އެފްއޭއެމްގެ ފައިސާގެ ތެރެއިން 10,000 ޑޮލަރު އަމިއްލަ އެކައުންޓަށް ޖަމާކުރި މައްސަލައިގައި ހިޔާނާތުގެ ކުށް ސާބިތުވެ ހަތަރު އަހަރުގެ ޖަލު ހުކުމެއް އިއްވާފައިވަނިކޮށް، އެ ފައިސާ ލޯންޑާކުރިކަމުގެ ތުހުމަތުގައި ކުށް ސާބިތުވެ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އިތުރު ފަސް އަހަރުގެ ޖަލުގެ ހުކުމެއް މިއަދު އިއްވައިފި އެވެ.
ދައުލަތުން ބައްސާމްގެ މައްޗަށް ދައުވާކޮށްދިނުމަށް އެދިފައިވަނީ 2018 ވަނަ އަހަރު ފީފާއިން އެފްއޭއެމްގެ އެކައުންޓަށް ޖަމާކުރި ފައިސާގެ ތެރެއިން 10،000 ޑޮލަރު ބޭންކަށް ލިޔެކިޔުންތައް ހުށަހަޅައިގެން އޭނާގެ އަމިއްލަ އެކައުންޓަށް އެ ފައިސާ ޖަމާކޮށް ހިޔާނާތްތެރިވި މައްސަލައިގަ އެވެ. މި ކުށުގެ ދައުވާ އޭނާގެ މައްޗަށް ސާބިތުވެ ނިމިދިޔަ އޮގަސްޓް މަހު އޭނާގެ މައްޗަށް ވަނީ ހަތަރު އަހަރުގެ ޖަލު ހުކުމެއް އިއްވާފަ އެވެ.
އެފްއޭއެމްގެ ފައިސާއަށް ހިޔާނާތްތެރިވެ އެ ފައިސާ މާރުކުރުމުގެ ބަދަލުގައި ރެހެންދި ގައި ހުންނަ އޭނާގެ ފުލެޓަށް ކުލި ދައްކަން ބޭނުންކުރި ކަމަށް ބުނެ ދައުލަތުން ވަނީ އޭނާގެ މައްޗަށް ދައުވާ އުފުލާފަ އެވެ. އެ ފައިސާ ލޯންޑާކުރި ކަމުގެ ކުށުގެ ހުކުމް މިއަދު އިއްވާފައިވާއިރު ކްރިމިނަލް ކޯޓުގެ ޣާޒީ އިސްމާއިލް ޝަފީއު ވަނީ އޭނާގެ މައްޗަށް ފަސް އަހަރު ދުވަހުގެ ހުކުމެއް އިއްވާފަ އެވެ.
ޣާޒީ އިސްމާއިލް ޝަފީއު ކުރެއްވި ހުކުމުގައި ވަނީ ބައްސާމް އެ ފައިސާ ބޭނުންކޮށްގެން ހިޔާނާތްތެރިވެފައިވާ ކަމަށް ޝާރީއަތަށް ސާބިތުވާ ކަމަށާއި، އެއީ ހިޔާނާތުގެ ކުށް ކޮށްގެން ހޯދާފައިވާ ފައިސާކަން ވެސް ޝަރީއަތަށް ސާބިތުވާ ކަމަށެވެ. އަދި އެ ފައިސާ ބޭނުންކޮށްގެން ބައްސާމްގެ އަމިއްލަ ދިރިއުޅުމުގެ ހަރަދުތައް ކޮށްފައިވާ ކަމަށް ވެސް ދައުލަތުގެ ފަރާތުން ސާބިތުކޮށްފައިވާ ކަމަށް އެ ހުކުމުގައިވެ އެވެ.
ދައުލަތުން ޝަރީއަތުގައި އެދިފައިވަނީ އެކަމަށް އޮންނަ އެންމެ ބޮޑު އަދަބު ކަމަށްވާ 15 އަހަރުގެ ޖަލު ހުކުމެއް އިއްވުމަށެވެ. ނަމަވެސް ބައްސާމްގެ ފަރާތުން ލުއި އަދަބަކަށް އެދިފައިވާތީ ޣާޒީ ނިންމެވީ ފަސް އަހަރު ދުވަހުގެ ޖަލު ހުކުމަކާއެކު 154،000 ރުފިޔާ އިން ޖޫރީމަނާ ކުރުމަށެވެ. ޖޫރިމަނާގެ ފައިސާ ހަ މަސް ދުވަސް ތެރޭ ދެއްކުމަށް އޭނާގެ މައްޗަށް އަމުރު ކޮށްފައިވެ އެވެ.
ބައްސާމް ހިޔާނާތްތެރިވި 10،000 ޑޮލަރު އޭނާގެ އަތުން ނެގުމަށް ދައުލަތުން ޝަރީއަތުގައި އެދިފައިވެ އެވެ. ނަމަވެސް އެ ފައިސާ ބައްސާމްގެ އެކައުންޓުގައި ހުރިކަން ދައުލަތުން ޔަގީންކޮށްދެވިފައި ނުވާތީ އެފަދަ އަމުރެއް ނެރެދެވެން ނެތްކަމަށް ޣާޒީ ކަނޑައެޅުއްވި އެވެ.
