އިސްލާމީ ރިސާލަތަކީ މުޅި އިންސާނިއްޔަތަށް ހިދާޔަތު ދެއްވުމަށް މާތް ﷲ ފޮނުއްވި މަތިވެރި ރިސާލަތެއް ކަމަށާއި މި ރިސާލަތުގެ މައިގަނޑު އަސާސްތައް ބިނާވެފައިވަނީ ލޯތްބާއި ރަހުމާއި އޯގާތެރިކަމާއި، ހަމަޖެހުމާއި އަމާންކަމުގެ އަސާސުގެ މަތީގައި ކަމަށް ހުކުރު ހުތުބާގައި ބުނެފި އެވެ.

"އިސްލާމީ ރިސާލަތަކީ ލޯތްބާއި ރަހުމަތުގެ ރިސާލަތެއް" މި ނަމުގައި މިއަދު ދިން ހުތުބާގައި ބުނީ އިސްލާމީ ރިސާލަތަކީ އެއްކައުވަންތަ ކަލާނގެއަށް އީމާންވުމާއި، އެކަލާނގެއަށް ކިޔަމަންތެރިވުމަށް ގޮވައިލާ ރިސާލަތެއް ކަމަށާއި މިއީ މުޅި އިންސާނިއްޔަތަށް ބާއްޖަވެރިކަން ގެނެސްދޭ، ރަހުމާއި ހަމްދަރުދީގެ ރިސާލަތު ކަމަށެވެ.

އަދި ބައެއް މީހުން އިސްލާމްދީނާ މެދު ދެކެނީ އެއްވެސް ރަހުމެއްނެތް ހަރުކަށި ދީނެއްގެ ގޮތުގައި ކަމަށާއި އިސްލާމް ދީނަށް ތަބާވާ މީހުންނަކީ އެއްވެސް އޯގާތެރިކަމެއްނެތް ހަރުކަށި ބަޔެއްގެ ގޮތުގައި ކަމަށް ބުންޏެވެ. އެހެނަސް ހަގީގަތުގައި އިސްލާމްދީނަކީ ރަހުމަތުގެ ދީން ކަމަށް ހުތުބާގައި ބުންޏެވެ.

ހުތުބާގައި ބުނެފައިވާގުން އިސްލާމްދީނަކީ ލޯތްބާއި، ހަމްދަރުދީއާއި، އޯގާވެރިކަމާއި، އަޅައިލުމާއި، ހެޔޮފޯރުވުމުގެ ދީނެވެ. މުޖުތަމައުގެ ހުރިހައި އަފުރާދުންގެ މެދުގައި ހެޔޮ ގޮތުގައި ގުޅުންތައް ބިނާކޮށް، ދެމެހެއްޓުމުގެ މައްޗަށް ބާރުއަޅާ ދީނެވެ. އެހެންކަމުން، އިސްލާމްދީނާ މެދު، މި ދީނުގެ އަދުއްވުން ކުރަހާފައިވާ ބިރުވެރި، އަނދިރި މަންޒަރަކީ ހަގީގަތާ ހިލާފަށް ކުރަހައިފައިވާ މަންޒަރެއް ކަމަށާއި ހަގީގަތުގައި އިސްލާމް ދީނަކީ އިންސާނިއްޔަތުގެ ދީން ކަމަށް ބުންޏެވެ. އަދި ހެޔޮކަމާއި އޯގާތެރިކަން ފެތުރުމަށް ގޮވައިލާ ފަރުދުންނާއި މުޖުތަމައުތަކުގެ މެދުގައި ސުލްހަވެރިކަމާއި ހަމަޖެހުން ގާއިމުކުރުމަށް މަސައްކަތްކުރާ ދީން ކަމަށްވެސް ބުންޏެވެ.

އިސްލާމްދީނަކީ ހިތްތިރިކަމާއި މަޑުމައިތިރިކަމަށް ގޮވައިލާ ދީންކަމަށްވާއިރު އިސްލާމީ އުންމަތުގެ އަފުރާދުންނަކީ، އެއް ބަޔަކު އަނެއް ބަޔަކަށް ރަހުމްކުރާ، އޯގާތެރި، ބަޔަކަށްވުމަށް އިސްލާމްދީން ބާރުއަޅާ ކަމަށް ހުތުބާގައި ބުންޏެވެ. އަދި މި މަތިވެރި ސިފަތަކުގެ ސަބަބުން ދުނިޔަވީ އަމާންކަމާއި ހަމަޖެހުން ލިބި، އުހުރަވީ ބާއްޖަވެރިކަން ލިބޭ ކަމަށް ހުތުބާގައި ވަނީ ބުނެފަ އެވެ. އެހެންކަމުން އެކުވެރިވެ، އެކަލާނގެ ދީނުގައި ވަރުގަދައަށް ހިފަހެއްޓުމަށް ހުތުބާގައި ވަނީ ގޮވާލައިފަ އެވެ. އަދި ދެކޮޅުވެރިކަމާއި، ހަސަދަވެރިކަމާއި، ގެއްލުންތަކަށް މަގުފަހިވާ ކަންތައްތަކުން ދުރުހެލިވުމަށް ވަނީ އިލްތިމާސްކޮށްފަ އެވެ.