ދިވެހިރާއްޖޭގައި ފުޓުބޯޅަ ކުރިއެރުވުމަށް ފީފާގެ ރައީސް ޖިއާނީ އިންފަންޓީނޯ އާއެކު މަޝްވަރާ ކުރެއްވިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް ޑރ. މުއިއްޒު މި މޭރުމުން ވިދާޅުވީ އެމަނިކުފާނުގެ އެކްސް އެކައުންޓުގައި ހިއްސާކުރެއްވި ޕޯސްޓެއްގަ އެވެ. ފީފާގެ ރައީސް އިންފަންޓީނޯއަށް ރާއްޖޭގައި މެހެމާންދާރީ އަދާކުރުމަކީ ލިބުނު ބޮޑު އުފަލެއް ކަމަށް ރައީސް ޑރ. މުއިއްޒު ކުރެއްވި ޕޯސްޓުގައި ވިދާޅުވި އެވެ. މީގެ އިތުރުނ، ރާއްޖޭގައި ފުޓްބޯޅަ ކުރިއެރުވުމަށް ފީފާއިން ވަމުންދާ އެހީތެރިކަމަށްވެސް އެމަނިކުފާނު ވަނީ ޝުކުރުއަދާކުރައްވައިފަ އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އާއެކު ފީފާގެ އެއްބާރުލުން އިތުރަށް ވަރުގަދަކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނު ކަމަށް ރައީސް ވަނީ ވިދާޅުވެފަ އެވެ. މީގެ އިތުރުން ފުޓުބޯޅައަކީ ރާއްޖޭގައި އެންމެ މަގުބޫލު ކުޅިވަރުގެ އިތުރުން، ދިވެހިން ގުޅުވައިދޭ ކުޅިވަރެއް ކަމަށްވެސް އެމަނިކުފާނު ވަނީ އިތުރަށް ވިދާޅުވެފަ އެވެ.
ރާއްޖޭގައި ފުޓުބޯޅަ ކުރިއެރުވުމަށް ސަރުކާރުން ގިނަ މަސައްކަތްތަކެއް ކޮށްދެއްވާނެކަމުގެ ޔަގީންކަން ރައީސް ދެއްވި އެވެ.
ރައީސް ޑރ. މުއިއްޒުއާއި ފީފާގެ ރައީސް ޖިއާނީ އިންފަންޓީނޯގެ މި ބައްދަލުވުމުގައި، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަހުމަދު ތާރިގު ވެސް ވަނީ ބައިވެރިވެ ވަޑައިގެންފަ އެވެ.
