ނިމިފިޔަ އޮކްޓޫބަރު މަހު ވޭޕާއި އީ-ސިނގިރޭޓާ ގުޅުންހުރި 25 މައްސަލައެއް ފުލުހުންނަށް ހުށަހަޅާފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފި އެވެ.
މިކަމާ ގުޅިގެން ފުލުހުން މިއަދު އެކްސްގައި ހިއްސާކުރި ޕޯސްޓެއްގައިވާ ގޮތުން، ވޭޕާއި އީ-ސިނގިރޭޓު ބޭނުންކުރުމުގެ ފަސް މައްސަލައެއް ފުލުހުންނަަށް ހުށަހަޅާފައިވާއިރު ވޭޕާއި އީ-ސިނގިރޭޓު ގެންގުޅުމުގެ 15 މައްސަލައެއް ފުލުހުންނަށް ވަނީ ހުށަހަޅައިފަ އެވެ.
މީގެ އިތުރުން ވޭޕާއި އީ-ސިނގިރޭޓުގެ ގަނެ ވިއްކުމުގެ ދެ މައްސަލައެއް ފުލުހުންނަށް ހުށަހެޅިފައިވާއިރު، ވޭޕާއި އީ-ސިނގިރޭޓާއި ގުޅުންހުރި ތިން މައްސަލައެއް ފުލުހުންނަށް ހުށަހަޅާފައިވެ އެވެ.
Advertisement
ފުލުހުން އެކްސްގައި ހިއްސާކުރި ޕޯސްޓުގައި ހާމަކޮށްފައިވާ ގޮތުގައި، ވޭޕާއި އީ-ސިނގިރޭޓާ ގުޅުންހުރި މައްސަލަތަކާއި ގުޅިގެން 35 މީހަކު ޖޫރިމަނާ ކޮށްފައިވެ އެވެ. ޖޫރިމަނާގެ ގޮތުގައި ޖުމުލަ 226،000 ރުފިޔާ ލިބިފައިވެ އެވެ. އެގޮތުން ވޭޕާއި އީ-ސިނގިރޭޓު ބޭނުންކުރުމުގެ މައްސަލަތަކުގައި 104،000 ރުފިޔާއިން ޖޫރިމަނާ ކޮށްފައިވާއިރު، ވޭޕާއި އީ-ސިނގިރޭޓު ގެންގުޅުމުގެ މައްސަލަތަކުގައި، 97،000 ރުފިޔާއިން ޖޫރިމަނާ ކޮށްފައިވެ އެވެ.
އަދިހަމައެހެންމެ، ވޭޕާއި އީ-ސިނގިރޭޓު ގަނެ ވިއްކުމުގެ މައްސަލަތަކުގައި 20،000 ރުފިޔާއިން ޖޫރިމަނާ ކޮށްފައިވާއިރު ވޭޕާއި އީ-ސިނގިރޭޓާއި ގުޅުންހުރި އެހެނިހެން މައްސަލަތަކާ ގުޅިގެން 5،000 ރުފިޔާއިން ޖޫރިމަނާ ކޮށްފައިވެ އެވެ.
