ކަންނެލި މަސް ޕްރޮސެސްކޮށް، ބަންދުކުރުމުގެ މަސައްކަތަށް ހުޅުމާލޭގައި ގާއިމްކުރާ ފެސިލިޓީ އެޅުމަށް ކަނޑައަޅާފައިވާ ބިން ހަވާލުކޮށްފިއެވެ. މި ފެސިލިޓީގެ މަސައްކަތަކީ މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ކުރަމުން ގެންދާ މަސައްކަތުގެ ދަށުން ކުރިއަށްގެންދާ މަޝްރޫއެކެވެ.

ކަންނެލި މަސް ޕްރޮސެސްކޮށް، ބަންދުކުރާ ފެސިލިޓީ ތަރައްގީކުރުމަށް ހަމަޖެހިފައިވާ ބިން ހަވާލުކުރުމުގެ އެއްބަސްވުމުގައި ސޮއިކޮށް އެޗްޑީސީ އިން އެ ބިން ފިނޭންސް މިނިސްޓްރީއާ ހަވާލުކުރީ މިއަދު އެވެ. މި އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެކޯޕަރޭޝަނުގެ މެނޭޖިން ޑިރެކްޓަރު އަލީ ޒުހައިރު އެވެ. ފިނޭންސް މިނިސްޓްރީގެ ފަރާތުން ސޮއިކުރެއްްވީ ސްޓޭޓް މިނިސްޓަރު ހުސައިން ޝާމް އެވެ. އަދި ފިޝަރީޒް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަހުމަދު ޝިޔާމެވެ.

ކަންނެލި މަސް ޕްރޮސެސްކޮށް، ބަންދުކުރާ ފެސިލިޓީ ތަރައްގީކުރުމުގެ މަސައްކަތަކީ މަސްވެރިކަމުގެ ސިނާއަތް ތަރައްގީކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅުތަކުގެ ތެރޭގައި ހިމެނޭ މުހިންމު ވައުދެކެވެ. 

ކަންނެލި މަސް ޕްރޮސެސްކޮށް، ބަންދުކުރާ މިފްކޯގެ ފެސިލިޓީ ތަރައްގީކުރަނީ އިސްލާމިކް ޑިވެލޮޕްމަންޓް ބޭންކު (އައިއެސްޑީބީ) އާއި ދިވެހި ސަރުކާރު ގުޅިގެންނެވެ. އެގޮތުން މި ފެސިލިޓީ ތަރައްގީކުރުމަށް އައިއެސްޑީބީން ވަނީ 65 މިލިއަން ޑޮލަރުގެ ލޯނު އެހީއެއް ހަމަޖައްސާފަ އެވެ. މި ފެސިލިޓީއަކީ 35 ޓަނުގެ މަސް ބަންދުކުރުމުގެ ގާބިލުކަން ހުންނާނެ ފެސިލިޓީއެކެވެ. މި ފެސިލިޓީ ތަރައްގީކުރަން ކުރިން ކަނޑައެޅީ ކަނޑުއޮތްގިރީގަ އެވެ. ނަމަވެސް ހުޅުމާލެއިން ބިމެއް ހަމަޖެހުމުން ސަރުކާރުން ވަނީ މި ފެސިލިޓީ ހުޅުމާލޭގައި ތަރައްްގީކުރުމަށް ނިންމާފަ އެވެ.

މި މަޝްރޫއާ ގުޅޭގޮތުން ވާހަކަދައްކަވަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވިގޮތުގައި މިއަހަރު މި ފެސިލިޓީގެ މަސައްކަތް ފެށިގެންދާނެ އެވެ. އަދި އަންނަ އަހަރު މި ފެސިލިޓީގެ މަސައްކަތް ނިންމައި، މަސްވެރިންނަށް މިތަނުގެ ފައިދާ ލިބިގެންދާނެކަމަށް މިނިސްޓަރު ވަނީ ވިދާޅުވެފަ އެވެ.