ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެއުޅުނު ބޭރުގެ ބޯޓެއް، ޑްރޯންގެ އެހީގައި އަތުލައިގަނެފި އެވެ.

މިކަމާ ގުޅިގެން އެމްއެންޑީއެފްއިން އެކްސްގައި ހިއްސާކުރި ޕޯސްޓެއްގައި ބުނީ، ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަދެއުޅުނު އެ ބޯޓު އަތުލައިގަނެފައިވަނީ، އެމްއެންޑީއެފް އެއާ ކޯއިން ޑްރޯން ބޭނުންކޮށްގެން ހިންގި ސަވެއިލަންސެއްގައި ކަމަށެވެ.

މިކަމާ ގުޅިގެން އެމްއެންޑީއެފްއިން ބުނި ގޮތުގައި، ގާނޫނާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތެރިވާކަން ފާހަގަކުރެވިގެން ކޯސްޓްގާޑު ސްޕެޝަލް ބޯޓް ސްކޮޑްރަނުން އެ ބޯޓު އިންޓަސެޕްޓްކޮށް އެމްއެންޑީއެފްގެ ބާރުގެ ދަށަށް ގެނެސްފައިވާ ކަމަށެވެ.

ކޯސްޓުގާޑުގެ ސްޕެޝަލް ބޯޓް ސްކޮޑުގެ ބެލުމުގެ ދަށަށް މި ބޯޓު ގެނެވުނީ މި މަހުގެ ފަސްވަނަ ދުވަހުގެ ރޭގައި ކަމަށާއި މި ބޯޓު ހަރަކާތްތެރިވަމުން ދިޔައީ ވ. ފޮއްތެޔޮމުލީގެ އިރުން 137 ނޯޓިކަލް މޭލު ބޭރުންކަމަށް އެމްއެންޑީއެފްއިން ބުނެފައިވެ އެވެ.

ރާއްޖޭގެ އަސްކަރިއްޔާ ވަރުގަދަކުރުމުގެ ގޮތުން އަސްކަރީ ޑްރޯންތައް އަސްކަރީ ކަންކަމުގައި ބޭނުންކުރަން ފެށުމާއެކު، ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަދެ އުޅޭ މިފަދަ ބޯޓުތައް އަތުލައިގަތުމަށް މިހާރު ވަނީ ވަރަށް ބޮޑަށް ފަސޭހަވެގެން ގޮސްފަ އެވެ.