ކުރީގެ ރައީސް ޔާމީނުގެ ވެރިކަމުގައި ހިޔާ މަޝްރޫއުގެ ދަށުން ރައްޔިތުންނަށް ދޫކުރި ފްލެޓްތައް، ނިމިދިޔަ ސަރުކާރުން ހިތުހުރި ގޮތަކަށް ބަހާލި ކަމަށް މެމްބަރު ފަޒީލް މިއަދު ވިދާޅުވެއްޖެ އެވެ.

މެމްބަރު ފަޒީލް މި މޭރުމުން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. މެމްބަރު ފަޒީލް ވިދާޅުވި ގޮތުގައި، ނިމިދިޔަ ސަރުކާރުން ހިޔާ މަޝްރޫއުގެ ދަށުން ދޫކުރި ފްލެޓްތައް ހިތުހުރި ގޮތަކަށް ބަހާލައި، ފްލެޓް ލިބުނު އެތައް ނިކަމެތި ރައްޔިތުންގެ ހައްގު ނިގުޅައިގަތް ކަމަށެވެ. އަދި އެ ފްލެޓްތައް ދޫކުރީ ފްލެޓްތަކުގެ މަސައްކަތް ނިމުނުތާ ދެ އަހަރު ދުވަސް ފަހުން ކަމަށް މެމްބަރު ވިދާޅުވި އެވެ.

ނިމިދިޔަ ސަރުކާރުން ރައްޔިތުންނަަށް ދޫކުރި ފްލެޓްތައް މި ސަރުކާރުން ރައީސް ޑރ. މުއިއްޒުގެ ވައުދުފުޅާ އެއްގޮތަށް ރައްޔިތުންނަށް ހަވާލުކުރައްވަމުން ގެންދަވާނެ ކަމަށް މެމްބަރު ފަޒީލް ވިދާޅުވި އެވެ.

"އަޅުގަނޑު ގަބޫލުކުރަން އެބަތިބި ފްލެޓް އަދިވެސް ލިބެންޖެހޭ ހައްގުވާ ފަރާތްތައް. އެކަމަކު އެއީ އަޅުގަނޑުމެންގެ ސަރުކާރުންނޭ ސީދާ ނުބުނެވޭނެ ސިވިލް ސާވިސް ތެރޭގައި ފްލެޓް ކޮމިޓީގެ ތިބި ބަޔަކު ކޮށްފަ ހުރި ބައެއްކަހަލަ ކަންތައްތައް އެބަހުރި، އޭގެތެރޭގައި ބަލްންޖެހޭ ވަރަށް ނުބެލި ބައެއް މީހުންގެ ހައްގުތައްވެސް ގެއްލިފަ އެބަހުރި، އެކަންތައްތައްވެސް އަދިވެސް ބެލޭނެކަމަށް އަޅުގަނޑު ގަބޫލުކުރަނީ،" --- މެމްބަރު ފަޒީލް ވިދާޅުވި އެވެ.

މެމްބަރު ފަޒީލް ވިދާޅުވީ، ރަށުގައި ތިބެ ދޮގު ލިޔެކިޔުންތައް ހުށަހަޅައިގެން ފްލެޓް ހޯދާފައިވާ ފަރާތްތައް އެބަތިބި ކަމަށާއި، އެކަންކަން އެންމެ ރަނގަޅަށް ބެލޭނީ ރައްޔިތުންގެ މަޖިލީހުގެ މެމްބަރުންނަށް ކަމަށެވެ. ރައީސް ޔާމީނުގެ ވެރިކަމުގައި ދޫކުރި ފްލެޓްތައް ހިތުހުރި ގޮތަކަށް ބަހާލިކަމަށާއި، ނުކުޅެދުންތެރިކަން ހުންނަ ފަރާތްތަކަށް ހާއްސަކުރި ފްލެޓްތަކުގެ ކެޓަގަރީ އުވާލުމަށްފަހު ފިހާރަތަކަކަށް ބަދަލުކޮށްލި ކަމަށް މެމްބަރު ފަޒީލް ވިދާޅުވި އެވެ.

މެމްބަރު ފަޒީލް އިތުރަށް ވިދާޅުވީ، ކުރީ ސަރުކާރާ ހިލާފަށް ރައީސް ޑރ. މުއިއްޒުގެ ސަރުކާރުން ރައްޔިތުންނަށް ލިބެންޖެހޭ ހައްގެއްވާނަމަ އެ ހައްގެއް ހޯދަދެއްވާނެ ކަމަށެވެ.