ދެއަހަރަށް ވުރެ ގިނަ ދުވަސް ވަންދެން ޣައްޒާގައި އިސްތިޢުމާރީ ސިފައިން މެދުނުކެނޑި ހިންގަމުން ގެންދިޔަ ޤަތުލުޢާންމަށް ފަހު، ފުރަތަމަ ފަހަރަށް ޣައްޒާގެ ޔުނިވަސިޓީއެއްގައި ކިޔަވައިދޭން ފަށައިފިއެވެ. މިގޮތުން ފުރަތަމަ ހުޅުވައިލި ޔުނިވާސިޓީ އަކީ އަލް އަޒްހަރު ޔުނިވާސިޓީ އެވެ.
ޣައްޒާ އަށް އިސްރާއީލުން ދިން ހަމަލާގެ ތެރޭގައި ޒައެނިސްޓު ސިފައިން ވަނީ ޣައްޒާގެ ގިނަ ޔުނިވާސިޓީ ތަކާއި ޢިމާރާތްތަކާއި ވަޞީލަތްތައް ވެސް ސުންނާފަތި ކޮށްލާފައެވެ.
ޣައްޒާގެ ތަޢުލީމީ ނިޒާމު އޮތީ ފަނާވެފައެވެ. ފަލަސްޠީނުގެ އެޑިއުކޭޝަން މިނިސްޓްރީން ބުނާ ގޮތުގައި ޣައްޒާއާއި ހުޅަނގު އައްސޭރީގައި މަދުވެގެން 14000 އަށް ވުރެ ގިނަ ދަރިވަރުން ޝަހީދުކޮށްލާފައި ވާއިރު، އޭގެތެރޭގައި އަޒްހަރު ޔުނިވާސިޓީގެ ދަރިވަރުން ވެސް ހިމެނެ އެވެ. އިސްރާއީލުން ވަނީ ޣައްޒާގެ 193 އަށް ވުރެ ގިނަ ސައިންސްވެރިންނާއި 830 އަށް ވުރެ ގިނަ ޓީޗަރުން ވެސް ޝަހީދުކޮށްލާފައެވެ.
ފަނާކޮށްލާފައިވާ އަޒްހަރު ޔުނިވާސިޓީގެ ކިޔެވުން އޮންލައިންކޮށް އަލުން ފެށިއިރު، ކަރަންޓުގެ ދަތިތަކާއި ހެދި ދަރިވަރުންގެ ލެޕްޓޮޕްތައް ނިވޭ ކަމުގެ ޝަކުވާތައް ދަނީ ލިބެމުންނެވެ.
ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފެށި ފަހުން ހުސްވި ހަފްތާގައި އިސްރާއީލު ސިފައިންގެ މީހަކު މަރައިލި މައްސަލަ އާއި ގުޅިގެން ޣައްޒާއަށް އިސްރާއީލުން ދިން ޙަމަލާތަކުގައި 100 އަށް ވުރެ ގިނަ މީހުން ޝަހީދުވެފައިވާކަން ފާހަގަ ކުރެވެއެވެ..
