ބޯހިޔާވަހިކަން އޭގެ ހައްގުވެރިންނަށް ފޯރުކޮށް ނުދެވޭ ކަމަށް ވަނީނަމަ ފުލެޓް އެޅުމުގެ ބޭނުމެއް ނެތްކަމަށް ހުޅުދޫ ދާއިރާގެ މެމްބަރު މުހައްމަދު ޝާހިދު ވިދާޅުވެއްޖެ އެވެ.

މެމްބަރު ޝާހިދު މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. މެމްބަރު ޝާހިދު ވިދާޅުވި ގޮތުގައި، ރާއްޖޭގެ ރައްޔިތުންނަށް އަސާސީ ހައްގުގެ ތެރެއިން އެންމެ އިސްކަމެއް ދޭ އެއްކަމަކީ ބޯހިޔާވަހިކަމުގެ ހައްގު ކަމަށެވެ. އެހެންނަމަވެސް ވޭތުވެދިޔަ ސަރުކާރުތަކުގައި ސިޔާސީ މަގުސަދު ހާސިލުކުރުމަށް ބޯހިޔާވަހިކަމުގެ ނާޖާއިޒު ފައިދާ ނަގާފައިވާ ކަމަށް މެމްބަރު ޝާހިދު ވިދާޅުވި އެވެ.

"އެގޮތަށް ބާލާއިރުގައި ފުރުތަމަވެސް އަޅުގަނޑު ފާހަގަކޮށްލަނަން އެއް ބަޔަކު ކިޔާފާނެ ހިޔާ ފުލެޓޭ، އަނެއް ބަޔަކު ކިޔާފާނެ ބިންވެރިޔާ ސްކީމޭ އަނެއް ބަޔަކު ކިޔާފާނެ ގެދޮރުވެރިޔާއޭ، މި ހުރިހާ އެއްޗެއް އައިސް މި ޖެހެނީ ހަގީގަތުގައި ހަމަ އެންމެ ތަނެއްގައި، މިއިން ކޮންމެ އެއްޗެއް ކިޔާފައި އައިސްފަ މި ހުރިހާ ކަންކަން ކުރަމުން އަންނައިރުގައި ރައްޔިތުންނަށް މިދެނީ ވަރަށް ބޮޑެތި އަނިޔާތައް،" --- މެމްބަރު ޝާހިދު ވިދާޅުވި އެވެ.

މެމްބަރު ޝާހިދު ވިދާޅުވި ގޮތުގައި، މިފަދަ ކަންކަމުގެ ސަބަބުން ރައްޔިތުން ޖެހެނީ ޕޯޓަލްއަށްވަދެ ރެޔާ ދުވާލު ހޭލައި ތިބެ މައުލޫމާތު ހޯދަން ކަމަށާއި، މިކަމުގެ ތެރޭގައި ރައްޔިތުން މުޅި އަހަރު ހޭދަކުރަންޖެހޭ ކަމަށް މެމްބަރު ވިދާޅުވި އެވެ. މެމްބަރު ޝާހިދު ވިދާޅުވި ގޮތުގައި، މި ކަންކަން ދިމާވާން މެދުވެރިވީ ސަބަބަކީ ބައެއް ފަރާތްތަކުން މިފަދަ ކަންކަން ސިޔާސީކުރުމުން ކަމަށެވެ.

މެމްބަރު ޝާހިދު ވިދާޅުވި ގޮތުގައި، މިކަމުގެ ފެށުމަކީ ސިޔާސީ ބައެއް ފަރާތްތަކުން ސިޔާސީ ބާރުތައް ނެގުމަށް، ސިޔާސީ ގޮތުން އެ ފަރާތްތަކުގެ ސަރުކާރު ދެމެހެއްޓުމަށާއި ވޯޓު ހޯދުމަށް ކުރި މަސައްކަތުގެ ނަތީޖާ ކަމަށް ވިދާޅުވެ މެމްބަރު ޝާހިދު ވަނީ ކުރީގެ ސަރުކާރުތަކަށް ވަރަށް ބޮޑަށް ފާޑުވިދާޅުވެފަ އެވެ.

ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ކަންކަން ސަރުކާރުގެ އިދާރާތަކުން ކުރުމުގެ ބަދަލުގައި އެހެން ބަޔަކަށް އެ މަސައްކަތް ދޫކޮށްލަން ފެނިވަޑައިގަންނަވާ ކަމަށް މެމްބަރު ޝާހިދު އިތުރަށް ވިދާޅުވި އެވެ.