ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ބައެއް ފަރާތްތަކަށް ސޯޝަލް ހައުސިންގެ ފުލެޓުތަކަށް ޑައުންޕޭމަންޓް ދައްކަން އުނދަގޫވެފައިވާތީ އެ ފަރާތްތަކުގެ ޑައުންޕޭންޓް ރާއްޖޭގެ ޒަކާތު ފަންޑުން ދައްކައިދިނުމަށް ސަރުކާރުން ނިންމައިފި އެވެ.

ޒަކާތު ފަންޑުން ނެރުނު ނޫސް ބަޔާނެއްގައި ބުނެފައިވަނީ ފަގީރުންނާއި މިސްކީނުންގެ ލިސްޓުގައި ރަޖިސްޓްރީވެފައިވާ ފަރާތްތަކެއް ފުލްޓުތަކުގެ ޑައުންޕޭމަންޓު ނުދެއްކިގެން އުޅޭ ކަމަށް އެ އިދާރާގެ ސަމާލުކަމަށް އައިސްފައިވާ ކަމަށާއި، އެހެންކަމުން އެ އިދާރާގެ ކައުންސިލަށް އެ މައްސަލަ ހުށަހަޅައި މަޝްވަރާކުރުމަށްފަހު 14 ފަރާތަކަށް ޖުމްލަ 340،000 (ތިން ލައްކަ ސާޅީސް ހާސް) ރުފިޔާ އެ ފަންޑު މެދުވެރިކޮށް ދައްކަން ނިންމާފައިވާ ކަމަށެވެ.

އެ އިދާރާއިން ބުނެފައިވަނީ ޑައުންޕޭމަންޓަށްވާ އެ ފައިސާ ފުލެޓް ލިބުނު ފަރާތްތަކުގެ އެކައުންޓަށް ޖަމާކުރުމުގެ ބަދަލުގައި ދައްކާނީ ކަމާގުޅުންހުރި އިދާރާއަށް ކަަމަށެވެ. އެއަށްފަހު އެ ފަރާތްތަކުގެ ދިރިއުޅުމުގެ ހާލަތަށް އަންނަ ބަދަލުތަކަށް ބެލުމަށްފަހު ފަގީރުކަމުގެ ހާލަތު އަލުން ރިވިއު ކުރާނެ ކަމަށް ވެސް އެ އިދާރާއިން ބުނެފައިވެ އެވެ.

ޒަކާތު ފަންޑަކީ ފަގީރުންގެ ކަންކަމަށް ފުޅާ ދާއިރާއެއްގައި ހޭދަކުރުމުގެ މަސްއޫލިއްޔަތު ހަވާލުކޮށްފައިވާ އިދާރާ އެވެ. މި އިދާރާ އުފައްދާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. މި އިދާރާގެ މައިގަނޑު މަގްސަދަކީ ފަގީރުކަމުގައި ތިބި ފަރާތްތައް ތަނަވަސް ހާލަތަކަށް ގެނައުމެވެ.

ފަގީރުންނާއި މިސްކީނުންގެ ދަފްތަރުގައި ހިމެނޭ ފަރާތްތަކަށް "ޒަކާތު ބެނެފިޝަރީ ކާޑެއް" ތައާރަފް ކުރުމަށް އެ އިދާރާއިން އަންނަނީ މަސައްކަތް ކުރަމުންނެވެ. މި ކާޑު ތައާރަފް ވުމުން ސިއްހީ ހިދުމަތްތައް އާސަންދައިގެ ދަށުން ކަވަރުނުކުރާ ހަރަދުތައް ކަވަރުކޮށްދިނުމާއި، ރަމަޟާންމަހު ކާބޯތަކެތި ގަތުމަށާއި، ބޯހިޔާވަހިކަމާއި އަދި ތައުލީމާ ގުޅުންހުރި އެހީތައް ދަފްތަރުގައި ހިމެނޭ ފަރާތްތަކަށް ލިބިގެންދާނެ އެވެ.

މި ކަންތައްތަކަކީ އިސްލާމީ ދުނިޔޭފައި ޒަކާތާ ބެހޭ މުއައްސަސާތަކުން އެހީތެރިކަން ފޯރުކޮށްދެމުން އަންނަ އަސާސީ ކަންކަން ކަމުގައި ޒަކާތު ފަންޑުން ފާހަގަކޮށްފައިވެ އެވެ.