އޮކްޓޯބަރު 29 ވަނަ ދުވަހު ބޭއްވި މައްސަލަ ބޮޑު އާންމު އިންތިޚާބާއި ގުޅިގެން ޓަންޒޭނިއާގެ ހަމަނުޖެހުންތައް ބޮޑުވެ ހާހެއްހާ މީހުން މަރުވެއްޖެ ކަމަށް ނުރަސްމީ މަސްދަރުތަކުން ބުނެފިއެވެ.
ޓަންޒޭނިއާގެ އިދިކޮޅު ޕާޓީ ޗަޑެމާ އިން ބުނާ ގޮތުގައި ވެރިކަން ކުރާ ޕާޓީ ކަމަށްވާ ޗާމާ ޗާ މާޕިންޑޫޒީ (ސީސީއެމް)ގެ ސަރުކާރުން ވަނީ ދާރުއްސަލާމާއި މުވާންޒާ ފަދަ ސިޓީތަކުގައި އިންޓަނެޓު ވެސް ކަނޑާލާފައެވެ.
ޓަންޒޭނިއާގެ ރައީސަކީ މުސްލިމު އަންހެނެކެވެ. އޭނާ އާއި ދެކޮޅަށް މުޒާހަރާތަކަށް ނުކުމެ ހަޅުތާލު ހިންގުމުގައި އިސްކޮށް އުޅެނީ ކްރިސްޓިއަނުންނެވެ.
Advertisement
ރައީސް ސާމިއާ ސުލޫހޫ ޙަސަންގެ ސަރުކާރުން ދަނީ މުޒާހަރާ މީހުންނާއި ދެކޮޅަށް އާދަޔާއި ޚިލާފަށް ބާރުގެ ބޭނުން ކުރަމުން ކަމަށާއި މުޒާހަރާތަކުގައި ސިފައިން ވަނީ ގަސްތުގައި 700 މީހުން މަރާލާފައި ކަމަށް އިދިކޮޅު ކްރިސްޓިއަނުންގެ ޕާޓީ ކަމަށްވާ ޗަޑެމާ އިން ބުނެއެވެ.
ޓަންޒޭނިއާގެ މުޒާހަރާ ބައިވެރިން ސިފައިންގެ ޔުނީފޯމުތައް ލައިގެން ހަތިޔާރާއި އެކު މަގުމަތީގައި އުޅޭއިރު، ލައިވް ވަޒަން ބޭނުންކުރުމުގެ ސަބަބުން އެތައް ބަޔަކު މަރުވެއްޖެ ކަމަށް ޚަބަރު ލިބޭ.
ބައެއް ރިޕޯޓްތައް ބުނާ ގޮތުގައި މުޒާހަރާގެ ބައިވެރިންނާއި ދެކޮޅަށް ސާމިއާގެ ސިފައިން ގެންދަނީ ލައިވް ވަޒަން ބޭނުންކުރަމުންނެވެ. ނަމަވެސް ޙަޤީޤަތުގައި ލައިވް ވަޒަން ބޭނުންކުރަނީ ސިފައިން ކަމެއް އަދި ޢާންމުން ކަމެއް ކަށަވަރު ނުވާ ހިސާބަށް ވަނީ ކަންކަން ގޮސްފައެވެ. ސަބަބަކީ އިދިކޮޅު ޕާޓީގެ ސަޕޯޓަރުން ވަނީ ސަލާމަތީ ބާރުތަކުން ހިންގާ މިލިޓަރީ އާލާތްތަކާއި ޔުނީފޯމު ހުންނަ ތަނެއް ފަޅާލައި އެތަކެތި ބޭނުންކުރަން ފަށާފައެވެ. މުޒާހަރާކުރާ ބައެއް ޢާންމުން މިހާރު ތިބީ ސިފައިންގެ ޔުނީފޯމުގައެވެ.
