އަތޮޅުތެރޭގެ އޭޓީއެމްތަކުން ދުވާލަކު 9،300 މުއާމަލާތްކުރެވޭ ކަމަށާއި، ދައުރުވާ ފައިސާގެ އަދަދު 25.7 މިލިއަން ރުފިޔާއަށް އަރާ ކަމަށް އިކޮނޮމިކް އެންޓް ޓްރޭޑް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ރައްޔިތުންގެ މަޖިލީހުގައި މިނިސްޓަރު ސައީދާއި މިއަދު މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވަނީ "މުޅި ރާއްޖޭގައި އޭޓީއެމް ހިދުމަތް" މަޝްރޫއާ ގުޅޭގޮތުން ވާހަކަަދައްކަވައިފަ އެވެ. މި މަޝްރޫއަކީ މިދިޔަ އަހަރު ނޮވެންބަރު މަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމުގެ މަތިން ބޭންކް އޮފް މޯލްޑިވްސްއިން ފެށި ހާއްސަ މަޝްރޫއެކެވެ.

މިނިސްޓަރު ސައީދު ރާއްޖޭގެ އޭޓީއެމްގެ ވިއުގަ ފުޅާކޮށްފައިވާ މިންވަރާއި، އެކަމުގެ ސަބަބުން އިގުތިސާދަށް އަންނަ މުހިންމު ބަދަލުތަކުގެ ތަފާސްހިސާބުތައް ހާމަކުރައްވައިފިއެވެ. އެގޮތުން މިނިސްޓަރު ވިދާޅުވީ އޭޓީއެމްގެ ހިދުމަތް ނުލިބި މިހާރު ރާއްޖޭގައި އޮތީ އެންމެ ދެ ރަށް ކަމަށެވެ.

"2024ގެ ކުރިން އޭޓީއެމް ބެހެއްޓިފައިވަނީ 72 ރަށެއްގައި. 2024ގަ އިތުރު 9 ރަށެއްގައި އޭޓީއެމްތައް ބެހެއްޓިފައިވާއިރު، މިއަހަރުގެ މިހާތަނަށް 130 ރަށެއްގައި އޭޓީއެމްތައް ބެހެއްްޓި 180 ރަށެއްގައި އޭޓީއެމްގެ ހިދުމަތް ދޭން ފަށާފަ. މިއާއެކު އޭޓީއެމްގެ ހިދުމަތް ނުލިބޭ މިހާރު އިނީ އެންމެ 2 ރަށް،" ސައީދު ވިދާޅުވިއެވެ.

މިނިސްޓަރު ވިދާޅުވީ ރަށްރަށުގައި އޭޓީއެމްތައް ބެހެއްޓުމުގެ ސަބަބުން އިގުތިސާދީ ގޮތުން މުހިންމު ކުރިއެރުންތަކެއް ފެނިފައިވާ ކަމަށެވެ. އެގޮތުން އޭޓީއެމްތައް މެދުވެރިކޮށް 230،000 މުއާމަލާތް ކުރެވިފައިވާއިރު، ޖުމްލަ 203 މިލިއަން ރުފިޔާ އޭޓީއެމްތަކަށް ޖަމާކުރެވިފައިވާ ކަމަށް ބީއެމްއެލްގެ ތަފާސްހިސާބުތަކުން ދައްކާ ކަމަށް ވިދާޅުވި އެވެ. އަދި މި ފައިސާ ބޭންކިން ނިޒާމުގެ ތެރެއަށް ވަނުމަކީ މާލީ ދުވެލި ރަނގަޅުވުމަށް ލިބުނު ބާރެއް ކަމަށްވެސް މިނިސްޓަރު ފާހަގަކުރެއްވިއެވެ.

ބީއެމްއެލްގެ ވިއުގަ ބޭނުންކޮށްގެން ދުވާލެއްގެ މައްޗަށް ކުރެވޭ މުއާމަލާތްތަކުގެ އަދަދުތައް ހާމަކުރައްވަމުން މިނިސްޓަރު ވިދާޅުވީ، މާލެ ސިޓީގައި ދުވާލަކު 14،000 މުއާމަލާތް ކުރެވޭއިރު، 79 މިލިއަން ރުފިޔާ ދައުރުވާ ކަމަށެވެ. އަދި އަތޮޅުތެރޭގައި ދުވާލަކު 9،300 މުއާމަލާތް ކުރެވޭއިރު، 25.7 މިލިއަން ރުފިޔާ އޭޓީއެމްތައް މެދުވެރިކޮށް ދައުރުވާ ކަމަށް ބީއެމްއެލްގެ ތަފާސްހިސާބުތަކުން ދައްކާ ކަމަށްވެސް މިނިސްޓަރު ވިދާޅުވިއެވެ.

މިނިސްޓަރު ސައީދު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން މި މަސައްކަތް ކުރައްވަނީ ހާއްސަ މަގުސަދެއްގައި ކަމަށެވެ.

"ރައީސް ޑރ. މުހައްމަދު މުއިއްޒު އެމަނިކުފާނު ވަޑައިގަންނަވާ ކޮންމެ ރަށެއްގައި އޭޓީއެމްތައް އެ ހުޅުވަނީ ވަރަށް މާތް މަގުސަދެއްގައި. ފައިނޭންޝިއަލް އިންކްލޫސިވްއަކީ މިގޮތަށް ކަނޑުން ބައިބައިވެފައި ވަރަށް މުހިންމު ކަމެއް. ރަށްރަށުގެ ރައްޔިތުން ވަރަށް ލޯތްބާއެކު މިކަން ގަބޫލުކުރޭ،" މިނިސްޓަރު ވިދާޅުވިއެވެ.