އިސްރާއީލުގެ ބެލުމުގެ ދަށުގައި ހުރި ފަލަސްޠީނުގެ މީހަކު ރޭޕް ކޮށްލި ވީޑިއޯ ޢާންމުކުރި މީހުން ދެކެ ބޮޑުވަޒީރު ނަތަންޔާހޫ ރުޅިއައިސްފިއެވެ.
އިސްރާއީލު ސިފައިން ފަލަސްޠީނުގެ އަންހެނުން ގެންގޮސް ގަދަކަމުން ޖިންސީގުޅުން ހިންގުމަކީ އެންމެން ވެސް ދަންނަ ޙަޤީޤަތެކެވެ. ނަމަވެސް ނަތަންޔާހޫ ރުޅި އައީ އިސްރާއީލު ސިފައިން ފަލަސްޠީނުގެ އަންހެނުންނާއި ފިރިހެނުން ރޭޕް ކުރުމަކުންނެއް ނޫނެވެ. ނަތަންޔާހޫ ރުޅި އައީ ވީޑިއޯ ޢާންމުކުރި މީހުން ދެކެއެވެ.
އެތެރޭގެ ޕްރެޝަރާއި ހެދި ޖިންސީ ގޯނާކުރި ބައެއް މީހުންގެ ތަޙްޤީޤެއް ކުރިޔަސް، އެ މީހުންނަށް އަދަބު ދިނުމުގެ ބަދަލުގައި، ޔަހޫދީ ސަރުކާރުން މިހާރު ގެންދަނީ އެ ވޯޑިއޯ ލީކުކުރި މީހުން ހޯދައި އެ މީހުންނަށް ފިޔަވަޅު އެޅުމުގެ މަސައްކަތް ކުރަމުން ކަމަށް ޚަބަރު ލިބެއެވެ.
ރިޕޯޓްތައް ބުނާ ގޮތުން، ޒައެނިސްޓް ސަރުކާރުގެ ބައްދަލުވުމެއްގައި ވާހަކަދައްކަވަމުން ނަތަންޔާހޫ ވިދާޅުވީ ވީޑިއޯ ލީކު ކޮށްލުމުގެ ސަބަބުން އިސްރާއީލުގެ ދައުލަތާއި އިސްރާއީލުގެ ދިފާޢީ ބާރުތަކުގެ އަގު އިސްރާއީލުގެ ރައްޓެހިންގެ ކުރިމަތީގައި ގެއްލެމުންދާ ކަމަށާއި، އެ ފޫޓޭޖް ލީކުކުރީ ކޮންބައެއްތޯ ހޯދައިދިނުމަށެވެ.
މި ވީޑިއޯ ފުރަތަމަ ދެއްކީ އޮގަސްޓް މަހުއެވެ. އިސްރާއީލުގެ ޖަލެއް ކަމަށްވާ ސްޑެ ޓެއިމަން ގައި ފަލަސްޠީނު ފިރިހެނަކު ބަނދެ އޭނާގެ ގައިގައި ތަޅައި އަނިޔާކުރީ ބަރަހަނާ ވެސް ކޮށްފައެވެ.
އިސްރާއީލުގެ ސިފައިން ވަނީ ގިނަ ޢަދަދެއްގެ ފަލަސްޠީނު އަންހެނުން ވެސް ރޭޕް ކޮށްލުމަށް ފަހު ޝަހީދުކޮށްލާފައިކަން ފާހަގަ ކުރެވެއެވެ.
މި ވީޑިއޯ ލީކުވި މައްސަލައިގައި ޔަހޫދީ ސަރުކާރުގެ އިސް ޤާނޫނީ ވަކީލަކު ވަނީ އިސްތިއުފާ ވެސް ދެއްވާފައިކަން ވެސް ފާހަގަ ކުރެވެއެވެ.
