ނިއުޔޯކުގެ މޭޔަރު ކަމަށް ޔޫގާންޑާ އަށް އުފަން ޛަޚްރާން މަމްދާނީ ކަހަލަ މުސްލިމަކު ހޮވައިގެން ނުވާނެ ކަމަށާއި ޒޮޚްރާން މަމްދާނީ އަކީ 100 ޕަސަންޓް ކޮމިއުނިސްޓެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނުމާއި ގުޅިގެން، ޓްރަމްޕަކީ މުސްލިމުންނަށް ހުރި މުސީބާތެއް ކަމަށް އެމެރިކާގެ މުސްލިމުންތައް ބުނަން ފަށައިފިއެވެ.

ނިއުޔޯކުގެ މޭޔަރު ކަމުގެ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އެންމެ ކުރީގައި އުޅެނީ އިދިކޮޅު ޑިމޮކްރެޓްސްގެ މަމްދާނީއެވެ. އެމެރިކާގެ 80 ޕަސެންޓް ރައްޔިތުން އޭނާ ހޮވޭނެ ކަމަށް ލަފާ ކުރެއެވެ. ޕޯލްތަކުން ދައްކާ ގޮތުގައި 3 ވަނައިގައި އޮތް ޓްރަމްޕުގެ ރިޕަބްލިކަން ޕާޓީގެ ކެންޑިޑޭޓް ކާޓިން ސިލްވާ އަށް ލިބެނީ 11 ޕަސެންޓެވެ.

ޓްރަމްޕް ބުނީ މަމްދާނީ ހޮވައިފިނަމަ ޚުދު މަމްދާނީ އަށާއި މުޅި އެމެރިކާ އަށް ބޮޑު މުސީބާތެއް ކުރިމަތިވާނެ ކަމަށެވެ. އަދި މަމްދާނީ އިންތިޚާބު ކޮށްފި ނަމަ ފެޑެރަލް ފަންޑުން އެންމެ ފައިސާ ފޮއްޗެއް ވެސް ނިއުޔޯކަށް ދޫނުކުރާނެ ކަމަށް ބުނެ ޓްރަމްޕް ވަނީ އިންޒާރު ދީފައެވެ.

ޓްރަމްޕް އަކީ އެމެރިކާގެ މުސްލިމުންނާއި ދޭތެރޭ ވަރަށް ބޮޑަށް ތަފާތުކުރުން ގެންގުޅޭ ރައީސެކެވެ. އޭނާ ވަނީ މީހެ ކުރިން ބައެއް ޤައުމުތަކުގެ މުސްލިމުން އެމެރިކާ އަށް އެތެރެވުން ވެސް މަނާކޮށްފައެވެ. އޭގެތެރޭގައި އެންމެ މަޝްހޫރު ކަމަކަކަށް އޭނާ ކުރި ކަމަކީ ވެރިކަމަށް އައި ފުރަތަމަ ފަހަރު އީރާން، ސީރިއާ، ޔަމަން، ލީބިޔާ، އަދި ސޯމާލިއާ ފަދަ މުސްލިމުންގެ އަޣުލަބިއްޔަތު އޮންނަ ބައެއް ޤައުމުތަކުގެ ރައްޔިތުން އެމެރިކާއަށް އެތެރެވުން މަނާ ކުރުމެވެ.

މީގެ އިތުރުން އެމެރިކާގެ މުސްލިމުންގެ މެދުގައި ބިރުވެރިކަން އުފައްދައި އިސްލާމްދީނާއި ޓެރަރިޒަމާއި ގުޅުވައިގެން ވެސް ޓްރަމްޕް ވަނީ ވަރަށް ހަޑިހުތުރު ވާހަކަތަކެއް ދައްކާފައެވެ.

އިސްލާމް ދީނަށް ފުރައްސާރަ ކުރުމުގެ ގޮތުން މާތްވެގެންވާ ޤުދުސް އަކީ އިސްރާއީލުގެ ވެރިރަށް ކަމަށް ހަދައި އެމެރިކާ އެމްބަސީ ވެސް އެތަނަށް ބަދަލުކުރަން ނިންމީ ޓްރަމްޕެވެ.

ޣައްޒާގެ މުސްލިމުން ޤަތުލުކޮށް ދިރިތިއްބާ އަންދާލުން ފަދަ ޖަރީމާތައް އިސްރާއީލުން ހިންގި އިރު އެ ކަމަށް ވެސް ޓްރަމްޕު ވަނީ ތާޢީދު ކޮށްފައެވެ.