދާޅުވި އެވެ،