ރައްޔިތުންގެ މަޖިލީހުގެ މެންބަރުންގެ ތެރެއިން ޖުޑީޝަލް ސާވިސް ކޮމިޝަނަށް އައްޔަނުކުރާ މެމްބަރަކީ މަނަދޫ ދާއިރާގެ މެންބަރު ހުސްނީ މުބާރިކް ކަމަށް ކަނޑައަޅައިފިއެވެ.
ޖޭއެސްސީގައި 10 މެންބަރުން ތިއްބަވާއިރު، މަޖިލީހުގެ މެންބަރުންގެ ތެރެއިން ކޮމިޝަންގައި ހިމެނިވަޑައިގަންނަވާ މެންބަރުގެ މަގާމު ހުސްވީ، އެ މަގާމުގައި ހުންނެވި މާފުށީ ދާއިރާގެ މެންބަރު ހުސައިން ރިޒާ އާދަމް ކުއްލިގޮތަކަށް އިސްތިއުފާދެއްވުމާ ގުޅިގެންނެވެ. ޖޭއެސްސީގެ ރައީސްގެ މަގާމުގައިވެސް ހުންނެވީ ރިޒާ އެވެ.
މަޖިލީހުން ޖޭއެސްސީއަށް މެންބަރަކު ކަނޑައެޅުމަށް ނަން ހުށައެޅުމަށާއި ތާއީދުކުރުމަށް މިއަދުގެ ޖަލްސާގައި ހުޅުވާލުމުން އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ، މަނަދޫ ދާއިރާގެ މެންބަރު ހުސްނީ މުބާރިކްގެ ނަން ހުށައަޅުއްވާފައެވެ. އެ ނަމަށް ތާއީދުކުރެއްވީ ވެލިދޫ ދާއިރާގެ މެންބަރު މުހައްމަދު އައްބާސެވެ.
ޖޭއެސްސީގެ މެންބަރުކަމަށް ހުސްނީ މުބާރިކް ކަނޑައެޅުމަށް ނެގި ވޯޓުން އޭނާ އައްޔަންކުރަން ފެންނަކަމަށް 58 މެންބަރުން ވޯޓުދެއްވިއެވެ.
ޖޭއެސްސީ އެކުލެވިގެން ވަނީ ދިހަ މެމްބަރުންގެ މައްޗަށެވެ. އޭގެތެރޭގައި ރައީސުލްޖުމްހޫރިއްޔާ އައްޔަން ކުރައްވާ މެމްބަރަކާއި އެޓާނީ ޖެނެރަލް ހިމެނެއެވެ. އޭގެ އިތުރުން ރައްޔިތުންގެ މަޖިލިސް ރައީސް އާއި މަޖިލީހުގެ މެމްބަރުންގެ ތެރެއިން ބޭފުޅަކާއި މަޖިލީހުން އައްޔަން ކުރައްވާ އާއްމުންގެ މެމްބަރާއި އަދި މަޖިލީހުން ރުހުންދޭ ސިވިލް ސާވިސް ކޮމިޝަންގެ ރައީސް ހިމެނެއެވެ. ދެން ޖޭއެސްސީގައި ތިއްބަވަނީ ތިން މަރުހަލާގެ ކޯޓުތަކުގެ ތިން ފަނޑިޔާރެކެވެ. ޖޭއެސްސީގެ ގާނޫނުގެ ދަށުން މެންބަރުކަމުގެ މަގާމެއް ހުސްވާތާ 30 ދުވަހުގެ ތެރޭގައި އެ މީހަކު ކޮމިޝަނަށް އައްޔަންކުރި ފަރާތުން އެ މަގާމަށް މީހަކު އަލުން އައްޔަންކުރަންޖެހޭނެއެވެ.
