އެމެރިކާ ސިފައިން ޣައްޒާއަށް ނުވައްދާނެ ކަމަށް ބުނި ޓްރަމްޕް އޭނާގެ ވާހަކަތއް ބަދަލުކުރައްވައި، ޙަމާސް ނައްތާލުމަށްޓަކައި ޣައްޒާއަށް އަރަން ޖެހިދާނެ ކަމަށް ބުނެ އިންޒާރު ދެއްވައިފިއެވެ. ޓްރަމްޕް މިގޮތަށް އިންޒާރު ދެއްވި ސަބަބަކީ އޭނާގެ ޕްލޭނާއި އެއްގޮތަށް ޙަމާސް އިން ހަތިޔާރުތައް ދޫކޮށްލައި އެމެރިކާ ބޭނުންހާ ގޮތަކަށް ޣައްޒާގެ ބިމުގައި ކަންކަން ކުރުމަށް ފުރުޞަތު ނުދޭނެކަން އެނގުމުންނެވެ.
ޙަމާސް އިން މިހާރު ވެސް ދަނީ އެމެރިކާއިން އިސްވެ އޮވެ ހުޅަނގާއި އަދި ބައެއް ޢަރަބީންނާއި ގުޅިގެން ޣައްޒާގައި އެކުލަވާލާ އިންތިޤާލީ ސަރުކާރުގެތެރެއަށް ސިއްރިޔާތުގައި ވަދެގަތުމަށް މަސައްކަތް ކުރަމުން ކަމަށް ޚަބަރު ލިބެއެވެ.
ޓްރަމްޕްގެ މަޤްޞަދަކީ ޣައްޒާގެ ބިން އަދި މުޅި ފަލަސްޠީނަކީ ޔަހޫދީންގެ ބިމަކަށް ހެދުމަށެވެ. އަދި އެމެރިކާގެ ވިޔަފާރިތައް އެ ބިމުގައި ހިންގައި އެއިން ނަފާ ހޯދުމެވެ.
ޓްރަމްޕް ވިދާޅުވީ ޙަމާސް ޖެހޭނީ ހުރިހާ ހަތިޔާރެއް ނައްތާލާށެވެ. އެކަން ނުކޮށްފިނަމަ ގުޅިފައިވާ ލަޝްކަރެއް ޣައްޒާއަށް އަރައިގެން ހަނގުރާމަ ކުރަން ޖެހިދާނެ ކަމުގެ އިޝާރާތެއް ދެއްވިއެވެ. "އެމީހުން (ޙަމާސް) ހަތިޔާރު ނައްތާނުލައިފި ނަމަ އަހަރެމެން ހަތިޔާރު ނައްތާލާނަން… އެ ޕްރޮސެސް ވަރަށް އަނިޔާވެރި ގޮތަކަށް ވެސް ހިނގާނެ" ޓްރަމްޕް ވިދާޅުވިއެވެ.
ސީއެންއެންއަށް ދެއްވި އިންޓަވިއުއެއްގައި ޓްރަމްޕް ވަނީ ޙަމާސް އިން ހަނގުރާމަ ހުއްޓާލުމުގެ އެއްބަސްވުމަށް އިޙްތިރާމް ނުކޮށްފިނަމަ އިސްރާއީލުގެ ޑިފެންސް ފޯސްތަކުން އަލުން ޣައްޒާގައި އޮޕަރޭޝަންތައް ފެށުމުގެ ހުއްދަ ދީފާނެ ކަމަށް ވިދާޅުވެފައެވެ. ޓްރަމްޕް މިހެން ވިދާޅުވިއިރު ހަނގުރާމަ ހުއްޓާލުމުގެ އެއްބަސްވުމާއި ޚިލާފަށް ކަންކަން ކުރަނީ އިސްރާއީލުންނެވެ. ޓުރަމްޕުގެ ހަނގުރާމަ ހުއްޓާލުމުގެ މުޅި ޕްރޮޕޯސަލަށް ޙަމާސް އިން މިހާތަނަށް އެއްބަހެއް ނުވެއެވެ. ޙަމަސް އިން އެއްބަސްވެފައި ވަނީ ރަހީނުން ދޫކޮށްލުމާއި ޣައްޒާގެ ވެރިކަން ދޫކޮށްލުން ފަދަ ކަންތަކަށެވެ. ހަތިޔާރުތައް ނައްތާލުމަކަށް އެއްބަހެއް ނުވެއެވެ.
