ކަށި މިޔަރުގެ މަސްވެރިކަން ދެމެހެއްޓެނިވި ގޮތެއްގައި ކުރަންޖެހޭ ކަމަށް އިހަވަންދޫ ދާއިރާގެ މެމްބަރު އަހުމަދު ނަސީރު މިއަދު ވިދާޅުވެއްޖެ އެވެ.

މެމްބަރު ނަސީރު މި މޭރުމުން ވިދާޅުވީ، ރާއްޖޭގައި ކަށިމިޔަރުގެ މަސްވެރިކަން ކުރުމަށް ސަރުކާރުން ހުއްދަ ދިނުމާއި ގުޅިގެން، އެކަން ހުއްޓުވަށް ގޮވާލައި ވެލިދޫ ދާއިރާގެ މެމްބަރު މުހައްމަދު އައްބާސް މަޖިލީހަށް ހުށަހެޅުއްވި ގަރާރަށް ބަހުސް ކުރައްވަމުންނެވެ.

ކަށި މިޔަރުގެ މަސްވެރިކަން ދެމެހެއްޓެނިވި ގޮތެއްގައި ކުރަންޖެހޭ ކަމަށާއި އެ މަސައްކަތް ކުރާ ހިތްވާ މީހުން އެބަތިބި ކަމަށް މެމްބަރު ނަސީރު ވިދާޅުވި އެވެ. ވަކިން ހާއްސަކޮށް ނިކަމެތި ރައްޔިތުންނަށް ކުރެވެނީ މި ބާވަތުގެ މަސައްކަތްތައްކަން ފާހަގަކުރައްވައި މެމްބަރު ނަސީރު ވިދާޅުވީ، ރާއްޖޭގެ ބޮޑު ސަރަހައްދަކީ ކަނޑުގެ ސަރަހައްދު ކަމަށެވެ. އެހެންކަމުން ގައުމުގައި އޮތް އެންމެ ބޮޑު މުއްސަނދިކަން ވަކި ބަޔަކު ބޭނުންވާ ގޮތަށް ދޫކޮށްލާފައި އޮތުމަކީ ކުރަންޖެހޭ ކަމެއް ނޫން ކަމަށް މެމްބަރު ފާހަގަކުރެއްވި އެވެ.

ރާއްޖޭގެ ކަނޑުތަކުގަ ހުރި ބައެއް މައުދަންތައް ނުނަގައި ދޫކޮށްލާފަ ހުރި އިރު، ރެޑް ކޮރަލް އަދި ބްލެކް ކޮރަލްގެ އަގު ބާޒާރުގައި ހުރީ 10،000 އާއި 20،000 ޑޮލަރާއި ދެމެދުގައި ކަމަށާއި ދުނިޔޭގެ ބައެއް ގައުމުތަކުގައި ގަހަނާ އުފައްދައިގެން ވިއްކި ނަމަވެސް ރާއްޖޭގައި އެއީ މަނާ ކަމެއް ކަމަށް ނަސީރު ވިދާޅުވި އެވެ.

"18 ކެރެޓު ރަންކޮޅަކާ، 10 ގުރާމު ރެޑް ކޮރަލް އެއް ބޭނުންކޮށްލައިގެން 20،000 ޑޮލަރަށް ފަށުފުލެއް އެބަ ވިއްކާ ދުނިޔޭގެ ބާޒާރުގަ. ކީއްވެގެންތޯ އަޅުގަނޑުމެން މިހެން ތިބެންވީ. ކީއްވެގެންތޯ މިހެން ތިބެންވީ. ހަމައެކަނި އަޅުގަނޑުމެން ވީ ރިސޯޓު މުވައްޒަފުން ގެނެސްގެން އަޑިއަށް ލައިގެން ހުރިހާ އެންމެންނަކީ މުވައްޒަފުންނަށް ހަދައިގެން އުފެއްދުންތެރިކަން ދޫކޮށްލައިގެން ތިބެންވީތޯ،" --- މެމްބަރު ނަސީރު ވިދާޅުވި އެވެ.

ދިވެހިންނަކީ އުފެއްދުންތެރި ބައެއްކަން ފާހަގަކުރައްވައި މެމްބަރު ނަސީރު ވިދާޅުވީ، ދިވެހިރާއްޖޭގެ ރައްޔިތުންނަށް މިފަދަ އެތަށް ފުރުސަތެއް އެބައޮތް ކަމަށެވެ. އަދި ގާނޫނާއި ގަވާއިދުތަކަށް އިސްލާހު ގެނެސް އުސޫލުތަކުގެ ތެރެއިން އާދައިގެ ނިކަމެތި ރައްޔިތުން މުއްސަނދި ވުމަށްޓަކައި މިފަދަ ފުރުސަތުތައް ހުޅުވާލަން ޖެހޭނެ ކަމަށް މެމްބަރު ނަސީރު އިތުރަށް ވިދާޅުވި އެވެ.