އެހެން އަހަރުތަކެކޭ ވެސް އެއްގޮތަށް މި އަހަރުގެ ނަސްރުގެ ދުވަހާ ދިމާކޮށް ގިނަ ހަރަކާތްތަކެއް ގެންދިޔުމުގެ އެންމެ ފަހުގެ ތައްޔާރީތައް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ވެއްޖެ އެވެ.

ނަސްރުގެ ދުވަހުގެ މުނާސަބަތުގައި ކުރިއަށް ގެންދާ ހަރަކާތްތައް ފެށުމަށް ހަމަޖެހިފައިވަނީ ނޮވެމްބަރު 3 ވަނަ ދުވަހު ސިފައިން ބައިވެރިވެގެން ބޮޑު ޖަމާއަތުގައި ކުރެވޭ ފަތިސް ނަމާދުންނެވެ. މި ބޮޑު ޖަމާއަތް އޮންނާނީ އިސްލާމީ މަރުކަޒު ގައެވެ.

އަދި އެ ދުވަހު ހެދުނު 06:00 ޖަހާއިރު 3 ނޮވެމްބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ މަސައްކަތް އޮންނާނެ އެވެ. ނަސްރުގެ ދުވަހުގެ ރަސްމީ ޖަލްސާ އޮންނާނީ އެ ދުވަހު ހެނދުނު 09:00 ޖަހާއިރު ސޯޝަލް ސެންޓަރުގަ އެވެ.

ނަސްރުގެ ދުވަހާ ގުޅިގެން ކުރިއަށް ގެންދާ ހަވީރީ ހަރަކާތްތައް ފަށާނީ ހަވީރު 16:15 ގައި ޖުމްހޫރީ މައިދާނުގަ އެވެ. މި ހަރަކާތްތަކުގެ ތެރޭގައި އަސްކަރީ ހުށަހެޅުމެއް އެމްއެންޑީއެފްގެ ފަރާތުން ކުރިއަށް ގެންދާނެ އެވެ.

މީގެ އިތުރުން ތިނަދޫ ސިޓީގައި އެ ދުވަހުގެ މުނާސަބަތުގައި ސިފައިންގެ ފޮޓޯ މައުރަޒާއި، އަސްކަރީ ހުށަހެޅުމެއްގެ އިތުރުން ކުޑަކުދިންގެ ހަވީރެއް ބޭއްވުމަށް ވަނީ ހަމަޖެހިފަ އެވެ. ފޮޓޯ މައުރަޒު ކުރިއަށް ގެންދިއުމަށް ހަމަޖެހިފައިވަނީ މި މަހު 7 އާއި 8 ވަނަ ދުވަހު ގދ. އަތޮޅު ތައުލީމީ މަރުކަޒުގަ އެވެ. އަދި އަސްކަރީ ހުށަހެޅުމާއި ކުޑަކުދިންގެ ހަވީރު އޮންނާނީ 8 ވަނަ ދުވަހުގެ ހަވީރު ތިނަދޫ ސީޓީ ސްޓޭޑިއަމްގަ އެވެ.

ނަސްރުގެ ދުވަހަކީ ނޮވެމްބަރު 3، 1988 ވަނަ އަހަރު ރާއްޖޭގެ ވެރިކަން ބަދަލުކޮށްލުމަށްޓަކައި ލަންކާގެ ޕްލޯޓް ޖަމާއަތަށް ނިސްބަތްވާ 42 މީހަކާއެކު ދިވެހިންތަކެއް އަޑީގައި ތިބެ މާލެ އަށް އަރައި ދިން ހަމަލާތަކުގައި ޝަހީދުވި 19 ދިވެހިންގެ ހަދާނުގައި ފާހަގަކުރާ ދުވަހެކެވެ. މި ދުވަހަކީ ކުލަގަދަކޮށް ފާހަގަކުރާ ސަރުކާރު ބަންދު ދުވަހެކެވެ.