އިންޑިއާ އަދި ޗައިނާގެ ފައިސާއިން ވިޔަފާރިކުރަން ފެށުމުން ޑޮލަރުގެ މައްސަލައަށް ލުއިތަކެއް ލިބިގެންދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު ސައީދު މި މޭރުމުން ވިދާޅުވީ ވެލިދޫ ދާއިރާގެ މެމްބަރު މުހައްމަދު އައްބާސް ކުރެއްވި ސުވާލަށް ޖަވާބު ދެއްވަމުންނެވެ. މެމްބަރު އައްބާސް ކުރެއްވި ސުވާލަކީ، ޑޮލަރުގެ އަގު މައްޗަށް ދިއުމުގެ ސަބަބުން ރައްޔިތުންނަށް ދަތި އުނދަގޫތަކާ ކުރިމަތިވާ ކަމަށާއި އަދި ތަކެތީގެ އަގު ބޮޑުވާ އެއް ސަބަބު ކަމަށް ގިނަ ވިޔަފާރިވެރިން ބުނަމުންދާތީ ޑޮލަރުގެ އަގު ތިރިކުރުމަށްޓަކައި ސަރުކާރުން ގެންގުޅޭ ސިޔާސަތަކީ ކޮބައިތޯ އެވެ. މެމްބަރުގެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ދިވެހި ރުފިޔާ ބަލިކަށިވަމުންދާ މައްސަލައަކީ ވަރަށް ގިނަ ރައްޔިތުން އަދި ވިޔަފާރިވެރިން ކަންބޮޑުވާ މައްސަލައެއް ކަމަށެވެ.
ވަކިވަރަކަށް ޑޮލަރު މާރުކުރުމަކީ މީގެ ކުރީގެ އެއްވެސް ސަރުކާރަކަށް ކުރަން ނުކެރުނު ކަމެއް ނަމަވެސް ރައީސް ޑރ. މުއިއްޒުގެ ސަރުކާރު އައުމަށްފަހުގައި ވަކިވަރަކަށް ޑޮލަރު މާރުކުރަން ފެށި އެކަމުގެ ހެޔޮ ނަތީޖާ ފެންނަމުންދާ ކަމަށް މިނިސްޓަރު ވިދާޅުވި އެވެ. އޭގެ ތެރޭގައި، ކާޑު ލިމިޓު ބޮޑުކުރުމާއި، ބޭންކުން ޓީޓީއަށް ބޭރު ފައިސާ ދައްކާ އަދަދު އިތުރުކުރުން ހިމެނޭކަމަށް މިނިސްޓަރު ވިދާޅުވި އެވެ.
މީގެ އިތުރުން، ސަރުކާރުން ޗައިނާ އަދި އިންޑިއާ އާއިއެކު ލޯކަލް ކަރަންސީ ސެޓަލްމެންޓްގެ ނިޒާމުތައް ގާއިމުކުރުމަށް ވަރަށް ގިނަ މަސައްކަތްތަކެއް ކުރަމުން އަންނަކަމަށް މިނިސްޓަރު ވިދާޅުވި އެވެ. ޗައިނާ އަދި އިންޑިއާ އެއްކޮށްލީމަ ދެ ބިލިއަން ޑޮލަރާ ގާތަށް މި ދެ ގައުމާއެކު ވިޔަފާރިކުރެވޭ ކަމަށް މިނިސްޓަރު ވިދާޅުވި އެވެ.
މިނިސްޓަރު ސައީދު އިތުރަށް ވިދާޅުވީ، އިންޑިއާ އަދި ޗައިނާގެ ފައިސާއިން ވިޔަފާރިކުރެވޭ ގޮތް އިންތިޒާމްވަމުން އަންނަ ކަމަށާއި، އެ ދެ ގައުމުގެ ފައިސާއިން ވިޔަފާރިކުރަން ފެށިއްޖެނަމަ މިހާރު ޑޮލަރަށް ދިމާވެފައިވާ ދަތިކަމަށް ކޮންމެވެސް ވަރެއްގެ ލުއިތަކެއް ލިބިގެންދާނެ ކަމަށެވެ.
