އިސްލާމީ ޝަރީއަތަކީ ދިރިއުޅުމުގެ ހުރިހާ ދާއިރާއެއް ޝާމިލުވާ ގޮތަށް އޮތް ފުރިހަމަ ނިޒާމެއް ކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި، ބާއްޖަވެރިކަމުގެ އެއް ސަބަބަކީ އިސްލާމީ ޝަރީއަތަކީ ފުރިހަމަ ޝަރީއަތެއްކަން އެނގުން ކަމަށް ވަނީ ބުނެފަ އެވެ. އިސްލާމީ ޝަރީއަތަކީ ހަމައެކަނި އަޅުކަމާއި ހައްދުތައް ގާއިމުކުރުން ކަމަށް ބައެއް މީހުންނަށް ހީވެފައި އޮތްނަމަވެސް، ހަގީގަތުގައި އިސްލާމީ ޝަރީއަތުގައި އަގީދާއާއި، އަޅުކަމާއި، އަހްލާގާއި، އާއިލީ ގުޅުންތަކާއި، ތަރިކައާއި، އިގްތިސާދާއި، ސިޔާސީ އަދި ބައިނަލްއަގުވާމީ ގުޅުންތަކާއި ހަމަހަމަކަމާއި، އަދުލު އިންސާފާއި، މިފަދަ އެންމެހައި ދާއިރާތަކާއި ކަންކަން ހިމެނޭކަމަށް ހުތުބާގައި ވަނީ ބުނެފަ އެވެ.

އިންސާނާ ދުނިޔޭގައި ބާއްޖަވެރި ހަޔާތެއް އުޅުމަށް ބޭނުންވާ ހުރިހާ ކަމެއް ފުރިހަމަވެފައިވާ ދީނަކީ އިސްލާމް ދީންކަން ފާހަގަކުރަމުން ހުތުބާގައި ބުނީ، އިސްލާމީ ޝަރީއަތުގައި، އަދުލުވެރިކަމާއި، އިހްސާންތެރިކަމާއި މީސްތަކުންގެ ހައްގުތައް ރައްކާތެރިކޮށްދީފައިވާ ކަމަށް ހުތުބާގައި ވަނީ ބުނެފަ އެވެ.

މިއަދުގެ ހުތުބާގައި، ފަގީރުންނާއި، ޔަތީމުންނާއި، އަންހެނުންނާއި، ކުޑަކުދިންނާއި އަދި ޣައިރު މުސްލިމުންނަށްވެސް ދުނިޔޭގެ އެއްވެސް ނިޒާމެއްގައި ނުދޭހައި ފުރިހަމައަށް އިސްލާމީ ޝަރީއަތުގައި މި ހައްގުތައް ކަށަވަރުކޮށްދީފައިވާ ކަމަށް ވަނީ ބުނެފަ އެވެ.

އިސްލާމީ ޝަރީއަތް ވަނީ މީސްތަކުންގެ ކިބައިގައި ތެދުވެރިކަމާއި، އަމާނަތްތެރިކަމާއި، ރަހުމަތާއި، އިއްފަތްތެރިކަމާއި އިހުސާންތެރިކަން އަށަގެންނެވުމަށް އަމުރުކޮށްފައިވާ ކަމަށް ހުތުބާގައި ވަނީ ބުނެފަ އެވެ. މީގެ އިތުރަށްވެސް އެތަކެއް ދާއިރާއަކުން ބާއްޖަވެރިކަން ގެނެސްދިނުމަށް ގިނަގުނަ ކަންކަން ޝަރުއު ކުރައްވާފައިވާ ކަމަށްވެސް ހުތުބާގައި ވަނީ ބުނެފަ އެވެ.

ދުނިޔެއާއި އާހިރަތުގެ ބާއްޖަވެރިކަމަށް އެދޭނަމަ މާތްﷲ އަށް ތަގުވާވެރިވެ، އެކަލާނގެ އަމުރުފުޅުތަކަށް ކިޔަމަންވެ އަދި އެކަލާނގެ ނަހީކުރެއްވި ކަންކަމުން ދުރުހެލިވުމަށް މިއަދުގެ ހުކުރު ހުތުބާގައި ވަނީ ނަސޭހަތްތެރިވެފަ އެވެ.